1 Shamwele 26 - Libuka Lya Kuyela

Ndavita ukutetelela kami wumi wa Shaulu

¹ Niho bantu bamina ba ku Zifu bezile kami kuli Shaulu ku Ngimbiya pe bamutongwezele ngayi Ndavita waholamanga ha lipili lya Hakila, lyaliyahikiza na Yeshimoni.

² Hohobene Shaulu wayile na bakanzita 3,000 babawahe ba Ishalela ku libelelengwa lya Zifu mukushinga Ndavita.

³ Shaulu watulilile ha lipili lya Hakila kunkumo ya nzila hahepi na Yeshimoni. Ndavita oho ushili mu libelelengwa, pe wayuvwile ngayi Shaulu unezi na kumushinga.

⁴ Ndavita watumine bakakuhokela, pe bawanine ngayi mwa shikuma Shaulu niko ali.

⁵ Hohobene Ndavita wayile mu kumoneshesha mwanya uyo balanganine ba Shaulu na Ambina mwana Nela wa mulume, mukulwane wa nzita ya Shaulu. Shaulu walalile mukati ka munkungwa, pe bantu bendi batulile hinga bamuzinguluka.

⁶ Niho Ndavita epwile Ahimeleki wa Kahita na Ambishayi yayiyendi Yowambu bana ba Zeluya ngayi, “Kati yani hakati kenu babili ou nikuya nendi ku munkungwa wa Shaulu?” Ambishayi wakumbwile ngayi, “Ami nikuya nobe.”

⁷ Nohobene wushiku uyo Ndavita na Ambishayi benginine mu munkungwa wa Shaulu pe bawanine Shaulu hinga alangana mukati ka munkungwa, mulinga wendi wawuzikile hanci kwakwipi na mutwe wendi. Ambina na bakanzita bendi balalile hinga bazinguluka Shaulu.

⁸ Niho Ambishayi ambile kuli Ndavita ngayi, “Nyambi unayaka kamalamo wobe mu maboko wobe lelo. Haya ndehe nimushwange tuhu kamo na mulinga wendi mampulwa na hanci, kumushwanga kawubili nifwako.”

⁹ Ngoboni Ndavita wambile kuli Ambishayi ngayi, “Kaliha unafwanini kumuziha. Mwa shikuma Nyambi ya Ngula ukashushula nimwendi ou ukuziha mwene wendi wakuwabishiwa.”

¹⁰ Niho Ndavita ambile kami ngayi, “Ngonehe Nyambi ya Ngula akuyoya, nikulimuka ngayi Nyambi niyemwine ukaziha Shaulu, hinge ndi shikati shendi sha kufwa shakakuma, hinge oho akaya ku nzita pe niko akafwila.

¹¹ Nyambi ya Ngula ankanishe kwezeka kuziha muntu ou awabishile Nyambi ya Ngula kwinga mwene. Ngoboni tushimbe tuhu mulinga wendi na ntesho yendi ya mema, pe tuyenga.”

¹² Nohobene Ndavita washimbile mulinga na ntesho ya mema ku mutwe wa Shaulu, niho bayile. Kowa muntu watoshele hinge kulimuka eshe shatendiwile hinge ku tampuka ha tulo, nimwabo bahoyokele mu tulo hoyoo, ndaba Nyambi ya Ngula wabalalikile tulo twatunene shikuma nimwabo.

¹³ Niho Ndavita ayile mbalila yamina ya mukulo hayilu ya lipili, mukala wa kantabule.

¹⁴ Ndavita wabilikizile ku bakanzita ba Shaulu na kuli Ambina ngayi, “Obe Ambina mwana Nela, ukutwesha ku nyuvwa ndi?” Ambina wayipwile ngayi, “Kati obe yani ukuletela mwene miyoyo na kumutonesha?”

¹⁵ Ndavita wambile ngayi, “Obe Ambina, kati kaliha obe wamunene shikuma mu Ishalela ndi? Kati shumangani wabula kulama hekulyobe mwene? Sha wuluno muntu umo unezi mu munkungwa mu kuziha hekulyobe.

¹⁶ Obe Ambina, shuma eshe unatende kaliha shinawaha. Ami nikubeza na Nyambi ya Ngula wakuyoya ngayi nimwenu shinamifwanini kufwa, ndaba mwabulile kukoweza hekulyenu, ou awabishile Nyambi ya Ngula kwinga mwene. Mona, kati mulinga wa mwene uli kuti? Kati ntesho ya mema iya yekala kwakwipi na mutwe wendi yili kuti?”

¹⁷ Shaulu walimukile lizu lya Ndavita pe wepwile ngayi, “Kati obe mwanami Ndavita ndi?” Ndavita wakumbwile ngayi, “Ingoi, hekulyami.”

¹⁸ Pe wambile kami ngayi, “Hekulu, shumangani ushili kuntandila ami mukamulimo wobe? Kati natende bishini? Nili na mulandu ngani?

¹⁹ Yuvwilila kunebye nikwamba hekulyami. Ndi mwa shikuma nengi Nyambi ya Ngula ou wakuleteshe ngayi undwishe, pe mwanga atambule ntupu. Ngoboni ndi bantu banashitende, benge ba shikuto ku meho a Nyambi ya Ngula, ndaba banantanda mu litunga lya Nyambi ya Ngula na kuntandila ku litunga oku balemeshanga tuhu banyambi bashenge.

²⁰ Hinga mwitabila ngayi nizihiwile ku limvu lya bantu bashenge, kwakutali na litala lya kulemeshela Nyambi ya Ngula. Shumangani mwene wa Ishalela akwizila mu kuziha ami lubalebale na kunyomba ngo kayoni ka mu lishaka?”

²¹ Niho Shaulu akumbwile ngayi, “Nabipishi, boka kuno mwanami Ndavita, kuka kulemeka kami nifwako, ndaba unatetelele wumi wami wushiku wa lelo. Nengile wakuyeba, Natende shuma sha kutengama shikuma.”

²² Ndavita wakumbwile ngayi, “Mulinga wobe uno, hekulu, tumaho umo ha bantu bobe eze kuno awushimbe.

²³ Nyambi ya Ngula ukupana ncuungu tuhu baya banengi bakulunga na kwoloka. Lelo Nyambi ya Ngula unakuyaka mu maboko wami, ngoboni kaliha nakuziha obe mwene wakuwabishiwa kuli Nyambi ya Ngula.

²⁴ Ngonehe natetelele wumi wobe lelo, Nyambi ya Ngula mwanga atetelele wumi wami na kumpulwisha ku makando nimwawo.”

²⁵ Niho Shaulu ambile kuli Ndavita ngayi, “Nyambi akutandalishe, mwanami. Ukenga wakutwesha mu byuma nimwabyo ukatenda.” Nohobene Ndavita wayile mu nzila yendi, pe Shaulu wabokele ku munzi.