1 Timoteo 5 - Libuka Lya Kuyela

Milimo yetu ku baminetu bakakukulupila

¹ Hinga ukalihila mukulwane wa mulume, ngoboni umukowamine ngonehe tatiyobe na bandumbana ubashiwulule ngonehe bakonzobobe.

² Na bakulwane babakazi ubashiwulule ngonehe bamandiyobe, tunkanga ngonehe bampanzobe na kuyela mutima nimwawo.

³ Lemeeka bakazi ba bamfwile, aba banengi ba mpampu.

⁴ Ngoboni ndi mukazi wa mfwile uli na bana hinge bazukulu, balilongeshe taha kutenda milimo yabo ya Wunyambi ku bakalupashi lwabo ha kulela bamfwile, ngayi ha kutenda noho bakubweshela bahemi na bankakazabo, ndaba nisho shikuwahililisha Nyambi.

⁵ Mukazi wa mfwile ou nengi mpampu, wakubula muntu wakumufulankana, ou nayaka kulumbeza kwendi muli Nyambi, ou ukazamina mu malombelo mwaana na wushiku kuli Nyambi.

⁶ Ngoboni mukazi ukuyoya mu myelembo, niye unafu hinge ndi ushili kuyoya.

⁷ Mubalongeshe byuma ebye, ngayi kubule muntu ukuwaniwa na mulandu.

⁸ Ngoboni ndi muntu wufwako kulama bawushinda wendi, shinene bakalupashi lwendi, niye unakana kukulupila kwendi, kami ukupitakana mukakubula kukulupila.

⁹ Hinga mufungilako mukazi wa mfwile ku palo ya bakazi ba bamfwile ndele uli na myaka ya kupitakana makumi mutanu na limo, kami niye uku fwanina kuyekiwa kamo.

¹⁰ Wafwanina mukazi wampupo ya milimo yayiwahe. Mukazi unalele bana bendi shiwahe ndi ou wakobelelenga bayeni mu litala lyendi, watendelenga milimo ya kubomba ku baminendi Bakayeshu, wayavwilenga bantu bekalile mu makando, walitupwile kutenda byabiwahe.

¹¹ Ngoboni hinga mufungila bakazi ba bamfwile ba batwanuke, ndaba oho likwilu lyabo likashinga ngayi bayekiwe, pe bakufuma kuli Kilishitu,

¹² pe ba kuwana mulandu ndaba ya kubula kulama kukulupila kwabo.

¹³ Kami ba kulilongesha kwinga bavwa, oho ba kuzingula ku litala na litala, ngoboni sha shibi kupitakana ebye nibo ba kulilongesha katungwila na bakakuliheheza zinyutu zabo na bakakwamba byuma ebye bakubula ku fwanina kwamba.

¹⁴ Nohobene nikushinga ngayi bakazi ba bamfwile ba batwanuke bayekiwe bekale na bana na kulama shiwahe minkanda yabo, ngayi bamalamo betu babule kwamba byabibi hahetu.

¹⁵ Ndaba bakazi ba bamfwile bamo bashanukakale na kukonka Shatana.

¹⁶ Ngoboni ndi mulume wamina hinga mukazi wakukulupila uli na bamfwile, babayavwe, hinga batwika muziho ku litengo, ngayi litengo mwanga liyavwe bakazi ba bamfwile baya bakubula bakakubayavwa.

¹⁷ Bakulwane aba ba kutwaminina shiwahe matengo, ba ku fwanina kutambula maleema shikuma, shinene aba ba kutenda mulimo wa ku shimikila na ku longesha lizu lya Nyambi.

¹⁸ Ndaba kwatikitiwa ngayi, “Hinga ufwika ku kanwa ka pulu oho uli na kuliyavwishaye ha kupula mpeka,” kami ngayi, “Mukakutenda milimo uku fwanina kutambula ncuungu yendi.”

¹⁹ Hinga uyuvwilila ku shambo sha kubangila mukulwane wa litengo, ndele kumbili ya bapaki babili hinga bahatu.

²⁰ Aba ba kutenda wubi, bambile kumbili ya nimwabo, ngayi bamina kami batine.

²¹ Kumbili ya Nyambi na Mwene Yeshu Kilishitu na mangeloyi akuhatiwa nikukwambila ngayi, utende byuma ebye na kubula kuhota umo kumbili ya wamina na kubula kutenda shuma shimo sha shihota.

²² Hinga unyankupisha kukambika maboko ha muntu, pe hinga uliyuvwashana na wubi wa bantu bamo, ngoboni ulilame shiwahe.

²³ Hinga unwa mema tuhu, ngoboni unwengako na tuwaine twatushe twa mikabo ya shinyanca kuyavwa livumo lyobe ndaba ya kukolakola.

²⁴ Kuli bantu bamo wubi wabo uku moneka na kuya kumbili ku kuyata, ngoboni wubi wa bamina ukukonka munyima.

²⁵ Nahiyo kami milimo yayiwahe yamina yiku moneka kumbili, kami ya kubula kwinga noho kutwesha yifwako kulimbiwa.