1 Shamwele 27 - Libuka Lya Kuyela

Ndavita mukati ka Bafwilishitina

¹ Ngoboni Ndavita walyambishile niyemwine ngayi, “Mutena umo Shaulu ukeza mu kunziha. Shuma shashiwahe niku fwanina kutenda kwitukila ku Fwilishitina, pe Shaulu ukakwanga sha kuncinga mu Ishalela, kami nikekala shiwahe.”

² Niho Ndavita na bantu bendi 600 bakatukile, bayile kuli Akishi mwana Mawoka wa mulume, ou wengile mwene wa Ngati.

³ Ndavita na bantu bendi bekalile na Akishi mu Ngati, muntu na muntu na ba lupashi lwendi. Ndavita wekalile na bakazendi babili Ahinoma waku Yezilelu na Ambingelu mfwile wa Nambalu waku Kamela.

⁴ Oho Shaulu ayuvwile ngayi Ndavita unashilili ku Ngati, walehele kumushinga.

⁵ Niho Ndavita ambile kuli Akishi ngayi, “Hekulu ndi wancinga, shashiwahe umpeko munzi umo wawushe nikekalemo, ndaba shumangani ndungo yobe akwikalila hamo na nobe mwene muno mu lukena lwalunene?”

⁶ Nohobene Akishi wamupanikile munzi wa Zikilangi, pe kufuma haya Zikilangi wengile hiwa bamyene ba Yunda kuleta na mutena walelo.

⁷ Ndavita wekalile mu litunga lya Bafwilishitina mwaka umo na zingonda zinaa.

⁸ Ha shikati shiyo Ndavita na bantu bendi balwishilenga bantu bamu Ngeshula na Ngilizi na Amaleki, aba bazikilenga mu litunga shikati shashitali. Wayilenga na kulwa mu litunga lyabo kukakuma naku Shula, mu litunga lya Engepita.

⁹ Ndavita wazihilenga balume nimwabo na bambuyama, kami washimbilenga bambelele na zingombe na bambongolo na bakamela na makwiza. Niho abokelenga nabyo kuli Akishi.

¹⁰ Oho Akishi amwipwilenga ngayi, “Bayani aba waya na kupukula lelo?” Pe Ndavita wamukumbwilenga ngayi, “Naya na kulwisha ba ku mabukubuku a Yunda, hinge ba livumo lya Yelahamela hinge ku litunga oku bazikilenga Bakenita.”

¹¹ Ndavita wazihile bantu nimwabo, balume na bambuyama, ngayi mwanga kukabule muntu wakubokela ku Ngati mu kushimika ebye anatende na bantu bendi. Eshe nisho atendelenga Ndavita shikati nimwasho ekalilenga mu litunga lya Bafwilishitina.

¹² Ngoboni Akishi wakulupilile Ndavita, pe walyambishile ngayi, “Ndavita unazimbiwi ku bantu bendi Baishalela shikuma, pe ukantendelanga mulimo mu kuyoya kwendi nimwako.”