1 Yowano 4 - Libuka Lya Kuyela

Moyo wa kupwisha na nowu wa mahalo

¹ Bakakuhakiwa, hinga mu kulupila moyo nimwawo, ngoboni ezekenu myoyo hinga yinafumu kuli Nyambi, ndaba bamiluwe babengi ba mahalo banapanzanini mu kaye.

² Na neshe tukulimuka Moyo wa Nyambi, Moyo nimwawo ukwitabila ngayi Yeshu Kilishitu unakumu mu wuntu wenga wa Nyambi.

³ Na moyo nimwawo ukubula kwitabila ngayi Yeshu Kilishitu nezi mu wuntu kaliha wa Nyambi, ou wenga moyo wa Kilishitu wa Mahalo, niwo mwayuvwile ngayi ukeza na wuluno wakumakale mu kaye.

⁴ Enu mukwinga bantu ba Nyambi, bana bami babashe, kami munabapitakana, ndaba ou uli mumwenu ukupitakana ou uli mu kaye.

⁵ Nibo benga bakakaye, nohobene bakwamba bya kaye, kami kakubayuvwa.

⁶ Etu tuli bantu ba Nyambi. Ou ukulimuka Nyambi ukutuyuvwa. Ou kaliha wa Nyambi kutuyuvwa wufwako. Na neshe tukulimuka Moyo wa kupwisha na moyo wa kwongeza.

Nyambi niye shishemo

⁷ Bakakuhakiwa, tulihakenu umo na wamina, ndaba shishemo shenga sha Nyambi, kami nimwendi uku haka unahemuwu kuli Nyambi, kami ukulimuka Nyambi.

⁸ Ou ukubula ku haka, wufwako kulimuka Nyambi, ndaba Nyambi niye shishemo.

⁹ Shishemo sha Nyambi kukwetu shinamoneke na neshe, ndaba ngayi Nyambi watumine Mwanendi umo pele mu kaye, ngayi tuyoye nendi.

¹⁰ Nisho shishemo, kaliha ngayi etu twahakile Nyambi, ngoboni ngayi niye watuhakile, kami watumine Mwanendi mukwinga shihingo sha wubi wetu.

¹¹ Bakakuhakiwa, ndi Nyambi watuhakile nahiyo, etu kami tuku fwanina kulihaka umo na wamina.

¹² Kowa muntu unamono Nyambi ha shikati shimo. Ndi tukulihaka umo na wamina, Nyambi ukwikala mumwetu na shishemo shendi shikukula mumwetu.

¹³ Na neshe tukulimuka ngayi tukwikala mumwendi naniye mumwetu, ndaba unatupana Moyo wendi.

¹⁴ Nanetu tunamono kami tukupaka ngayi Tate watumine Mwana mukwinga Mulamwini wa kaye.

¹⁵ Nimwendi ukayitabila ngayi Yeshu wenga Mwana Nyambi, Nyambi ukwikala mumwendi naniye muli Nyambi.

¹⁶ Etu tunalimuku na kukulupila shishemo eshe Nyambi alinasho kukwetu. Nyambi wenga shishemo, kami ou ukwikala mu shishemo ukwikala muli Nyambi na Nyambi mumwendi.

¹⁷ Nimo shishemo shetu shikukula ngayi twikale na nkanca ha Mutena wa Kuyata ndaba ngo niye enga nahiyo etu tukwinga mu kaye.

¹⁸ Mowa bowa mu shishemo, ndi shishemo shakulakale shikutanda bowa, ndaba bowa ukuyandisha. Niye uli na bowa shilolo akule mu shishemo.

¹⁹ Tukumuhaka, ndaba watuhakile ha kutatika.

²⁰ Ndi muntu ukwamba ngayi niku haka Nyambi na kuzimba kawushinda wendi, niye mukamakula. Ndaba ou ukubula ku haka kawushinda wendi ou anamono, ukutwesha nahiti ku haka Nyambi ou abula ku mona?

²¹ Kami ndayano ezi tulinazo kukwendi, ngayi ou uku haka Nyambi ahake kawushinda wendi kami.