1 Shamwele 28 - Libuka Lya Kuyela

¹ Oho kwapitile shikati Bafwilishitina balobalobele bakanzita babo mu kulwisha Ishalela. Pe Akishi wambile kuli Ndavita ngayi, “Limuka ngayi obe na bantu bobe mukalwila ku mbalila yami.”

² Ndavita wakumbwile ngayi, “Mwa shikuma, ami nili mukamulimo wobe, kami ukalimonena obemwine eshe nikutwesha kutenda.” Akishi wambile ngayi, “Shashiwahe, ami nikakwingisha mukakundama mu kuyoya kwami.”

Shaulu ukwipula Mbuki

³ Oho Shamwele afwile, pe bana Baishalela nimwabo bamulilile, bamufundile mu munzi wendi mu Lama. Shaulu oho watandakale bakakukwata bapashi nimwabo na bakakutaha mu Ishalela.

⁴ Bakanzita ba Bafwilishitina bakungulukile na kutulila hahepi na munzi wa Shunema, pe Shaulu wakungwile bana Baishalela na kutulila ku Lipili lya Ngilimbowa.

⁵ Oho Shaulu amonene bakanzita ba Bafwilishitina watinine shikuma.

⁶ Pe wanyepele kuli Nyambi ya Ngula mwa kutendela. Ngoboni Nyambi ya Ngula kaliha wamukumbwile hinge ku mulo hinge kutendesha Ulimu na Tumimi, hinge na miluwe bendi.

⁷ Niho Shaulu atongwezele babilolo bendi ngayi, “Ncingilenu mbuyama mukakwawula mwanga nikayeko na kumwipwiziza.” Bamukumbwile ngayi, “Kuli umo ku Endola.”

⁸ Nohobene Shaulu walihongwezele na kuvwala bivwalo byashenge. Oho kwashipile muya bwii wayile na balume babili mu ku mona uya mbuyama. Shaulu wambile kukwendi ngayi, “Nyipwizizile ku mutalu akutongweze ebye bikatendiwa ha lizina.”

⁹ Mbuyama wakumbwile ngayi, “Mwa shikuma mu kulimuka ebye atendele mwene Shaulu, oho atandile bakakukwata bapashi na bakakutaha mu Ishalela. Shumangani mukushinga ku manyikila kanyimbwa ngayi munzihe?”

¹⁰ Niho Shaulu abezele mbeza za shizila ngayi, “Mu lizina lya Nyambi ya Ngula wakuyoya nikulibeza ngayi obe kukashushuliwa wufwako ha kutenda eshe.”

¹¹ Mbuyama wepwile ngayi, “Kati nikakwihanina yani?” Wakumbwile ngayi, “Nyihanine Shamwele.”

¹² Oho mbuyama amonene Shamwele wakalokele shikuma na kwamba kuli Shaulu ngayi, “Shumangani ukunyongezela? Nka obe Mwene Shaulu!”

¹³ Mwene wambile kuli mbuyama ngayi, “Hinga utina. Kati shumangani eshe uku mona?” Mbuyama wakumbwile ngayi, “Namono mutalu hafuma hanci.”

¹⁴ Shaulu wepwile kami ngayi, “Kati shifwekesha shendi sha nahiti?” Mbuyama wakumbwile ngayi, “Nengi kakulukazi wa mulume uli na kuvumbuka. Unavwala shikobelo shashitali.” Niho Shaulu alimukile ngayi kati unengi Shamwele, pe wanyongaminine hanci na maleema.

¹⁵ Shamwele wambile kuli Shaulu ngayi, “Shumangani unanyingishili lumpa? Shumangani unambweshelemo?” Shaulu wakumbwile ngayi, “Nili mu wukalu wawunene shikuma. Bafwilishitina bali hahepi na kundwisha, pe Nyambi unamfutamini. Kami kunkumbula afwako, hinge na bamiluwe bendi hinge mu milo. Pe ninakwihana ngayi untongweze eshe niku fwanina kutenda.”

¹⁶ Shamwele wambile ngayi, “Shumangani boni unanyihanini munyima ya kukufutamina kuli Nyambi ya Ngula na kwinga kamalamo wobe?

¹⁷ Nyambi ya Ngula unatende kukwobe eshe akutongwezele kupitila mumwami ngayi, unakuyangulu wene na kuwu panika kuli Ndavita.

¹⁸ Obe wabulile kwombatala ndayano za Nyambi ya Ngula, pe kaliha wanongeshele Baamaleki na nimwabyo ebye bekalile nabyo. Eshe nisho shinaleteshe ngayi Nyambi ya Ngula atende nehe kukwobe.

¹⁹ Nyambi ya Ngula ukakupanika hamo na Baishalela mu maboko a Bafwilishitina. Obe na bana bobe tukaliwana na nami nzona mu kalunga ka bafu, pe Nyambi ya Ngula kami ukapana bakanzita ba Ishalela ku Bafwilishitina.”

²⁰ Hohobene Shaulu walilambwile hanci ngumbanga. Niho alalile hanci hinga a tandabala. Wekalile na bowa hanebye ambile Shamwele. Wapopele, ndaba kaliha walile sha kulya hinge shimo ha mutena uyo na wushiku nimwawo.

²¹ Mbuyama wayile kuli Shaulu pe wamonekele ngayi unatinishiwi, nohobene niye wambile kukwendi ngayi, “Nalihupwiza wumi wami ha kutenda ebye wanyepele, obe hekulu.

²² Haya tenda eshe na kukunyepa obe hekulu, leha taha nikutendeleko byakulya, ndaba unafwanini kulya ngayi mwanga wikale na ngovu za kwenda.”

²³ Shaulu wakanine niho ambile ngayi, “Kushinga kulya shuma shamina nifwako.” Ngoboni babilolo bendi bamukandikizile kulya. Oho ayuvwileko, wapindukile hanci niho akalile ha wulili.

²⁴ Wanguwangu mbuyama wazihile ka nkunzi ka ngombe kakushuwa aka alelelenga. Niho ashimbile muhunga, wawuvubile niho ayohele mankende a kubula mumena.

²⁵ Niho atulile byakulya kumbili ya Shaulu na babilolo bendi, pe balile. Niho bakatukile na kuya wawuyo wushiku.