1 Shamwele 24 - Libuka Lya Kuyela

Ndavita ukutetelela wumi wa Shaulu

¹ Oho Shaulu abokele kufuma mu kulwisha Bafwilishitina, watongweziwile ngayi, “Ndavita uli mu libelelengwa lya Engendi.”

² Shaulu washimbile makulukazi ahatu a bakanzita ba kulwa shiwahe mu Ishalela, pe wayile mukushinga Ndavita na bantu bendi ku mushamuko wa Mamanya a Bampongo Ba lishaka.

³ Shaulu wezile ku linzolongoma lya hahepi na milaka ya bambelele bamo ku nkumo ya nzila, wengininemo mu linzolongoma mu kuyowela ku maulu. Lyolyo linzolongoma limo nimo aholamine Ndavita na bantu bendi, nibo bekalile kwakumina linzolongoma.

⁴ Bambile kuli Ndavita ngayi, “Shino shengakale shikati shobe, Nyambi ya Ngula wambile kukwobe ngayi, ‘Nikayaka kamalamo wobe mu maboko wobe, pe ukatwesha kutenda kukwendi nimwasho ukushinga kutenda.’” Ndavita wakalabilile kuli Shaulu, pe waketwile shivutu ku shivwalo shendi kwakubula kulimuka Shaulu.

⁵ Ngoboni shitima sha Ndavita shatatikile kumukabakanisha,

⁶ pe wambile ku bantu bendi ngayi, “Nyambi ya Ngula akane ngayi hinga nitenda shuma sha shibi kuli hekulyami, ou awabishile Nyambi ya Ngula kwinga mwene. Kaliha nafwanini kumubipisha, ndaba unengi mwene wakuwabishiwa kuli Nyambi ya Ngula.”

⁷ Nohobene Ndavita wakanishile bantu bendi ngayi hinga balwisha Shaulu. Shaulu wakatukile wafumine mu linzolongoma, pe wayile kwashenge.

⁸ Niho Ndavita atutikile mu linzolongoma pe wehanine Shaulu ngayi, “Obe hekulyami.” Shaulu wapenzeleko, pe Ndavita wafunkamine kulamba hanci na maleema,

⁹ pe wambile ngayi, “Shumangani ukuyuvwilila ku bantu aba bakwamba ngayi na kushinga kukuziha?

¹⁰ Ukutwesha kulimona obemwine ngayi wuluno bene mu linzolongoma Nyambi ya Ngula unakuyaka mu maboko wami. Bantu bami banantongweze ngayi nikuzihe, ngoboni nayene shikuma kukwobe na kwamba ngayi kushinga ngayi nimuzihe nifwako, ndaba muntu ou wamuwabishile Nyambi ya Ngula kwinga mwene.

¹¹ Obe tate, tilamina shivutu shashivwalo shobe eshe naketuluko, nisho eshe na kwata. Nafwanina kukuziha, ngoboni naketuluko tuhu eshe. Eshe shiku monesha ngayi shihanganiko sha ku kufutulukila mu kukulwisha hinge kukulemeka nifwasho. Unakunyomba ngayi unzihe, ngoboni ami kutenda shuma sha shibi kukwobe nifwako.

¹² Nyambi ya Ngula mwanga atuyate, awane muntu wamubi hakatiketu. Mwanga akushushule haneshe unatende kukwami, ngoboni ami kuka kulwisha nifwako.

¹³ Ukulimuka nguli ya shikale ngayi, ‘Kubakuluwa kwatutikanga bya kuluwa.’ Ngoboni liboko lyami kuka kulwisha lifwako.

¹⁴ Yani ou mwene wa Ishalela akushinga kuziha? Yani ou unakutantwesha? Kawa wakufwa ndi, lubalebale?

¹⁵ Nyambi ya Ngula ayate hakatiketu ngayi yani muntu wamubi. Mwanga atilamine mu shambo shami ngayi andamwine na kumpulwisha kukwobe.”

¹⁶ Oho Ndavita amanishile kwamba, Shaulu wambile ngayi, “Mwa shikuma kati obe bene mwanami Ndavita ndi?” Niho Shaulu atatikile kulila.

¹⁷ Pe wambile kuli Ndavita ngayi, “Obe uli wakulunga, ami nili wamubi. Wenga wamuwahe shikuma kukwami, oho natendanga shuma sha shibi kukwobe.

¹⁸ Unamoneshe wuwahe wobe lelo kukwami, ndaba wabula kunziha, oho Nyambi ya Ngula anyaka mu maboko wobe.

¹⁹ Shanahiti ndi muntu ukukwata kamalamo wendi pe ha kumuleha ngayi aye nahiya wakubula kulemana? Nyambi ya Ngula akutandalishe ku neshe unatende lelo kukwami.

²⁰ Haya nikulimuka ngayi mwa shikuma ukenga mwene wa Ishalela, kami ngayi wene wobe ukehala.

²¹ Ngoboni nkulupishe mu lizina lya Nyambi ya Ngula ngayi ukatetelela bazukulyami, ngayi mwanga lizina lyami na lizina lya ba lupashi lwami likabule kuvulamiwa shikuma.”

²² Niho Shaulu abokele ku munzi, pe Ndavita na bantu bendi babokele ku mwanya wabo wakuholama.