1 Shamwele 5 - Libuka Lya Kuyela

Likwati lya Kulimama mukati ka Bafwilishitina

¹ Oho Bafwilishitina bapukulakale Likwati lya Nyambi, balifumishile ku Embeneza na kulitwala ku lukena lwabo lwa Ashindondi.

² Niho Bafwilishitina batwalile likwati mu litala lya Ndangoni nyambi yabo, pe balitentekele ku nkumo ya Ndangoni.

³ Oho kwashileko lumenemene, bamu Ashindondi bamonene ngayi kanankishi ka Ndangoni kanawu kufulumana lupala hinga lwa kinka hanci kumbili ya Likwati lya Kulimama kwa Nyambi ya Ngula. Bakakatwilemo, niho bakabweshele mu mwanya wako.

⁴ Oho kwashileko lumenemene kami, bamonene ngayi kanankishi kanawili hanci kumbili ya Likwati lya Nyambi. Ha shikati eshe, mutwe wako na maboko wako nimwabyo byapokozokele, nimwabyo byapyukwamine mu shipana, ndele tuhu lutu lwa Ndangoni nilwo lwashalileko.

⁵ Shiya nisho shuma hinge ku mutena walelo, bakankombela ba Ndangoni na bakakumulemesha nimwabo mu Ashindondi kaliha bakilukanga mwanya uyo hinge kuwu lyata.

⁶ Nyambi ya Ngula washushwile bantu ba ku Ashindondi shikuma, pe wabatinishile. Washushwilile kumo na bantu ba hahepi na Ashindondi na kubatutulukisha na mikalahabi.

⁷ Oho bantu ba ku Ashindondi bamonene ebye byatendiwilenga, bambile ngayi, “Nyambi wa Ishalela unatushushulu na nyambi yetu Ndangoni. Kutwesha kami kutenteka Likwati lya Kulimama kuno tufwako.”

⁸ Nohobene batumine bantumwana mukwihana bamyene nimwabo hamo ba Bafwilishitina pe babepwile ngayi, “Kati tukutenda nahiti na Likwati lya Kulimama kwa Nyambi wa Ishalela?” Nibo bakumbwile ngayi, “Litwalenu ku Ngati.” Nohobene balitwalile ku Ngati, lukena lwamina lwa Bafwilishitina.

⁹ Ngoboni oho lyakakumineko, Nyambi ya Ngula washushwile kami luya lukena, pe waletele kampwe kakanene shikuma. Wabashushwile na mikalahabi eye yatutulukile ha bantu nimwabo bamu lukena, batwanuke hamo na bakulwane.

¹⁰ Nohobene batwalile kami Likwati lya Kulimama ku Ekiloni, lukena lwamina lwa Bafwilishitina, ngoboni oho lyakakumineko, bantu bakalokele ngayi, “Banatuletele Likwati lya Kulimama kwa Nyambi wa Ishalela kuno ngayi mwanga nimwetu batuzihe.”

¹¹ Nohobene behanine kami bamyene ba Bafwilishitina nimwabo pe bambile ngayi, “Bweshenu Likwati lya Kulimama kwa Nyambi wa Ishalela ku mwanya walyo oku lyafumine, ngayi mwanga libule kutuziha na ba lupashi lyetu.” Kwekalile kampwe mu lukena nimwamo ndaba Nyambi wabashushwile shikuma.

¹² Hinge noho baya babulile kufwa bazimbile mikalahabi, pe kulila kwabo muluya lukena kwakakumine muyilu.