1 Shamwele 3 - Libuka Lya Kuyela

Nyambi ya Ngula ukuliholola kuli Shamwele

¹ Ha matena ayo, oho kanuke Shamwele atendelelenga mulimo Nyambi ya Ngula mu kufundiziziwa kwa Eli, kwezilenga tuhu mazu amashe kufuminina kuli Nyambi ya Ngula na bimonekesho byabishe.

² Hashikati shamina wushiku Eli, oho ashingile kwinga kashishitwa, walanganine ha wulili wendi,

³ Shamwele walanganinenga mu mwanya wakuzila, omu mwekalilenga Likwati lya Kulimama. Oho shilolo kushe, kuwana lumuni lwa Nyambi lushili kubanga,

⁴ Nyambi ya Ngula wehanine Shamwele. Shamwele wakumbwile ngayi, “Ingoi, hekulu!”

⁵ Niho etukilile kuli Eli, pe wambile ngayi, “Ami uno na kumakale, ou unehananga.” Ngoboni Eli wakumbwile ngayi, “Kukwihana nifwako, boka ukalale ha wulili.” Nohobene Shamwele wabokele mu kulala.

⁶ Nyambi ya Ngula wehanine Shamwele kami ngayi, “Shamwele.” Shamwele wapindukile niho ayile kuli Eli, pe wambile ngayi, “Ami uno na kumakale, ou unehananga.” Eli wakumbwile ngayi, “Kukwihana nifwako, mwanami, boka tuhu na kulala.”

⁷ Haya Shamwele kaliha walimukile ngayi Nyambi ya Ngula niye wamwihaninenga, ndaba niho ha kutatika, hinga atanga Nyambi ya Ngula kuliholola kukwendi.

⁸ Nyambi ya Ngula wehanine Shamwele shikati sha wuhatu. Wapindukile wayile kuli Eli, pe wambile ngayi, “Ami uno na kumakale, ou unehananga.” Niho Eli ayuvwishishile ngayi wengile Nyambi ya Ngula, ou wehaninenga ndumbana.

⁹ Nohobene Eli wambile kukwendi ngayi, “Boka ukashendame, ndi ukukwihana kami, pe wambe ngayi, ‘Amba obe Nyambi ya Ngula, mukamulimo wobe unakuyuvwilila.’” Nohobene Shamwele wabokele mu kushendama.

¹⁰ Nyambi ya Ngula wezile na kwimana kuyo, wehanine ngonehe ehaninenga ha kutatika ngayi, “Shamwele! Shamwele!” Shamwele wakumbwile ngayi, “Ambanga, mukamulimo wobe uli na kuyuvwilila.”

¹¹ Nyambi ya Ngula wambile kukwendi ngayi, “Mona, wuluno na kutenda shuma shimo sha kutinisha ku bantu ba Ishalela ngayi bantu nimwabo aba bakayuvwasho bakafwa nzukwa.

¹² Ha mutena uyo nikatenda mafumbila wami nimwawo a kulwisha balupashi lwa Eli kufuma kumabalikilo kutwala naku mamaninino.

¹³ Ninamutongweze ngayi, nikashushula ba lupashi lwendi mwaya myaka ndaba bana bendi babalume bahandulanga ami Nyambi ya Ngula. Eli walimukile ngayi batendelenga eshe, ngoboni kaliha wabakanishilenga.

¹⁴ Nohobene nikubeza na kwamba ku ba lupashi lwa Eli ngayi kukekala nkombela hinge ntupu bikatwesha kufumisha malwa a nokwe Kubipisha kwa kutinisha kufwako.”

¹⁵ Shamwele wekalile ha wulili kutwala naku lumenemene. Niho apindukile pe washinkwilile bihala bya ku Litala lya Nyambi ya Ngula. Watinine kutongwezako Eli ha shimono eshe.

¹⁶ Eli wamwihanine ngayi, “Shamwele, mwanami!” Shamwele wakumbwile ngayi, “Ami uno hekulu.”

¹⁷ Eli wamwipwile ngayi, “Ebye anakutongwezenga Nyambi ya Ngula bishini? Hinga uholeka shuma shimo. Nyambi ukakushushula shikuma, ndi ukukana kuntongwezako byuma nimwabyo anamba.”

¹⁸ Nohobene Shamwele wamutongwezele byuma nimwabyo, kaliha waholekele hinge shuma shimo. Eli wambile ngayi, “Unengi Nyambi ya Ngula, leha atende shifungo shendi.”

¹⁹ Nyambi ya Ngula wekalile na Shamwele ha kukula kwendi, kami byuma nimwabyo ambilenga Shamwele byamonekelenga.

²⁰ Nohobene bantu ba Ishalela nimwabo, ku balika kunkumo ya litunga lya Ndani kukuma na kunkumo yamina ku Mbelishemba, balimukile ngayi mwa shikuma Shamwele wengakale muluwe wa Nyambi ya Ngula.

²¹ Nyambi ya Ngula wazaminine kuliholola niyemwine ku Shilo, kuyo walimonekeshele kuli Shamwele niho ambile nendi.