1 Teshalonika 4 - Libuka Lya Kuyela

Wumi wawahilishanga Nyambi

¹ Ha kumanisha, bawushinda, tukumilomba na kumi kowamina muli Mwene Yeshu ngayi, nehi twamilongeshele, yoyenu na kuwahililisha Nyambi, ngonehe muli na kuyoya, pe pitakanishenu kutenda noho.

² Ndaba mu kulimuka ndayano ezi twamipanine muli Mwene Yeshu.

³ Nyambi ukushinga ngayi muliyeleshe, mwanga mufume ku zinzila za wunjenge.

⁴ Muntu nimwendi alimuke kulama lutu lwendi mu nzila ya kuyela na ya maleema.

⁵ Kaliha na lihungu lya mutongo, ngonehe Bakamatunga aba bakubula kulimuka Nyambi.

⁶ Nohobene hinga kwikala wakubipishila kawushinda wendi hinge kumukeyela mu shuma shamina, ngonehe twamitongwezele mwaka mu kupwisha, Mwene ukashushula nimwabo ba kutenda bya nahiyo.

⁷ Ndaba Nyambi kaliha natwihanini mu mazilo, ngoboni mu kuyela.

⁸ Nohobene nimwendi ukukana ebye, kaliha ukukana muntu, ngoboni ukukana Nyambi, ou unamipaniki Moyo wendi wa Kuyela.

⁹ Ngoboni ha bya shishemo sha wushinda wa bakakukulupila, kaliha nafwanini ngayi nimitikitile, ndaba enu bamwine munalongeshiwi na Nyambi ngayi mulihake umo na wamina.

¹⁰ Mwa shikuma muli na shishemo ku bawushinda nimwabo bali mu Mashendoniya, haya tukumilomba bawushinda ngayi mupitakanishe kutenda noho.

¹¹ Mwezeke shikuma kuyoya mu ku mwena na kuyaka bihanganiko ku milimo yenu enu bamwine na kutenda milimo na maboko enu, ngonehe twamitongwezele.

¹² Ndi mukutenda noho, pe mukakona maleema a baya bakakubula kukulupila, pe kami mukabula kupenzelela ku muntu ha byuma bya kuliyavwa nabyo mu kuyoya.

Kwiza kwa Mwene

¹³ Enu bawushinda kushinga nifwako ngayi mwikale mu wulube, ndaba ya baya banalangana tulo, ngayi mubule kuyena, ngonehe batendanga baya bakubula kulumbeza.

¹⁴ Ndaba ndi tukukulupila ngayi Yeshu wafwile, pe washangukile nahiyo kami aba bakulangana muli Yeshu, Nyambi ukababwesha hamo nendi.

¹⁵ Tukwamba ebye kukwenu na lizu lya Mwene ngayi, etu tushilikuyoya kukuma na hakwiza kwa Mwene, kaliha tukaya kumbili ya baya banalangana tulo.

¹⁶ Ndaba Mwene niye mwine ukashuluka kufuma kuyilu na lukuwa lwa ndayano na lizu lya lingeloyi wamunene na mungunina wa mpandula ya Nyambi. Pe baya bafwile hinga ba kulupila muli Kilishitu bakenga ba muntanzi ku shanguka.

¹⁷ Pe etu tushilikuyoya kukuma na shikati shiyo, tukatwaliwa hamo nabo na kuliwana na Mwene mu mbimbayilu. Pe tukekala na Mwene mwaya myaka.

¹⁸ Nohobene lishumishenu umo na wamina na mazu awa.