1 Timoteo 3 - Libuka Lya Kuyela

¹ Eshe shambo shinengi sha kupwisha, ndi muntu ukushinga mulimo wakutwaminina litengo ukushinga mulimo wawuwahe.

² Nohobene mukakutwaminina mu litengo uku fwanina kwinga mukakubula nyanco, mulume wa mukazi umo, mukakulizilikila, mukakushangama, mukamwombela, mukakukobelela bayeni, atweshe ku longesha,

³ kaliha mukakukolwa, kaliha mukamangunga, ngoboni wakubomba na ku mwena, kaliha wafwanini kwinga waku haka mali,

⁴ ntwamina wafwanina kulela bakalupashi lwendi shiwahe na kufutula bana bendi kwombatala na kumupana maleema nimwawo.

⁵ Ndaba ndi muntu wufwako kulimuka kulela lupashi lwendi, pe ukalela nahiti litengo lya Nyambi?

⁶ Kaliha mukakwitabila wuluno, kutina alikatula na kuliyemeza na kuwa kukuyata kwa Shatana.

⁷ Kami uku fwanina kwikala na mpupo yayiwahe ku bantu ba hamunkanda, kutina bamunyanca na kuwila mu kantamba ka Shatana.

Bakakutwaminina mu litengo

⁸ Baka kuyavwa mu litengo banafwanini kami kwinga banyinkalo yayiwahe, ba kukulupiliwa, kaliha benga bakakukolwa, hinge bamutongo wa mali,

⁹ banafwanini kwinga bantu ba kulama ncimpi za kukulupila, na shikeketima shashiwahe.

¹⁰ Baku fwanina kwezekiwa taha, ndi banapiti mukwezekiwa, pe nibo banafwanini kutenda mulimo.

¹¹ Nahiyo kami bakazabo banafwanini kwinga ba maleema, kaliha bakakutungula, banafwanini kwinga ba kubomba na kupwisha mu byuma nimwabyo.

¹² Mukakuyavwa mu litengo enge mulume wa mukazi umo na kulela shiwahe bana bendi na kulela lupashi lwendi shiwahe.

¹³ Baka kuyavwa ba kutenda mulimo wabo shiwahe bakaliwanina kwimana kwakuwahe, kami bakatwesha kwamba na kukanca ha kukulupila kwabo muli Kilishitu Yeshu.

Ncimpi zazinene

¹⁴ Oho nikutikita elye liñwati kukwobe, nikulumbeza kwiza na kuku mona wanguwangu.

¹⁵ Ngoboni ndi nikwihala, liñwati elye likamitongweza eshe bantu bafwanina kwikala mu Litala lya Nyambi, elye linengi litengo lya Nyambi wakuyoya, niyo mpangwa na mwimbi wa kupwisha.

¹⁶ Mwa shikuma, kowa muntu ukatwesha kukanangana ha wunene wa ncimpi za Wunyambi wetu! Nyambi waholokele mu shifwekesha sha wuntu, Moyo wa Kuyela wapakile ngayi wakwoloka. Mangeloyi bamumonene. Washimikiwile ku bantu nimwabo, bantu ba muno mu kaye bamukulupilile, pe watwaliwile muyilu mu wuwahe.