1 Shamwele 21 - Libuka Lya Kuyela

Ndavita ukutina kuli Shaulu

¹ Ndavita wayile kuli mukankombela Ahimeleki ku Nombu. Ahimeleki watutikile na kukanka mu kushimbawila Ndavita, pe wamwipwile ngayi, “Shumangani unezili ninkayobe kuno nimwako?”

² Ndavita wakumbwile mukankombela Ahimeleki ngayi, “Nili kuno ku mulimo wa mwene. Wantongweza ngayi hinga nitongweza muntu hinge umo eshe anantumu ngayi nitende. Nehiboni bantu bami nabatongweze ngayi bakangwane ku mwanya umo.

³ Hayaboni, uli na Byumangani? Mpeko mipumpa ya mankende mutanu hinge eshe nimwasho uli nasho.”

⁴ Mukankombela wakumbwile Ndavita ngayi, “Mankende owa nifwawo ndele tuhu mankende ashizila. Ukutwesha kuwatambula ndi bantu bobe banaliziliki ku bakazi.”

⁵ Ndavita wakumbwile mukankombela ngayi, “Mwa shikuma bakazi banafumishiwi kukwetu, oho nayanga ha mukala. Bishebezesho bya bantu bami byenga bya kuyela hingebene oho twayanga ha mukala wa nahiya. Pe shikati shino tuli ha mukala wawunene ba kukumina hati?”

⁶ Nohobene mukankombela wapanikile Ndavita mankende ashizila ndaba niwo mankende ekalile nawo tuhu, engile mipumpa batupwile kuli Nyambi, eye bafumishilenga ku tebulu yashizila na kuhingishaho amapya.

⁷ Ndoyengi mulishani wa Shaulu wamukulwane ou wafumine ku Endoma, wamonekele kuyo ha mutena uyo, ndaba wekalile na kuzilulula ndayano za wunyambi.

⁸ Ndavita wambile kuli Ahimeleki ngayi, “Kati uliko na mulinga hinge mukwale umpeko ndi? Ndaba ndayano za mwene zinanyendeshe wanguwangu nabulu na shikati sha ku fwanina ku shimba mukwale hinge bilwisho byamina.”

⁹ Mukankombela Ahimeleki wakumbwile ngayi, “Nili na mukwale wa Ngoliyati Kafwilishitina uya wazihilile mu mukulo wa Ela. Niwo uli kunyima ya kakobelo kashizila, banawuzengele mu likwiza. Ndi ukuwushinga pe shimba ndaba nisho tuhu shilwisho shili kuno.” Ndavita wambile ngayi, “Leta kuno, kowa oku tukuwana mukwale wanehe.”

¹⁰ Nohobene Ndavita wayile, wetukile kuli Shaulu, pe wayile kuli mwene Akishi wamu Ngati.

¹¹ Babilolo ba mwene Akishi bambile kukwendi ngayi, “Kati ou kaliha niye Ndavita mwene wa litunga ndi? Nengi muntu ou bembililenga bambuyama oho bashindilenga ngayi, ‘Shaulu unazihi makulukazi, ngoboni Ndavita makulukazi makumi.’ ”

¹² Mazu wabo ashonkele Ndavita ku mutima, pe amuyuvwishile shikuma bowa kuli mwene Akishi waku Ngati.

¹³ Nohobene, hinga bekala, Ndavita walimonekeshele ngo unapempele, kami watendelenga ngo shivulumuki, oho bashingilenga kumubengezeka. Wayile na ku mangozola ha mapangati a lukena pe luzenge lwavwililenga ha mulevu wendi.

¹⁴ Nohobene Akishi wambile ku babilolo bendi ngayi, “Monenu, ou muntu wakupempela. Shumangani munamuletele kuno kukwami?

¹⁵ Nka ami nekala na ba kupempela? Shumangani munandetele wamina kami, ngayi anyandishenga kuno ku litala lyami na biheka bya kupempela kwendi?”