1 Shamwele 7 - Libuka Lya Kuyela

¹ Nohobene bantu ba ku Kiliyati Yeyalima bashimbile Likwati lya Kulimama lya Nyambi ya Ngula, pe balitwalile ku litala lya mulume lizina lyendi Ambinandambu, ou wekalilenga ha binkanda. Bazilikile mwanendi wa mulume Eliza kwinga mukulwane walyo.

Shamwele ukulela Ishalela

² Likwati lya Kulimama lya Nyambi ya Ngula lyekalilenga ku Kiliyati Yeyalima shikati shashitali, yengile myaka makumi abili. Ha shikati eshe Baishalela nimwabo bakalokelelenga kuli Nyambi ya Ngula ngayi abayavwe.

³ Shamwele wambile ku bantu Baishalela ngayi, “Ndi mukatengulukila kuli Nyambi ya Ngula na mitima yenu nimwayo, munafwanini kufumisha banyambi ba mapukwenda nimwabo na tunankishi twa nyambi wa mbuyama Ashitaloti. Lifungwilenu enu bamwine kuli Nyambi ya Ngula na kumulemesha niye tuhu pele, pe ukamilamwina ku ngovu za Bafwilishitina.”

⁴ Nohobene Baishalela bafumishile tunankishi twabo twa Mbaalu na Ashitaloti niho balemeshele tuhu Nyambi ya Ngula.

⁵ Shamwele wambile ngayi, “Baishalela nimwabo kungulukilenu ku Mizipa, kuyo niko nikamilombelela kuli Nyambi ya Ngula.”

⁶ Nohobene nimwabo bakungulukilile ku Mizipa, pe batekwile mema na kuwayitila ku mwanya wa Nyambi kwinga ntupu kuli Nyambi ya Ngula nakuzila kulya mutena wanzimba. Bambile ngayi, “Tunabipishili Nyambi ya Ngula.” Pe Shamwele wayatile bantu ba Ishalela ku Mizipa.

⁷ Oho Bafwilishitina bayuvwile ngayi Baishalela banakungulukili ku Mizipa, bamyene mutanu ba Bafwilishitina bayileko na bantu babo na kubendela mutakwe. Baishalela oho bayuvwile eshe, batinine.

⁸ Pe bambile kuli Shamwele ngayi, “Twalililaho kulombela kuli Nyambi ya Ngula, Nyambi yetu, mwanga atulamwine ku Bafwilishitina.”

⁹ Shamwele wazihile mwana mbelele waku mabele pe wamuhokeshele wanzimba kwinga nkombela ya kuli Nyambi ya Ngula. Niho alombelele kuli Nyambi ya Ngula ngayi ayavwe Baishalela, pe niho akumbwile malombelo wendi.

¹⁰ Shikati shiyo akombelelenga Shamwele, Bafwilishitina bezile kukwabo na kuhenya ngayi balwe. Hohobene Nyambi ya Ngula walendumukile kuyilu mu kulwisha Bafwilishitina. Pe wabavulanganishile shikuma niho batinine na kwikala mu kampwe.

¹¹ Baishalela batutikile mu Mizipa pe bakonkele Bafwilishitina kuya na kubazihila ha nzila kuka bakumisha naku Mbetika.

¹² Shamwele washimbile limanya, waliyimikile mukati ka Mizipa na Sheni, pe wambile ngayi, “Nyambi ya Ngula unatuyavwa mu nzila nimwayo.” Niho alitumbile ngayi, “Embeneza.”

¹³ Nohobene Bafwilishitina bakomiwile, Nyambi ya Ngula wabakanishile kwendela mutakwe litunga lya Baishalela ha shikati sha kuyoya kwa Shamwele.

¹⁴ Zinkena nimwazo eze bapukwile Bafwilishitina mukati ka Ekiloni na Ngati bazibweshele ku Ishalela, pe bantu ba Ishalela batambwile matunga wabo nimwawo. Niho kwekalile ku mwena mukati ka Baishalela na Baamoli.

¹⁵ Shamwele walelele Ishalela shikati sha kuyoya kwendi nimwasho.

¹⁶ Ha mwaka ha mwaka wayilenga na kuzingula Mbetele na Ngilingale na Mizipa, pe mu zimbalila eze nimwazo wakayatilengamo byambo.

¹⁷ Niho kami abokelenga ku munzi wendi mu Lama, niko akatendelenga mulimo wakuyata. Niho azikilemo kaala ka Nyambi ya Ngula.