1 Yowano 2 - Libuka Lya Kuyela

Kilishitu niye mukakutuyavwa

¹ Bana bami babashe, nikumitikitila byuma ebye ngayi, mubule kutenda wubi. Kami ndi muntu wamina ukutenda wubi, tuli na mukakwimanina kuli Tate, niye Yeshu Kilishitu wakwoloka.

² Naniye wenga shihingo sha wubi wetu, kaliha wetu pele, ngoboni sha wubi wa kaye nimwako.

³ Kami nahiyo tukulimuka ngayi tukumulimuka, ndi tukuholeka ndayano zendi.

⁴ Ou ukwamba ngayi namulimuku na kubula kuholeka ndayano zendi, wenga mukamahalo, kami mowa kupwisha mumwendi.

⁵ Ngoboni ou ukuholeka lizu lyendi, mwa shikuma mumwendi shishemo sha Nyambi shinakulu. Na neshe tukulimuka ngayi tuli mumwendi.

⁶ Ou ukwamba ngayi ukwikala mumwendi, uku fwanina kwenda niye mwine, nehi Yeshu Kilishitu endele.

Ndayano zazipya

⁷ Bawushinda, nifwako kutikita ndayano zazipya kukwenu, ngoboni ndayano za mwaka, eze mwekalile nazo kufuma ku kutatika. Ndayano za mwaka zenga lizu elye mwayuvwile kufuma ku kutatika.

⁸ Kami, nikumitikitila ndayano zazipya, eshe shuma sha kupwisha mumwendi na mumwenu. Ndaba mincimpwe yinapiti na lumuni lwa kupwisha wuluno lukumunika.

⁹ Ou ukwamba ngayi uli mu lumuni na kuzimba kawushinda wendi, ushili mu mincimpwe nihano.

¹⁰ Ou uku haka kawushinda wendi ukwikala mu lumuni, kami mowa shipukalisho mumwendi.

¹¹ Ngoboni ou ukuzimba kawushinda wendi uli mu mincimpwe na kwenda mu mincimpwe na kubula kulimuka oku akuya, ndaba mincimpwe yinashipishi meho wendi.

¹² Nikumitikitila, bana bami babashe, ndaba wubi wenu unayatiwili kukwenu ndaba ya lizina lyendi.

¹³ Nikumitikitila enu batatizami, ndaba munamulimuku ou wekalile kufuma ku kutatika. Nikumitikitila, bandumbana, ndaba munapitakana Mukawubi.

¹⁴ Nikumitikitila, bana bami babashe, ndaba munalimuku Tate. Nakumitikitila, batate, ndaba munamulimuku ou wekalile kufuma ku kutatika. Nikumitikitila, bandumbana ndaba muli na ngovu na lizu lya Nyambi likwikala mumwenu nanenu munapitakana Mukawubi.

¹⁵ Hinga muhaka kaye, hinga byuma bilimo. Ndi muntu wamina uku haka kaye, shishemo sha Tate shifwamo mumwendi.

¹⁶ Ndaba nimwabyo bili mu kaye, likwilu lya wuntu na likwilu lya meho na kuliyemeza kwa wumi, kaliha bya Tate ngoboni bya kaye.

¹⁷ Na kaye kakupita na likwilu lyako, ngoboni ou ukutenda sha mutima wa Nyambi, ukwikala mwaya myaka.

Kamalamo wa Kilishitu

¹⁸ Bana bami babashe, nisho shikati sha kukotoka, kami nehi mwayuvwile ngayi Kilishitu wa Mahalo ukeza, wuluno ku bali Bakilishitu ba mahalo babengi na neshe tukulimuka ngayi nisho shikati sha kukotoka.

¹⁹ Nibo bafumine kukwetu ngoboni kaliha bengile betu, ndaba shinga bengile betu shinga mwa shikuma bekalile netu. Ngoboni bafumine kukwetu ngayi bamoneke ngayi kaliha bengile betu nimwabo.

²⁰ Ngoboni muli na kuwaba kunafumu ku Mukakuyela, kami mu kulimuka byuma nimwabyo.

²¹ Kaliha ninatikiti kukwenu ndaba mu kubula kulimuka kupwisha, ngoboni ndaba mu kulimuka, kami ngayi kowa mahalo akufuma kukupwisha.

²² Wa makula yani ndele ou ukukanangana ngayi Yeshu niye Kilishitu? Niye wenga Kilishitu wa Mahalo, ou ukukanangana Tate na Mwana.

²³ Nimwendi ukukanangana Mwana, niye ufwaye Tate, ngoboni niye ou ukwitabila Mwana uli na Tate kami.

²⁴ Nohobene yitabilenu ngayi eshe mwayuvwile kufuma ku kutatika shikale mumwenu. Ndi eshe mwayuvwile kufuma ku kutatika shikekala mumwenu, mukekala kami mu Mwana na muli Tate.

²⁵ Kami eshe shenga shikulupisho atukulupishile niye, nisho wumi wa mwaya myaka.

²⁶ Byuma ebye namitikitili ndaba ya nibo ba kumishanwisha.

²⁷ Ngoboni kuwaba oku munatambulu kukwendi mukwikala mumwenu, kami ku fwanina mufwako ngayi muntu wamina amilongeshe, ngoboni nehi kuwaba kumo kukumilongesha byuma nimwabyo, niko kupwisha, kaliha mahalo, nehi kwamilongeshele, mukekala mumwendi.

²⁸ Wuluno, bana bami babashe, yikalenu mumwendi, ngayi oho akatutika, tukekale na kukanca na kubula lisheni ku meho wendi hakwiza kwendi.

²⁹ Ndi mu kulimuka ngayi niye wakwoloka, mu kulimuka ngayi nimwendi ukutenda kwoloka unahemuwu kukwendi.