1 Shamwele 25 - Libuka Lya Kuyela

Lufu lwa Shamwele

¹ Ha kufwa kwa Shamwele, Baishalela nimwabo bakungulukile hamo, pe bamulilile. Niho bamufundile mu Lama mu munzi wendi. Munyima yanebye, Ndavita wayile ku libelelengwa lya Palani.

Ndavita na Ambingelu

² Mu Mawoni mwekalile mulume, ou wekalile na wuheti mu Kamela, pe wengile muntu wakuheta shikuma. Wekalile na bampongo 1,000 na bambelele 3,000. Washehelenga wushako wa bambelele bendi mu Kamela.

³ Lizina lyendi wengile Nambalu waku mukoka wa Kalembu, mukazendi wengile Ambingelu. Mbuyama wengile wamuwahe shikuma kami wakushangama, ngoboni mulume wengile muntu wowa wakapilamina.

⁴ Oho Ndavita ayuvwile ngayi Nambalu washehelenga bambelele bendi,

⁵ watumine bandumbana likumi ngayi, “Yenunga ku Kamela mukamone Nambalu, pe muka mu ncangwishile.

⁶ Wa bafundizizile sha kwamba kuli Nambalu ngayi, ‘Ndavita unakutumini shangwe, obe muhoni wendi na ku shangwishi shikuma na mate ha mutima na ba lupashi lyobe na nimwabo baya banengi bobe.

⁷ Nayuvwa ngayi uli na ku sheha bambelele bobe. Oho balishani bobe bekalile nanetu, ha bikati nimwabyo bekalilenga ku Kamela kaliha twabalemekele, kami kowa shuma shabo shayibiwile.

⁸ Bepule taha, pe bakakutongweza. Ndavita unakunyepe ngayi ututambule shiwahe na nceshe, ndaba tunezi ha shikati sha shimbo. Hekulu tupanike eshe ukutwesha kutupana etu bakamulimo bobe na kuli mwanobe Ndavita.’”

⁹ Bantu ba Ndavita batwalile awa mazu kuli Nambalu mu lizina lya Ndavita, pe niho bekalile na kutatilila.

¹⁰ Nambalu wakumbwile bakamilimo ba Ndavita ngayi, “Ndavita kati unengi yani? Mwana Njeshe unengi yani? Litunga linenzala na bandungo bakakutina ku bahekulyabo ano matena.

¹¹ Kukapana mankende wami na mema na bimuna aba napunwini bakakusheha bambelele bami nifwako, kowa kubipanika ku bantu aba nabula kulimuka oku bafuma.”

¹² Bantu ba Ndavita babokele kukwendi pe bamutongwezele ebye ambile Nambalu.

¹³ Ndavita wambile ngayi, “Homekenu mikwale yenu.” Pe nimwabo batendele noho, Ndavita kami wahomekele mukwale wendi, pe wayile na bantu bendi 400, washiyileho bantu 200 baya bengile bakakulama biyeko.

¹⁴ Ngoboni muntu umo ha bakamilimo ba Nambalu watongwezele Ambingelu mukaza Nambalu ngayi, “Ndavita ku libelelengwa watuma bantumwana na kushangwisha hekulyetu, ngoboni wabatukanine.

¹⁵ Ngoboni twekalile nabo shiwahe, kaliha batuyandishilenga, kami shikati nimwasho osho twekalilenga nabo mu mafuba, kowa shuma shetu shayibiwile.

¹⁶ Batulaminenga wushiku na mwaana shikati nimwasho osho twekalilenga nabo ha kulama matanga wetu.

¹⁷ Ngoboni hekulu, hanganika haneshe na ku mona mwa kutendela. Eshe shikatwesha kwinga malamo kuli hekulyetu na ku ba lupashi lwendi nimwalwo. Mutwe wendi wawukalu, pe kuyuvwilila ku muntu nimwendi wufwako.”

¹⁸ Niho Ambingelu anyankupile kulongalonga mipumpa 200 ya mankende na bikumba bibili bya waine na nyama ya kuyoha ya bambelele mutanu na tukote tubili twa mbuto ya mpeka ya kuyoha na mahozozo 100 a mikabo ya shinyanca sha kuyanika, kami mankende 200 a nkuyu za kuyuma, pe babitwikile ha bambongolo.

¹⁹ Pe wambile ku bakamilimo ngayi, “Yenungaho kumbili yami, pe nikamikonka.” Ngoboni Nambalu mukokwendi kaliha wamutongwezele.

²⁰ Niho Ambingelu akandamine ha mbongolo wendi na kwongoloka lipili, balihanganine na Ndavita na bantu bendi hibeza.

²¹ Haya Ndavita wambile ngayi, “Shumangani nalaminanga wuheti wa uya muntu muno mu libelelengwa? Kowa shuma shendi hinge shimo shayibiwile, ngoboni unabweshele wubi ku wuwahe.

²² Nyambi mwanga atende eshe kukwami nifwe, ndi kuziha aba bantu nimwabo nifwako, oho shilolo kushe.”

²³ Oho Ambingelu amonene Ndavita, wanyankupile ku shuluka ha mbongolo na kufunkama ku lupala lwendi hanci,

²⁴ ku maulu a Ndavita, pe wambile kukwendi ngayi “Nyuvwilile taha, obe hekulu. Shihepwa shikale kukwami.

²⁵ Hekulu, hinga utwala mutima kuli Nambalu, uya wabula nomu ekalila. Eshe nisho shikutontoloka lizina lyendi, mwa shikuma wakuyeba. Ami kaliha nekalileko oho watumine bakamulimo bobe obe hekulu.

²⁶ Wuluno haya, Hekulyami, Nyambi ya Ngula unakukanishi kubweshela wubi ku wubi na kuziha bamalamo bobe. Haya nikubeza kukwobe na Nyambi ya Ngula wakuyoya ngayi bamalamo bobe na nimwabo aba bakushinga kukulemeka bakashushuliwa ngonehe Nambalu.

²⁷ Hekulu, tambula liyumbu elye nalete, mwanga upanike bakamilimo bobe balye.

²⁸ Obe hekulu, yatila wubi wa ndungo yobe. Nyambi ya Ngula ukukwinga mwene, ndaba unalu zinzita zendi, pe kukatenda shuma sha shibi mu kuyoya kwobe wufwako.

²⁹ Ndi muntu umo ukukulwisha na kushinga kukuziha, Nyambi ya Ngula, Nyambi yobe, ukakulama shiwahe ngonehe muntu alamanga wuheti wa ndando yayinene. Neheboni bamalamo bobe, ukabapuhila kwakutali ngonehe muntu apuhanga mamanya na lekeni.

³⁰ Oho Nyambi ya Ngula watendakale kukwobe byuma byabiwahe biya akukulupishile, kami ha kukwinga mwene wa Ishalela,

³¹ pe obe hekulu, kukayuvwa winga wufwako hinge kuliyakata, aha wabulile kuziha wakubula mulandu, hinge kubweshela wubi ku wubi obemwine. Oho Nyambi ya Ngula akakutandalisha hinga ukamvulama, obe hekulyami.”

³² Ndavita wambile kuli Ambingelu ngayi, “Yemeza Nyambi ya Ngula, Nyambi wa Ishalela, ou nakutumu lelo mu kulyambwilila na nami.

³³ Nakambilili kuli Nyambi ha ngana zobe zaziwahe naku neshe unatende lelo sha kunkanisha mulandu wakuziha mponde na kubweshela wubi ku wubi.

³⁴ Nyambi ya Ngula unankanishi kukulemeka. Ngoboni mu kulibeza kuli Nyambi wa Ishalela wakuyoya, shinga wabula ku nyankupa kwiza mu kulyambwilila na nami na shikati sha lumenemene shinga bantu ba Nambalu nimwabo banazihiwi.”

³⁵ Niho Ndavita atambwile ebye aletele kukwendi pe wambile ngayi, “Boka ku munzi, hinga ulikekula, nikatenda eshe ukushinga.”

³⁶ Ambingelu wabokele kuli Nambalu, wamuwanine mu litala lyendi hatenda mayambwayambwa akwinga ngo a mwene. Nambalu wakolwele shikuma, kami wekalile mumpoza, pe kaliha wamutongwezele shuma shamina ndele kwashile kulumenemene.

³⁷ Oho akolwolokele lumenemene, mukazendi wamutongwezele byuma nimwabyo. Pe Nambalu wambwatukile mutima, niho wulweli wa kalepa wamuwilile. Pe wayumininine ngonehi limanya.

³⁸ Kwapitile tuhu matena likumi Nyambi ya Ngula wakamine Nambalu, pe wafwile.

³⁹ Oho Ndavita ayuvwile ngayi Nambalu unafu, wambile ngayi, “Nikuyemeza Nyambi ya Ngula ou unabweshe wubi ku wubi hali Nambalu ndaba ya matuka natambwile, pe wunankanishi ami mukamulimo wendi kutenda shibi. Nyambi ya Ngula nashushulu Nambalu ha wubi wendi.” Niho Ndavita balihuhwile na Ambingelu.

⁴⁰ Oho bakamilimo ba Ndavita bayile kuli Ambingelu ku Kamela, bambile kukwendi ngayi, “Ndavita unatutumu mu kukukatula ukenge mukazendi.”

⁴¹ Pe Ambingelu wafunkamine hanci, pe wambile ngayi, “Ami nikwitabila kutendela milimo bakamilimo bahekulyami.”

⁴² Ambingelu wakatukile shawangu, pe wakandamine ha mbongolo wendi, niho bamushindikizile bakamulimo bendi mutanu ba bambuyama, wayile na bakamilimo ba Ndavita pe wengile mukazendi.

⁴³ Ndavita kami wayekele Ahinoma waku Yezelela, pe wubili wabo bengile bakazendi.

⁴⁴ Ha shikati bene shiyo, Shaulu wapanikile mwanendi wa mbuyama Mikale, ou wengile mukaza Ndavita, kuli Paliti mwana Laisha wa mulume, ou wengile waku munzi wa Ngalima.