1 Yowano 1 - Libuka Lya Kuyela

Lizu lya wumi

¹ Eshe shekalileko kufuma ku kutatika, eshe tunayuvwu, eshe tunapenze, eshe maboko wetu anakwata sha lizu lya wumi.

² Ndaba wumi waholokele nanetu tunawumono, tukuwupaka na kumimonesha wumi ou wa mwaya myaka, ou wekalile na Tate, waholokele kukwetu.

³ Eshe tunamono na kuyuvwa tukumishimikilasho, ngayi enu kami mulilumikile netu, mwa shikuma kulumikila kwetu kuli na Tate na Mwanendi Yeshu Kilishitu.

⁴ Kami byuma ebye tukumitikitila, ngayi ku wahilila kwenu kwinzale.

Nyambi niye lumuni

⁵ Nohobene eshe shenga shambo tunashiyuvwu kukwendi na kumishimikila ngayi, Nyambi wenga lumuni, mumwendi mowa mincimpwe nihani.

⁶ Ndi tukwamba ngayi tukulilumikila nendi, pe tukwenda mu mincimpwe, tukushimika mahalo na kubula kutenda kupwisha.

⁷ Ngoboni ndi tukwenda mu lumuni, nehi niye uli mu lumuni, tukulilumikila umo na wamina na mukeza wa Yeshu Kilishitu Mwanendi ukutuyelesha ku wubi nimwawo.

⁸ Ndi tukwamba ngayi wubi tufwawo, tukulyongeza etubene, kami mowa kupwisha mumwetu.

⁹ Ndi tukwitabila wubi wetu, niye mukakupwisha na kwoloka mu kutuyatila ku wubi wetu na kutuyelesha ku kutengama kwetu nimwako.

¹⁰ Ndi tukwamba ngayi kaliha tunatende wubi, tukumwingisha mukamahalo na lizu lyendi lifwamo mumwetu.