1 Shamwele 6 - Libuka Lya Kuyela

Kuboka kwa Likwati lya Kulimama

¹ Oho Likwati lya Kulimama lya Nyambi ya Ngula lyekalile zingonda mutanu na zibili mu litunga lya Fwilishitina,

² bantu behanine bakankombela na bakakubuka, pe babepwile ngayi, “Kati tukutenda nahiti na Likwati lya Kulimama lya Nyambi ya Ngula? Tutongwezenu, tukalibwesha nahiti oku lyekalilenga?”

³ Bakumbwile ngayi, “Ndi mu kubwesha Likwati lya Kulimama kwa Nyambi wa Ishalela, mu ku fwanina kulitwala kukwendi na ntupu ya kuyumba ha wubi wenu. Likwati lya Kulimama ku fwanina lifwako ku boka nahiya lya kubula ntupu. Pe mu nzila eye, mukapoleshiwa nohoboni mukalimuke ngayi kati shumangani eshe anamishushwilinga.”

⁴ Bafwilishitina bepwile ngayi, “Ntupu ngani tukamutwalila?” Nibo bakumbwile ngayi, “Mikalahabi mutanu yakubumba ya ngolinde na bampuku mutanu ba kubumba ba ngolinde, umo na umo ku mwene wa Kafwilishitina. Malweli amo atumiwile kukwenu nimwenu naku bamyene benu.

⁵ Mu ku fwanina kubumba eye mikalahabi yenu na kubumba bampuku benu baya bali na kulobesha litunga lyenu, pe mu ku fwanina kulemeeka Nyambi wa Ishalela. Kampe ukaleha kumishushula hamo na banyambi benu na litunga lyenu.

⁶ Kati shumangani mu kukaluhishila mitima, ngonehe shiya atendele Fwalo na Baengepita? Hinga muvulama eshe Nyambi aba futwezele ngonehe betabilishile Baishalela ngayi bafume mu Engepita.

⁷ Nohobene wahishenu shikocikala shashipya na zingombe zibili zabitole ziya zabula kumangiwa ku mpongoho, zimangilenu ku shikocikala pe mubweshe bana bazo ku mulaka.

⁸ Shimbenu Likwati lya Kulimama kwa Nyambi ya Ngula, muliyake mu shikocikala, pe mutenteke bifwekesha bya kubumba bya ngolinde biya mu kutwala kukwendi ku likwati, kwinga ntupu ya kuyumba ha wubi wenu. Funzulenu shikocikala shalyo pe shilehenu shiye ninkayasho.

⁹ Lipenzesheshenu, ndi nilyo likululumana na kulumba ku munzi wa Mbeti Shemeshi, eshe shikatontoloka ngayi nengi Nyambi wa Baishalela, ou unatumu makando akukomokesha hahetu. Ngoboni ndi kaliha noho, niho tukalimuke ngayi kaliha niye watutumina awa malweli, niwo alizila tuhu.”

¹⁰ Nibo bashimbile zingombe zabitole zibili pe bazimangile ku shikocikala na ku shinkilila bana bazo mu mulaka.

¹¹ Bayakile Likwati lya Kulimama lya Nyambi ya Ngula mu shikocikala, hamo na likwati omu mwekalilenga bifwekesha bya kubumba bya ngolinde bya mikalahabi na bampuku.

¹² Zingombe zabitole zayile shiwahe mu nzila ya kulumba ku Mbeti Shemeshi na kubula ku shanuka ku shilyo hinge ku shimoho, zayilenga na kukoloma. Bamyene mutanu ba Bafwilishitina bazikonkele kuka kumina naku nginza yaku Mbeti Shemeshi.

¹³ Haya bantu ba ku Mbeti Shemeshi batezelenga loto mu mukulo, babazumukile, ha ku mona Likwati lya Kulimama, pe batangalile na ku wahilila shikuma.

¹⁴ Shikocikala shezile ku mfuba ya mulume ukutumbiwa ngayi Yoshuwa, ou wekalilenga ku Mbeti Shemeshi, kuyo niko shemanine kunkumo ya limanya lyalinene. Pe bantu batabwele makwaliba a shikocikala, niho bazihile zingombe za bitole nakuzihokesha kwinga nkombela ya kuhokesha kuli Nyambi ya Ngula.

¹⁵ Niho Balevi bakatwile Likwati lya kulimama lya Nyambi ya Ngula likwati lyekalile na bifwekesha bya ngolinde mukati kalyo, pe babiyakile ha limanya. Niho bantu ba ku Mbeti Shemeshi bakombelelenga nkombela ya kuhokesha na zinkombela zamina kuli Nyambi ya Ngula.

¹⁶ Oho bamyene mutanu ba Bafwilishitina bamonene hibatenda eshe, pe babokele ku Ekiloni wowo mutena.

¹⁷ Eye niyo mikalahabi ya kubumba ya ngolinde batwalile Bafwilishitina kuli Nyambi ya Ngula kwinga ntupu yakwimanina wubi wabo, umo na umo ha zinkena zabo za Ashindondi na Ngaza na Ashikeloni na Ngati na Ekiloni.

¹⁸ Batumine kami bampuku ba ngolinde umo na umo ku zinkena eze zaleliwilenga ku bamyene mutanu ba Bafwilishitina na minzi nimwayo ya bipata na minzi ya kubula bipata. Limanya lyalinene lya mu mfuba ya Yoshuwa waku Mbeti Shemeshi, haya batulilile Likwati lya Kulimama lya Nyambi ya Ngula, nihano niko lishili ngonehe wupaki waneshe shamonekele.

¹⁹ Nyambi ya Ngula wazihileho bantu makumi mutanu na abili ba ku Mbeti Shemeshi ndaba benangilile mu Likwati lya Kulimama. Bantu balilile ndaba Nyambi ya Ngula waletele mponde yayinene shikuma hakati kabo.

²⁰ Nohobene balume ba ku Mbeti Shemeshi bambile ngayi, “Kati yani ukutwesha kwimana ku meho a Nyambi ya Ngula, Nyambi wa kuyela? Kati tukayitwala kuli yani twayifumisha kuno kukwetu?”

²¹ Batumine bantumwana ku bantu ba ku Kiliyati Yeyalima na kubatongweza ngayi, “Bafwilishitina banabweshe Likwati lya Kulimama lya Nyambi ya Ngula. Yekenu mulishimbe mulitwale oko kukwenu.”