1 Timoteo 6 - Libuka Lya Kuyela

¹ Bandungo nimwabo banafwanini kuhanganika bahekulyabo ngayi ba ku fwanina kubapana maleema nimwawo, ngayi bantu hinga bahandula lizina lya Nyambi na ku longesha kwetu.

² Nanibo bali na bahekulyabo bakukulupila, hinga babayinisha, ndaba banengi bawushinda wabo, ngoboni shinene babatendele shiwahe milimo, ndaba obo ba kutambula ku milimo yabo bakwinga bakakukulupila aba ba kuhakiwa. Longesha byuma ebye na ku kowamina.

Kulongesha kwa mahalo na wuheti wa kupwisha

³ Muntu nimwendi uku longesha bya mahalo na kubula kwitabila ku mazu akupwisha a Mwene wetu Yeshu Kilishitu na ku longesha byambo bya Wunyambi,

⁴ muntu wanoho ukulilundumika na kuliyemeza, kowa shuma akulimuka. Mutima wendi ukukola, ukushinga kwipula na kututuka nkani ha mazu ndaba ya byuma bikuleta lihungu na nkani na lihandu na bihanganiko byabibi

⁵ na nkani zazibi za bantu bali na mitima yayibi ya kubula kupwisha na kuhanganika ngayi Wunyambi niyo nzila ya kuwaninamo wuheti.

⁶ Mwa shikuma Wunyambi ukuhetesha muntu shikuma ndi ukwitabila ngayi ebye alinabyo binamulingana.

⁷ Ndaba kaliha twaletele shuma shimo muno mu kaye, kami kowa shuma eshe tukatwesha kushimba ha kufumamo.

⁸ Nohobene ndi etu tuli na byakulya na bivwalo, ebye binatulingana.

⁹ Ngoboni bantu bakushinga kuheta, ba kuwa mu shezeko, kami ba kukwatiwa mu kanyimbwa ka mahungu amengi akuyeba na bya kunonga, awa mahungu akukokela bantu ku kuloba.

¹⁰ Ndaba ku haka mali kwenga mupishi wa wubi nimwawo, ndaba ya kuwahaka, bantu bamo bashanukile ku kukulupila na kuliyaka na makalikiza amengi.

Paulu ukufundiziza Timoteo

¹¹ Ngoboni obe Timoteo, muntu wa Nyambi, shintuluka ku byuma ebye na kukonka kwoloka na Wunyambi na kukulupila na shishemo na lunzewe na kulilimbwilisha.

¹² Ulwe ngunga yayiwahe ya kukulupila, hantu ukawane wumi wa mwaya myaka, ndaba Nyambi wakwihaninine byuma ebye, oho walitabilile ku meho a bapaki babengi.

¹³ Nikukulayelela ku meho a Nyambi, ou ukuyoyesha byuma nimwabyo na ku meho a Kilishitu Yeshu, ou wapakile kwitabila kwakuwahe ku meho a Pontiyashi Pilato nikukulayelela ngayi,

¹⁴ ulame ndayano eze na kubula libala hinge nyanco, hantu ha ku moneka kwa Mwene wetu Yeshu Kilishitu.

¹⁵ Eshe shikaholoka ha shikati sha ku fwanina na Mpandashilanga umo tuhu wakulemeshiwa, Mwene ya bamyene na Hekulu wa bahekulu.

¹⁶ Ou umo tuhu wakubula kufwa na kwikala mu mwana owo kowa muntu ukutwesha kuhenyenako, kowa muntu unamumono, hinge ukutwesha kumumona. Kukwendi kwikale maleema na ngovu za mwaya myaka! Ameni.

Bakayeshu ba kuheta

¹⁷ Tongweza bakakuheta mu kaye kano ngayi hinga baliyemeza hinga kulumbeza mu wuheti, ngoboni muli Nyambi, ou ukutupana byuma nimwabyo ngayi tuwahilile.

¹⁸ Batongweze ngayi batende byabiwahe, ngayi bahete mu milimo yayiwahe, benge ba kushoboloka na kushinga kuyavwa.

¹⁹ Ntendelo ya noho, bakalibungikila nibobene wuheti kwinga shishimi sha shiwahe, ndaba ya shikati shikeza, ngayi bakwatishe wumi wa kupwisha.

²⁰ Obe Timoteo, lama eshe shapanikiwile kukwobe. Benguka ku mazu owa a kubwaya na kukana kwa ebye bikutumbiwa na mahalo ngayi “Kalimukisho.”

²¹ Ndaba bamo betabilile, pe ha kutenda noho, banashanuku ku kukulupila. Nceshe zikale nobe.