1 Yowano 3 - Libuka Lya Kuyela

Bana ba Nyambi

¹ Monenu shishemo osho Tate atuhakile nasho shanahiti, ngayi tutumbiwe bana ba Nyambi, nohobene kaye kakubula kutulimuka, ndaba kaliha kamulimukile.

² Bakakuhakiwa, wuluno tuli bana ba Nyambi, kami shilolo shimoneke eshe tukenga, ngoboni tukulimuka ngayi oho niye, ndaba tukamumona nehi ekala.

³ Kami muntu nimwendi uli na kulumbeza oku mumwendi, ukuliyelesha niye mwine nehi niye wa kuyela.

⁴ Nimwendi ukutenda wubi ukukiluka ndayano kami, ndaba wubi wenga kukiluka kwa ndayano.

⁵ Mukulimuka ngayi niye waholokele ngayi afumishe wubi wetu, kami mumwendi mowa wubi.

⁶ Nimwendi ukwikala mumwendi kutendanga wubi wufwako, nimwendi ukutendanga wubi, wufwako kumumona, hinga kumulimuka.

⁷ Bana bami babashe, hinga amyongeza muntu umo! Ou ukutenda kwoloka wenga wakwoloka, nehi niye wakwoloka.

⁸ Ou ukutenda wubi, wenga wa Shatana, ndaba Shatana watendanga wubi kufuma ku kutatika. Ndaba ya neshe Mwana Nyambi waholokele ngayi anongeshe milimo ya Shatana.

⁹ Nimwendi unahemuwu kuli Nyambi, wufwako kutendanga wubi, ndaba mbuto yendi yikwikala mumwendi na niye kutwesha wufwako kutendanga wubi, ndaba unahemuwu kuli Nyambi.

¹⁰ Muneshe, nisho bana ba Nyambi ba ku moneka na bana ba Shatana, nimwendi ukubula kutenda kwoloka, kaliha wa Nyambi, hinga ou ukubula ku haka kawushinda wendi.

Lihakenu umo na wamina

¹¹ Ndaba nisho shambo twayuvwile kufuma ku kutatika, ngayi tuku fwanina kulihaka umo na wamina.

¹² Kaliha ngo Kaina ou wengile wa Mukawubi, wazihile kawushinda wendi. Ndaba ngani amuzihile? Ndaba milimo yendi yayibi na ya mukonzo wendi yengile yayiwahe.

¹³ Hinga mukomoka, bawushinda wami, ndi bantu bamu kaye ba kumizimba.

¹⁴ Tukulimuka ngayi tunapiti kufuma ku kufwa kuleta ku wumi, ndaba tuku haka bawushinda. Ou ukubula ku haka kawushinda wendi ukwikala mu kufwa.

¹⁵ Nimwendi ukuzimba kawushinda wendi ukwinga mukakuziha, kami mu kulimuka ngayi kowa mukakuziha uli na wumi wa mwaya myaka hakwikala mumwendi.

¹⁶ Na neshe tukutosha shishemo sha Nyambi ndaba watulile wumi wendi hanci ndaba yetu nanetu tuku fwanina kutula wumi wetu hanci ndaba ya bawushinda.

¹⁷ Ngoboni nimwendi uli na wuheti wa kaye kano, amona kawushinda wendi hinga abula, pe ukukaluhisha mutima wendi kukwendi, kati shishemo sha Nyambi shikwikala nahiti mumwendi?

¹⁸ Bana bami babashe, hinga tuhaka na lizu, hinga na lulimi, ngoboni na mulimo na kupwisha.

Kukanca ku meho a Nyambi

¹⁹ Na neshe tukulimuka ngayi tukwinga ba kupwisha, kami tukakashula mitima yetu ku meho wendi.

²⁰ Ndaba ndi mutima wetu ukutunyanca, Nyambi wamunene ukupitakana mitima yetu, kami ukulimuka byuma nimwabyo.

²¹ Bakakuhakiwa, ndi mitima yetu yifwako kutunyanca, pe tuli na nkanca kuli Nyambi.

²² Kami nimwasho tukulombela, tukushitambula kukwendi, ndaba tukuholeka ndayano zendi na kutenda byuma ebye bikuwahililisha ku meho wendi.

²³ Kami eze zenga ndayano zendi, ngayi tukulupile ku lizina lya Mwanendi Yeshu Kilishitu na kulihaka umo na wamina, nehi atupanine ndayano.

²⁴ Kami ou ukuholeka ndayano zendi ukwikala mumwendi naniye mumwendi. Na neshe tukulimuka ngayi ukwikala mumwetu na Moyo ou anapana kukwetu.