1 Shamwele 22 - Libuka Lya Kuyela

Shaulu ukuziha bakankombela

¹ Ndavita wetukile ku munzi wa Ngati pe wayile na kuholama ku linzolongoma lya kwakwipi na munzi wa Andulama. Oho ba lupashi lwendi na bawushinda wendi bamina bayuvwile eshe, bayile kukwendi.

² Bantu bayandishiwilenga, hinge baya bekalile na mikuli, hinge baya babulile kwikala shiwahe bakungulukilile kukwendi, bantu nimwabo bekalile nendi bengile 400, pe niye wengile mukakubatwaminina.

³ Ndavita wafumine kuyo niho ayile ku Mizipa mu Mowambi, pe wambile kuli mwene wa Bamowambi ngayi, “Hekulu nyintabile ngayi batate na bamawa beze mukwikala hamo na nobe hantu nalimuku eshe akutenda Nyambi kukwami.”

⁴ Nohobene Ndavita washiyile bahemi bendi kuli mwene waku Mowambi, pe bekalile nendi shikati nimwasho shiya Ndavita aholaminenga mu linzolongoma.

⁵ Niho muluwe wa Nyambi Ngandi ambile kuli Ndavita ngayi, “Hinga wikala kuno, hahano bene yanga ku litunga lya Yunda.” Nohobene Ndavita wakatukile wayile mu lishaka lya Heleti.

⁶ Mutena umo Shaulu wekalile mu Ngimbiya, hayilu ya kena mu nceto ya mutondo wa Tamalishiki na mulinga wendi mu liboko, pe babilolo bendi nimwabo bemanine na kumuzinguluka. Wayuvwile ngayi Ndavita na bantu bendi banawaniwi,

⁷ pe wambile ku babilolo bendi ngayi, “Yuvwililenu enu balume ba Mbenjamani! Kati mu kuhanganika ngayi uya mwana Njeshe ukamipana nimwenu mafuba na mafuba a mikabo ya shinyanca na kumiyaka nimwenu kwinga babilolo mu nzita yendi,

⁸ nka nisho shiya munambebelenga na kundwisha? Kwabulile muntu hakati kenu wantongwezele ngayi mwanami unalimama na Ndavita mwana Njeshe. Kowa muntu wamfulankanine hinge kuntongweza ngayi Ndavita, umo waha bantu bami, wuluno uli na kushinga nzila ya kunziha, kami ngayi mwanami wa mulume uli na kumutumeza.”

⁹ Ndoyengi wa Kaendoma wemanine kuyo na babilolo ba Shaulu, pe wambile ngayi, “Namonene Ndavita mwana Njeshe oho ayilenga kuli Ahimeleki mwana Ahitumbi wa mulume ku Nombu.

¹⁰ Ahimeleki wanyepele kuli Nyambi ya Ngula ebye aku fwanina kutenda Ndavita mwana Njeshe, pe niho apanine Ndavita byakulya na mukwale wa Ngoliyati Kafwilishitina.”

¹¹ Nohobene mwene Shaulu wehanine mukankombela Ahimeleki mwana Ahitumbi na bawushinda wendi nimwabo, baya bengile bakankombela mu Nombu, pe bezile kukwendi.

¹² Shaulu wambile kuli Ahimeleki ngayi, “Yuvwilila haya, obe mwana Ahitumbi.” Niye wakumbwile ngayi, “Ami uno, hekulu.”

¹³ Shaulu wamwipwile ngayi, “Kati shumangani obe na Ndavita mwana Njeshe mu kumbebela ngayi mundwishe? Shuma ngani wamupanikila byakulya na mukwale na kumwipwila kuli Nyambi? Haya uli na kumfutulukila mu kundwisha pe uli na kushinga nzila ya kunziha.”

¹⁴ Ahimeleki wakumbwile mwene ngayi, “Ndavita nengi shilolo wakulunga shikuma. Nengi mukowobe bene, nkongo wa bakakulama bobe, pe walemeekiwa shikuma mu shinzanza sha wene.

¹⁵ Ee, nepwizizile Nyambi hahendi, kami kaliha nisho shengile shikati sha kutatika. Ebye boni bya kukubeba na kukulwisha, obe hekulyetu, kaliha niku fwanina kuyatiwa hinge muntu wamina ku ba lupashi lwami. Kulimuka shuma ha shambo eshe nifwako.”

¹⁶ Mwene wambile ngayi, “Ahimeleki naba ba lupashi lyobe mu ku fwanina kufwa.”

¹⁷ Niho ambile kubakakulama aba bemaninenga kwakwipi nendi ngayi, “Zihenu bakankombela ba Nyambi ya Ngula. Ndaba banaliyuvwashana na Ndavita, babulile kuntongweza oho balimukile ngayi unetuku.” Ngoboni bakakulama bakanine kuziha bakankombela ba Nyambi ya Ngula.

¹⁸ Nohobene mwene Shaulu wambile kuli Ndoyengi ngayi, “Obe bazihe.” Niho Ndoyengi wa Kaendoma abazihile nimwabo. Ha mutena uyo wazihile bakankombela 85 aba bemikiwile kuvwala kakobelo ka kulelema kakepi ka shizila.

¹⁹ Niho mwene Shaulu kami azihile bamina bazikile mu Nombu munzi wa bakankombela, wazihile balume na bambuyama, batwanuke na bambututu na zingombe na bambongolo na bambelele nimwabo.

²⁰ Ambiyatale, umo waha bana ba Ahimeleki wa mulume mwana Ahitumbi wapanzile, pe wayile kuli Ndavita.

²¹ Ambiyatale wamutongwezele ngayi Shaulu nazihi bakankombela ba Nyambi ya Ngula.

²² Ndavita wambile kuli Ambiyatale ngayi, “Oho namonene Ndoyengi waku Endoma mutena uyo nalimukile ngayi mwa shikuma ukatongweza Shaulu. Nohobene ami nafwanini kunyanciwa mu lufu lwa bawushinda wobe nimwabo.

²³ Yikala na nami, hinga utina. Shaulu ukushinga kutuziha nimwetu nobe na nami, ngoboni ukekala shiwahe na nami.”