1 Shamwele 23 - Libuka Lya Kuyela

Ndavita ukulamwina munzi wa Keyila

¹ Ndavita bamutongwezele ngayi, “Bafwilishitina banakulwisha munzi wa Keyila, kami ha kuteza banakuyiba mbuto yayipya kuya ba kuyipulila.”

² Nohobene wanyepele kuli Nyambi ya Ngula ngayi, “Kati niye na kulwisha Bafwilishitina ndi?” Nyambi ya Ngula wakumbwile ngayi, “Ee yanga ukabalwishe, ulamwine Keyila.”

³ Ngoboni bantu ba Ndavita bambile kukwendi ngayi, “Tuli na bowa shikuma muno mu Yunda, nisho shikenga sha shibi shikuma ndi tukuya ku Keyila mu kulwisha nzita ya Bafwilishitina.”

⁴ Nohobene Ndavita wepwizizile kami Nyambi ya Ngula, pe Nyambi ya Ngula wamukumbwile ngayi, “Yanga na kulamwina Keyila, ndaba nika kupana kukoma ha Bafwilishitina.”

⁵ Nohobene Ndavita na bantu bendi bayile ku Keyila pe bakalwishile Bafwilishitina, bazihile bantu babengi pe bakashimbile bimuna babo. Nohobene nisho Ndavita alamwinine bantu ba munzi wa Keyila.

⁶ Oho Ambiyatale mwana Ahimeleki apanzile pe waliwanine na Ndavita mu Keyila, wezile na kakobelo kakepi kashizila mu liboko lyendi.

⁷ Shaulu bamutongwezele ngayi Ndavita unezi ku Keyila, pe Shaulu wambile ngayi, “Nyambi unamupaniki mu ngovu zami. Ndavita walimanyikakale niyemwine ha kwingina mu munzi wa kembi na mapangati akupata.”

⁸ Nohobene Shaulu wehanine makunge wendi ku nzita, kuya mu kulwisha Keyila mu kuzinguluka Ndavita na bantu bendi.

⁹ Oho Ndavita ayuvwile ngayi Shaulu unafungu kumulwisha, wambile kuli mukankombela Ambiyatale ngayi, “Leta kuno kakobelo kakepi kashizila.”

¹⁰ Niho Ndavita ambile ngayi, “Obe Nyambi ya Ngula, Nyambi wa Ishalela nayuvwu ngayi Shaulu uli na kufunga kwiza na kulobesha Keyila ndaba yanami mukamulimo wobe.

¹¹ Kati bantu ba munzi wa Keyila bakampanika mu maboko a Shaulu ndi? Mwa shikuma kati Shaulu ukeza ngonehe nayuvwu ndi? Obe Nyambi ya Ngula, Nyambi wa Ishalela, nikukunyepa ngayi unkumbule.” Nyambi ya Ngula wakumbwile ngayi, “Shaulu ukeza.”

¹² Niho Ndavita epwile kami ngayi, “Kati ba munzi wa Keyila bakapanika bantu bami na nami ku maboko a Shaulu ndi?” Nyambi ya Ngula wakumbwile ngayi, “Bakakupana kukwendi.”

¹³ Nohobene Ndavita na bantu bendi nimwabo 600, bafumine mu Keyila hohobene, pe bayile na kunungozoka. Oho Shaulu ayuvwile ngayi Ndavita unatini ku Keyila, walehelesho kumukonka.

Ndavita mu litunga lya binkanda

¹⁴ Ndavita wekalilenga na kuholazama mu litunga lya binkanda, mu libelelengwa hahepi na Zifu. Shaulu wamushingilenga ha mutena ha mutena ngoboni Nyambi kaliha wapanine Ndavita kukwendi.

¹⁵ Oho Ndavita ekalile ku Holeshi mu libelelengwa lya Zifu, walimukile ngayi Shaulu washingilenga kumuziha.

¹⁶ Yonatana wayile kuli Ndavita ku Holeshi, pe wamuyavwile ku shumina muli Nyambi.

¹⁷ Yonatana wambile kukwendi ngayi, “Hinga utina, tate Shaulu kutwesha kukuziha wufwako, kami halimuka shiwahe ngayi obe ukenga mwene wa Ishalela, kami ngayi ami nikenga wakukulundamina kukwobe.”

¹⁸ Pe wubili wabo balimamine na lubeza ku meho a Nyambi mukati kabo. Ndavita wekalile ku Holeshi, Yonatana wayile ku munzi.

¹⁹ Niho bantu bamina bafumine ku Zifu bayile kuli Shaulu ku Ngimbiya na kumutongweza ngayi, “Ndavita waholamanga mu litunga lyetu ku Holeshi ha lipili lya Hakila, ku mbalila ya mabukubuku a Njeshimoni.

²⁰ Tukulimuka, obe hekulyetu, nohobene eshe washinganga kumukwata, yeka ku litunga lyetu, pe tukamupanika mu maboko wobe.”

²¹ Shaulu wakumbwile ngayi, “Nyambi ya Ngula mwanga amitandalishe ha kunyuvwila nceshe.

²² Yenunga wanguwangu na kumoneshesha shiwahe, muwane oku ali nanou unamumono. Nayuvwu ngayi wakukeya shikuma.

²³ Shingishishenu shiwahe myanya oku aholamanga, mwanga mwize na kuntongweza wanguwangu. Niho nikaya nenu, kami ndi ushili mu litunga nikamushinge, hinge mu litunga nimwalyo lya Yunda nikamufwatula.”

²⁴ Nohobene bantu ba ku Zifu balimenekelengaho kuya kukwabo ku shiya Shaulu munyima. Ndavita na bantu bendi bekalile mu libelelengwa lya Mawoni, mu Alamba mu mbuwa yaku mabukubuku a Njeshimoni.

²⁵ Shaulu na bantu bendi bayile nakufwatoka Ndavita, ngoboni Ndavita wayuvwileko, pe wayile ku lipili lya mamanya mu libelelengwa lya Mawoni na kwikalako. Oho Shaulu ayuvwile eshe, wakonkele Ndavita.

²⁶ Shaulu na bantu bendi bekalile ku mbalila yamina ya lipili, balitapwilile kuli Ndavita na bantu bendi baya bekalile ku nciza ya lipili, banyankupilenga kwituka kutina Shaulu. Oho Shaulu na bantu bendi bashingile kubalalabila,

²⁷ wanguwangu ntumwana wakumine na kutongweza Shaulu ngayi, “Boka shawangu, ndaba Bafwilishitina bana kutwinginina mu litunga.”

²⁸ Nohobene Shaulu walehele kutanda Ndavita, pe wayile na kulwisha Bafwilishitina. Nohobene batumbile mwanya uyo ngayi, Lipili lya Kulitapatapa.

²⁹ Ndavita wafumine kuyo, pe wayile na kwikala mu litunga lya Engendi.