1 Shamwele 30 - Libuka Lya Kuyela

Nzita ya kulwisha Baamaleki

¹ Ha mutena wawuhatu Ndavita na bantu bendi bakumine ku Zikilangi. Baamaleki balwishile Yunda ku mabukubuku, balwishile kami Zikilangi. Pe bawukomene niho bawuhokeshele,

² pe bapukwile bambuyama nimwabo kaliha bazihile hinge muntu umo, bashimbile bantu nimwabo batwanuke na bakulwane na kuya nabo okwo bayile.

³ Oho Ndavita na bantu bendi bakumine bawanine ngayi munzi unahokeshiwi, kami bakazabo na bana babo babalume nanaba babambuyama banatwaliwi mu wuntapwa.

⁴ Ndavita na bantu bendi batatikile kulila, kaliha bamwenene kutwala na ha kuhopoka mu zinyutu.

⁵ Hingebene bakaza Ndavita babili, ba Ahinoma ba ku Yezilelu na Ambingelu, batwaliwile mu wuntapwa.

⁶ Ndavita wekalile mu wukalu wawunene shikuma, ndaba bantu bendi nimwabo bapilamine shikuma ha kuyawa bana babo, pe bamufumbilile ngayi bamupuhe mamanya, ngoboni Ndavita washuminine muli Nyambi ya Ngula, Nyambi yendi.

⁷ Ndavita wambile kuli mukankombela Ambiyatale mwana Ahimeleki ngayi, “Ndeteleko kakobelo kakepi kashizila.” Niho Ambiyatale wakaletele kuli Ndavita.

⁸ Ndavita wepwizizile Nyambi ya Ngula ngayi, “Kati shikutwesheka ngayi nikonke baya bakanzita ndi? Nikatwesha kubawana ndi?” Nyambi ya Ngula wakumbwile ngayi, “Yanga ubakonke, pe ukalamwina bantapwa.”

⁹ Nohobene Ndavita na bantu bendi 600 bakatukile na kuya, oho bakakumine ku kashinzi ka Mbesholi, bamo kukwabo bashalile kuyo.

¹⁰ Ndavita wapitakanishile kubakonka na bantu bendi 400, bamina 200 bakwangile shikuma, kaliha batweshele kuzabuka kashinzi pe niho bashalile kuyo.

¹¹ Bantu ba Ndavita bawanine ndumbana wa Kaengepita ha nzila niho bamuletele kuli Ndavita. Bamupanikile byakulya na mema,

¹² na nkuyu zimo za kuyanika na mahozozo abili a mikabo ya kuyuma ya shinyanca. Oho amanishile kulya, wapwezulukile, ndaba kwapitile matena ahatu anzimba na kubula kulya hinge kunwa.

¹³ Ndavita wamwipwile ngayi, “Kati hekulyobe yani, kami wafuma kuti?” Wakumbwile ngayi, “Nili Kaengepita, ndungo wa Kaamaleki. Hekulyami wanciya munyima ndaba ya kukola, kwapitakale matena ahatu.

¹⁴ Twalwililile mu litunga lya Bakeleta ku mabukubuku a Yunda namu litunga lya livumo lya Kalembu, pe niho twahokeshele Zikilangi.”

¹⁵ Ndavita wamwipwile ngayi, “Kati ukutwesha kuntwaminina ku baya bakanzita ndi?” Wakumbwile ngayi, “Nikutwesha ndi ukalibeza mu lizina lya Nyambi ngayi kukanziha wufwako hinge kumpanika kuli hekulyami.”

¹⁶ Niho atwamininine Ndavita kukwabo. Pe bakanzita balipanzanishilile ku zimbalila nimwazo, balilenga na kunwa na ku shinda ndaba ya wingi wa lipuku elye bakapukwile ku Fwilishitina na Yunda.

¹⁷ Oho kwashile malungashiku Ndavita wabalwishile kukuma na ku mazolo. Kowa ou wapanzile ndele tuhu bandumbana 400 baya bakandamine ha bakamela nibo betukile.

¹⁸ Ndavita walamwinine bantu nimwabo na byuma nimwabyo bashimbile Baamaleki, kuyakaho na bakazendi babili.

¹⁹ Kowa shuma shabulileho, Ndavita wabweshele bana ba bantu bendi babalume na ba bambuyama nimwabo na lipuku nimwalyo liya bashimbile Baamaleki.

²⁰ Wabweshele kami matanga a bimuna nimwawo a zingombe na bambelele. Bantu bendi batwalile matanga nimwawo kumbili yabo, pe bambile ngayi, “Ebye binengi bya Ndavita.”

²¹ Niho Ndavita abokele ku bantu 200 baya bakwangile kuya ndaba yakupopa, pe bashalile ku kashinzi ka Mbesholi. Bezile mu kushimbawila Ndavita na bantu bendi, pe Ndavita wayile kukwabo na kubashangwisha.

²² Ngoboni bantu bamo bababi na bantu bowa, aba bayile na Ndavita, bambile ngayi, “Aba babulile kuya nanetu, kubapanikako ku bya lipuku tufwako. Bakutwesha kushimba tuhu bakazabo na bana babo, pe hiba kuya.”

²³ Ngoboni Ndavita wakumbwile ngayi, “Bawushinda wami, kutwesha kutenda noho mufwako nanebye anatupaniki Nyambi ya Ngula Watulamine shiwahe na kutupana ngovu za kukoma bakanzita.

²⁴ Yani ukutwesha kwitabila kunebye mukwamba. Nimwabo ba ku fwanina kutambula shitapilo shimo nanou washalile na kulama biyeko uku fwanina kuwana shitapilo hamo na muntu ou wayile ku nzita.”

²⁵ Ndavita washitendele kwinga ndayano, ziya bakonkelenga mu Ishalela shikati nimwasho kuleta na kulelo.

²⁶ Oho Ndavita abokele ku Zikilangi, watumine bimo bya lipuku ku bahoni bendi, bakakutwaminina ba Yunda na mazu akwamba ngayi, “Enu bakakutwaminina Bayunda shishemo shenu osho shikwiza sha ku lipuku twakashimbile ku bamalamo ba Nyambi ya Ngula.”

²⁷ Walitumine ku bantu bamu Mbetele naku bantu bamu Lamoti ku mabukubuku a Yunda naku bantu bamu minzi yamu Yatiya,

²⁸ naku Aloya naku Shifwimoti naku Eshitemowa,

²⁹ naku Lakali naku mavumo a Yelashamela naku minzi ya Bakenita,

³⁰ naku bantu ba ku minzi ya Homa na Mbolashani na Ataki,

³¹ na Hembuloni. Walitumine ku myanya nimwayo oku Ndavita ayilenga na bantu bendi na kuyambangila.