1 Shamwele 9 - Libuka Lya Kuyela

Shaulu ukuliwana na Shamwele

¹ Kwekalile muntu wa mushobo wa Mbenjamani lizina lyendi Kishi, mwana Ambiyale wa mulume, muzukulya Zelola, wa ba lupashi lwa Mbekolati wa ku livumo lya Afwiya. Niye wengile wakuheta kami wengile wampupo.

² Wekalile na mwanendi wa mulume lizina lyendi Shaulu, wengile ndumbana wamuwahe shikuma na wutali kupitakana bantu nimwabo bamu Ishalela.

³ Haya bambongolo ba Kishi tatiyendi Shaulu bayongalile, pe Kishi wambile kuli Shaulu ngayi, “Shimbaho umo ha bakamilimo uye nendi na kushinga bambongolo.”

⁴ Bayile na kupita mu litunga lya binkanda lya Efulemu na kupita mu litunga lya Shalishahe, ngoboni kaliha babawanine. Niho bayile na mu litunga lya Shaalima, ngoboni bambongolo kwengile kowa. Bapitile kami mu litunga lya Mbenjamani, ngoboni babulile kuwaniwa.

⁵ Oho bezile ku litunga lya Zufu, Shaulu wambile ku mukamulimo wendi ngayi, “Toko tuboke ku munzi, ndelewa batate ba kutwesha kuvulama kuhanganika ha bambongolo pe bakutatika kulikekula hahetu.”

⁶ Mukamulimo wakumbwile ngayi, “Mona, mwali muntu wa Nyambi muno mu munzi wakulemeekiwa shikuma ndaba byuma nimwabyo ambanga byenganga bya kupwisha. Tokonoko tuyeko, kampe ukutwesha kututongweza oku bali bambongolo.”

⁷ Shaulu wepwile ngayi, “Ndi tukuya kukwendi tukamupanika bishini? Ndaba mu zimpamba zetu mowa byakulya binashalamo, kowa eshe tukamupana muntu wa Nyambi. Bishini tuli nabyo?”

⁸ Mukamulimo wakumbwile ngayi, “Nili na tumali twa shiliva. Nikutwesha kumupana muntu wa Nyambi, pe ukatwesha kututongweza oku tukutwesha kubawana.”

⁹ Ku mwaka mu Ishalela, oho muntu ayilenga mukwipwiziza kuli Nyambi wambile ngayi, “Toko tuyenga kuli mukaku mona ndaba ou bakwihana lelo ngayi muluwe wa Nyambi, mwaka bamwihaninenga ngayi mukaku mona.”

¹⁰ Shaulu wakumbwile ngayi, “Shihanganiko shashiwahe. Toko tuyenga.” Nohobene bayile ku munzi oku kwekalilenga muntu wa Nyambi.

¹¹ Oho bayilenga na kukankalala ha shinkanda sha ku munzi, bahanganine batunkanga aba bezilenga mu kutekula mema. Bepwile batunkanga ngayi, “Kati nimwali shimonamona mu munzi ndi?”

¹² Batunkanga bakumbwile ngayi, “Ingoi, nimwali, Mwa shikuma bene, kwali kumbili oku mu kuya. Ndi mu ku nyankupisha mukamuwana, ndaba unakumu lelo mu munzi. Bantu banakuya na kutupula nkombela ha kaala ku mwanya wakulemeshela ha shinkanda.

¹³ Oho mukwingina mu munzi mu kumuwana, shilolo aye na kulya, bantu aba banehaniwi kubalika kulya bafwako hantu nakakumu, ndaba ha kutatika ukafuywela nkombela taha noho balye. Yenunga mukaliwane nendi shawangu.”

¹⁴ Nohobene Shaulu na mukamulimo wendi bayile ha munzi, oho bengininenga mu munzi, bamonene Shamwele heza kumbili yabo haya ku mwanya wakulemeshela.

¹⁵ Ha mutena oho Shaulu shilolokale akume, Nyambi ya Ngula watongwezele Shamwele shilumweza ngayi,

¹⁶ “Nzona ha shikati shinobene nika kutumina muntu waku mushobo wa Mbenjamani. Ukamuwabishe mazi enge ntwamina wa bantu bami ba Ishalela, niye ukabalamwina ku Bafwilishitina. Ami namono kuyanda kwa bantu bami kami nayuvwu kukaloka kwabo kwakushinga kubayavwa.”

¹⁷ Oho Shamwele amonene Shaulu, Nyambi ya Ngula wambile kukwendi ngayi, “Ou niye mulume ou na kutongweza, ukalela bantu bami.”

¹⁸ Niho Shaulu ayile kuli Shamwele, ou wekalile kwakwipi na lipangati, pe wamwipwile ngayi, “Ntongweze, kati kuti ku litala lya mukaku mona?”

¹⁹ Shamwele wakumbwile ngayi, “Amibene mukaku mona. Twamina kumbili yami, tuye ku mwanya wakulemeshela, mukalya hamo na nami lelo. Nzona lumenemene nika kumbula mayipu wenu nimwawo na kumifunzula.

²⁰ Nehe bya ha bambongolo baya bayongala ku matena ahatu akunyima, hinga uliyakatabo bawaniwakale. Ngoboni kati yani ou bali na kushinga shikuma bantu ba Ishalela? Nengi obe bene na ba lupashi lwa tatiyobe.”

²¹ Shaulu wakumbwile ngayi, “Nili waku mushobo wa Mbenjamani, mushobo wawushe mu Ishalela, kami ba lupashi lwami nibo ba kukumininako ku mushobo. Kati shumangani boni eshe ukwambila nehe kukwami?”

²² Niho Shamwele atwalile Shaulu na mukamulimo wendi mukwingina mu kampenci kakanene pe wabekalishile kwakwipi nendi oku kwekalile bayeni, behaniwile nimwabo bengile makumi ahatu.

²³ Shamwele wambile ku mukakuteleka ngayi, “Leta shituntula sha nyama shiya na kupana shiya na kutongweza ngayi, ‘Shiyakile ha yinkayasho.’ ”

²⁴ Nohobene mukakuteleka washimbile shituntula shashilama sha mazi kwakwipi na mushila, pe washitulile kumbili ya Shaulu. Shamwele wambile ngayi, “Eshe shituntula nisho na kutelekela ngayi ulye. Nashikowezelanga obe ngayi ushilye shikati shino, ngayi mwanga wambe ngayi, ami nehana aba bantu kukulya ku shimbo.” Nohobene Shaulu walile na Shamwele ha mutena uyo.

²⁵ Oho ba kunkulukile kufuma ku mwanya wakulemeshela kwiza ku munzi, bayalilile Shaulu wulili hayilu ya litala.

Shamwele ukuwabisha Shaulu kwinga kalela

²⁶ Ku lumenemene, mutena shilolo ututike, Shamwele wehanine Shaulu ha shihoke ngayi, “Pinduka, nikakufunzule uyenga mu mukala wobe.” Shaulu wapindukile, niho ayile hamo na Shamwele mu nzila.

²⁷ Oho bakumine kunkumo ya munzi, Shamwele wambile kuli Shaulu ngayi, “Tongweza mukamulimo atwamine kumbili yetu.” Mukamulimo wayilengaho, pe Shamwele wazaminine kwamba ngayi, “Yimana taha, nikutongweze ebye anamba Nyambi.”