1 Teshalonika 3 - Libuka Lya Kuyela

¹ Nohobene oho twakwangile mwa kutendela, twahanganikile ngayi shikwinga shashiwahe ngayi mwanga tushale ninkayetu mu Atene.

² Twatumine Timoteo kawushinda wetu, mukamulimo wa Nyambi, kami niye minetu mu mulimo wa ncango zaziwahe za Kilishitu ngayi eze mu kumishumisha na kumibengezeka ndaba ya kukulupila kwenu,

³ ngayi kubule muntu wakubokela munyima ndaba ya makando awa. Enu mu kulimuka ngayi binengi bifungo bya Nyambi ngayi awa makando eze kukwetu.

⁴ Ndaba mwa shikuma, oho twekalile nenu, twamitongwezele ngayi tukawana makalikiza, ngonehe mu kulimuka, kunatendiwi noho wuluno.

⁵ Ndaba ya shuma eshe, oho ami nakwangile mwa kutendela natumine Timoteo ngayi eze na ku mona kukulupila kwenu. Natinine ngayi kampe na shiheka shamina Shatana unamyezeke, pe milimo yetu mumwenu yikenga yanahiya.

⁶ Ngoboni wuluno oho Timoteo anezi kuno kufuma oko kukwenu, unatuletele byambo byabiwahe bya kukulupila kwenu na shishemo shenu, kami unatutongweze ngayi, shikati nimwasho oho mwatwanukanga mwawahililanga, kami mwashinganga shikuma kutumona, ngonehe etu kami tukushinga kumimona.

⁷ Nohobene, bawushinda, mu makalikiza na mu makando etu nimwawo, tunashumankana ndaba ya kukulupila kwenu.

⁸ Wuluno tukuyoya ndi enu mu ku shumisha muli Mwene.

⁹ Haya tukakambilila kuli Nyambi hahenu, kwezeka na ku wahilila oku tuli nakwo ku meho a Nyambi ndaba yanenu.

¹⁰ Tukulombela shikuma wushiku na mwaana ngayi mwanga kami tutweshe kumimona, pe tumiholwele ebye binayawili mu kukulupila kwenu.

¹¹ Mwanga Nyambi na Tatiyetu niye mwine na Mwene wetu Yeshu bawahishe nzila yetu ya kwiza kukwenu.

¹² Mwanga Mwene amikulishe na kumi hanyisha mu shishemo ku umo na wamina na ku bantu nimwabo, ngonehe etu tukutenda kukwenu.

¹³ Mwanga amishumishe, pe mukwinga ba kuyela na bakubula shihepwa ku meho a Nyambi ou Tatiyetu, hakwiza kwa Mwene wetu Yeshu Kilishitu hamo na bakakuyela bendi nimwabo.