1 Teshalonika 2 - Libuka Lya Kuyela

Mulimo wa Paulu mu Teshalonika

¹ Bawushinda, enu bamwine himulimuka ngayi mukala wetu wa kwiza kukwenu, kaliha wengile wa nahiya,

² ngoboni hinge ngayi twayandile na kuhanduliwa shikuma mu Fwilipu ngonehe mu kulimuka, twakancile muli Nyambi, pe twamitongwezele ncango zaziwahe za Nyambi ku meho a baya batukananganishilenga shikuma.

³ Ndaba oho tukumikowamina, kaliha tuli na bihanganiko byabibi hinge bya mazilo, hinge bya kushinga kumi keyela.

⁴ Ngoboni tukwamba ngonehe anatwitabilishi Nyambi ngayi twinge bakakukwayanisha ncango zaziwahe tukwamba nahiyo, kaliha ngayi twinge bakakuwahilisha bantu, ngoboni bakakuwahilisha Nyambi ou mukakufwanikiza mitima yetu.

⁵ Ngonehe mu kulimuka, kaliha twambile na mazu akwongeza, hinge kuliyavwisha mazu aku shoshoka ngayi tuholeke mutongo, Nyambi niye paki.

⁶ Kaliha twashingilenga kuyemeziwa kukufuma ku bantu, hinge kukwenu, hinge ku muntu wamina. Hinge ndi twafwaninine kumipana wulemezezi ndaba tuli bantumwana ba Kilishitu,

⁷ ngoboni twengile ba kubomba mukati kenu, ngonehe shibeleki alelanga bana bendi.

⁸ Nohobene ndaba twamihakile shikuma, kaliha twashingile tuhu kulitapila nenu ncango zaziwahe za Nyambi, ngoboni na myoyo yetubene, ndaba mwengile bakakuhakiwa shikuma kukwetu.

⁹ Bawushinda, mwa shikuma himwanuka kukalamana kwetu na litengela lyetu, twatendelenga milimo wushiku na mwaana, ndaba kaliha twashingile kupana wulemezezi ku umo na wamina kukwenu, oho twashimikililenga kukwenu ncango zaziwahe za Nyambi.

¹⁰ Enu muli bapaki na Nyambi kami paki, twengile ba kuyela na kwoloka na kubula nyanco mukati kenu bakakukulupila.

¹¹ Ngonehe mu kulimuka, twamitendele nimwenu ngonehe tata muntu atendanga kuli bana bendi.

¹² Twami shumishile na kumi bengezeka na ku myambila ngayi mwende mu nzila yiku fwanina Nyambi, ou unamihana ku Wene na ku wuwahe wendi.

¹³ Ndaba ya shuma eshe, tukukambilila shikati nimwasho kuli Nyambi, ndaba oho mwatambwile lizu lya Nyambi elye mwayuvwile kukwetu, kaliha mwalitambwile ngonehe lizu lya bantu, ngoboni ngonehe lizu lya Nyambi, nehi eshe lili. Nilyo likutenda milimo mumwenu bakakwitabila.

¹⁴ Ndaba enu bawushinda, mwafutukile kwinga bakakukonka matengo a Nyambi ali muli Kilishitu Yeshu amu Yundeya. Nanenu kami mwayandilile byuma bimo ku bakalitunga lyenu, nehi kami ayandile aya matengo ku Bayunda,

¹⁵ aba bazihile Mwene Yeshu na bamiluwe, kami nibo bali na kutuyandisha. Kaliha ba kuwahililisha Nyambi! Kami bali na nkani ku bantu nimwabo.

¹⁶ Bakutukanisha kwamba ku Bakamatunga ngayi bapuluke. Mu nzila eye, bali na kuliwezelela wubi wabo shikati nimwasho ngayi wulingane. Haya wukali wa Nyambi unezi kukwabo ku mamaninino.

Bifungo bya Paulu bya kubazingula kami

¹⁷ Ngoboni bawushinda, oho zinyutu zetu zafumishiwile kukwenu mu kashikati kakashe, twekalile na kumi hanganika mu mitima. Pe twekalile na shitima na nyumwa shikuma ngayi twize na kumimona meho na meho.

¹⁸ Nohobene twashingile kwiza kukwenu kami, nehi ami Paulu nashingile kwiza kukwenu bikati byabingi, ngoboni Shatana watukwangishile.

¹⁹ Haya kulumbeza kwetu na ku wahilila kwetu na munana tukaliyemeza nawo hakwiza kwa Mwene wetu Yeshu bili kuti? Kati kaliha enu ndi?

²⁰ Ndaba enu wuwahe wetu na ku wahilila kwetu.