1 Shamwele 20 - Libuka Lya Kuyela

Yonatana ukuyavwa Ndavita

¹ Niho Ndavita apanzile kufuma ku Nayote mu Lama, pe wayile kuli Yonatana. Wepwile Yonatana ngayi, “Kati natende bishini? Mulandu ngani natende? Kati nabipishi bishini kuli tatiyobe ebye akushinga kunzihila?”

² Yonatana wakumbwile ngayi, “Nyambi akane, kukafwa wufwako. Tate wantongwezanga byuma nimwabyo atendanga, hinge ndi byabinene hinge ndi byabishe, pe kutwesha kulimba eshe kukwami wufwako. Osho kaliha sha kupwisha.”

³ Ngoboni Ndavita wakumbwile ngayi, “Tatiyobe walimuka shiwahe ngayi obe wahaka shikuma, kami wahanganikanga ngayi, Yonatana hinga alimuka ebye, pe ukapilama. Nikulibeza kukwobe na Nyambi ya Ngula wakuyoya ngayi nili tuhu hahepi na lufu.”

⁴ Yonatana wakumbwile Ndavita ngayi, “Nikatenda shuma nimwasho ukushinga.”

⁵ Ndavita wambile kuli Yonatana ngayi, “Nzona ukenga Mwonda wakutelama kwa Ngonda Wamupya, ami nafwanina kulya hamo na mwene. Ngoboni nyintabilishe ngayi nikaholame mu mfuba kutwala ku mazolo a mutena wawuhatu.

⁶ Ndi tatiyobe ukatosha ngayi ami kowa, pe ukamutongweze ngayi, ‘Ndavita wanyepa ngovu za kwitukila ku munzi ku Mbetelehema, ndaba nisho shenga shikati sha nkombela yaha mwaka ha mwaka ya ba lupashi lwabo nimwabo’.

⁷ Ndi niye ukamba ngayi, ‘Shashiwahe’, pe nikapuluka, ngoboni ndi ukakaliha, pe ukalimuka ngayi unakushinga kunziha.

⁸ Tenda nehe ngayi mwanga unyavwe mbayi na kulama kulimama kwa shizila okwe walimamine kukwami ku meho a Nyambi ya Ngula. Ngoboni ndi nili na mulandu, nzihe obemwine. Shumangani ukuntwalila kuli tatiyobe ngayi nikazihiwe?”

⁹ Yonatana wakumbwile ngayi, “Hinga uhanganika shuma sha nehe. Shinga nalimukile ngayi mwa shikuma batate bakushinga kukuziha, kati shinga kukutongweza nifwako ndi?”

¹⁰ Niho Ndavita epwile Yonatana ngayi, “Yani ukantongweza ndi tatiyobe ukakumbula na wukali?”

¹¹ Yonatana wakumbwile Ndavita ngayi, “Yeka tuye mu mafuba.” Nohobene bayile.

¹² Pe Yonatana wambile kuli Ndavita ngayi, “Mwanga Nyambi ya Ngula, Nyambi wa Ishalela, enge paki wetu. Nzona ku shikati shino naku mutena wawuhatu, nikepula batate. Ndi bihanganiko byabo hahobe byabiwahe pe nika kutumina lizu.

¹³ Ndi batate bakushinga kutenda shibi kukwobe, Nyambi ya Ngula mwanga ankame nifwe ndi kukutongweza nifwako ngayi ulimuke na kuya lubilo. Nyambi ya Ngula mwanga ekale nanobe hamo ngonehe ekalilenga na batate.

¹⁴ Ndi nishili wamumi, monesha nceshe kukwami za Nyambi ya Ngula ngayi mwanga nibule kufwa.

¹⁵ Monesha shishemo shimo ku ba lupashi lwami mwaya myaka. Tenda eshe oho Nyambi ya Ngula walobeshakale bamalamo bobe nimwabo.”

¹⁶ Nohobene Yonatana walimamine na Ndavita ngayi, “Mwanga Nyambi ya Ngula ashushule ou ukabula kulama kulimama.”

¹⁷ Yonatana kami wabokeleleho kulambilila Ndavita ngayi alibeze ngayi wamuhaka, ndaba Yonatana wahakile shikuma Ndavita, ngonehe alihaka niyemwine.

¹⁸ Niho Yonatana ambile kukwendi ngayi, “Ha kuwana ngayi nzona kukekala Mwonzo wakutelama kwa Ngonda, ukatoshiwa ngayi wabulu kwikalako, ndaba mu shipona shobe mukabula muntu.

¹⁹ Mwa shikuma ha mutena wawuhatu obe ukatoshiwa ngayi wabulu kwikalako. Nohobene yanga ku mwanya oku waholamine uya mutena, pe ukaholame kuyo kunyima ya mushiinzi wa mamanya.

²⁰ Nohoboni nikapuhe mivwi yihatu kukwawo, hinge noho shikenga ngonehe limango.

²¹ Niho nikatongweza ndumbana mukamulimo wami kuya na kuyitola. Kami ndi nikumutongweza ngayi, ‘Penza, mivwi yili ku nciza yobe kuno, yishimbe,’ shiya shikutontoloka ngayi unapuluku pe ukutwesha kuholoka. Nikubeza na Nyambi ya Ngula wakuyoya ngayi kukekala mu malamo wufwako.

²² Ngoboni ndi nikumutongweza ngayi, ‘Mona, mivwi yili ku nciza yobe kuyo,’ niho uye ndaba Nyambi ya Ngula unakutongweze ngayi wituke.

²³ Ngonehe kulimama okwe twalimamine mukatiketu, Nyambi ya Ngula ukenga mukakwimanina mukatiketu mwaya myaka.”

²⁴ Nohobene Ndavita waholamine mu mfuba. Ku Mwonzo wakutelama kwa Ngonda, Mwene Shaulu wezile mu kulya byakulya,

²⁵ pe mwene wekalile mu mwanya wendi wa shikati nimwasho wakuyendaminanga ku kembi. Ambina wekalile kulilundamina nendi, pe Yonatana kuliyahikiza nendi. Mu mwanya wa Ndavita mwengile mowa.

²⁶ Ngoboni Shaulu kaliha wambile shuma shimo ha mutena uyo, ndaba wahanganikile ngayi, “Kuli shuma shinamwizilili, pe nisho shinamubulishi kuyela.”

²⁷ Oho kwashileko, oho Mwonzo wakutelama kwa Ngonda, wapitakale mu mwanya wa Ndavita mwengile kami mowa, pe Shaulu wepwile Yonatana ngayi, “Kati shumangani Ndavita mwana Njeshe anabulili kwiza ku mulalilo nzona hinge lelo?”

²⁸ Yonatana wakumbwile Shaulu ngayi, “Ndavita wanyepa ngovu za kuya ku Mbetelehema.

²⁹ Wambile ngayi, ‘Hekulu ndehe niye, ndaba ba lupashi lyetu banapingi shimbo sha nkombela mu munzi, pe bayaya banandaya ngayi nikekaleko. Nohobene haya, ndi wancinga, yitabila ngayi nikamone bawushinda wami.’ Eshe nisho anabulili kwiza mu mwanya wendi ku tebulu yobe.”

³⁰ Shaulu wakalihilile Yonatana pe wambile kukwendi ngayi, “Obe mwana mbuyama wakuluwa, mukakufutulukila! Haya nikulimuka ngayi obe watendakale shikonzi na uya mwana Njeshe pe unalihandulu obemwine hamo na mandiyobe.

³¹ Kati kulimuka wufwako ngayi Ndavita mwana Njeshe aha ashili kuyoya, obe kukatwesha kwinga mwene wa litunga lino wufwako ndi? Haya yanga ukamulete kuno mwanga afwe.”

³² Yonatana wakumbwile ngayi, “Kati shumangani akufwila? Unatende bishini?”

³³ Hohobene Shaulu wapuhile mulinga wendi kuli Yonatana ngayi amuzihe, pe Yonatana walimukile ngayi tatiyendi washingilenga kuziha Ndavita.

³⁴ Yonatana wakatukile ku tebulu wayile na kupilama pe kaliha walile sha kulya ha mutena wawubili wa Monzo wakutelama kwa Ngonda. Wekalile na wunginga shikuma hali Ndavita, ndaba Shaulu wamuhandwile.

³⁵ Kwashile lumenemene Yonatana wayile ku mafuba mu kuliwana na Ndavita, ngonehe baliyuvwashanine. Wayile na ndumbana mukamulimo wendi.

³⁶ Wambile kukwendi ngayi, “Yituka ukatole mivwi eye nikupuha.” Ndumbana wetukile, pe Yonatana wapuhile muvwi kumbili yendi.

³⁷ Oho ndumbana akumine ku mwanya kwawililile mivwi, Yonatana wabilikizile kukwendi ngayi, “Kati muvwi shilolo upitakane ndi?

³⁸ Yonatana ehanine ngayi hinga wimana tuhu hoho. Nyankupisha.” Ndumbana watolele muvwi pe wabokele kuli hekulyendi,

³⁹ kaliha walimukile ngayi ebye nimwabyo bikutontolola bishini, ndele tuhu Yonatana na Ndavita nibo babilimukile.

⁴⁰ Yonatana wapanikile bilwisho byendi kuli ndumbana ngayi abibweshe ku munzi.

⁴¹ Oho ndumbana wayakale, Ndavita wakatukile kunyima ya mushiinzi wa mamanya, wafunkamine ku manungo wendi na ku nyongamina hanci kahatu. Wubili wabo niye na Yonatana balilile oho balizupezelenga umo na wamina, winga wa Ndavita wapitakanine wa Yonatana.

⁴² Niho Yonatana ambile kuli Ndavita ngayi, “Yanga mu ku mwena, ndaba tunalimama wuhoni umo na wamina mu lizina lya Nyambi ya Ngula ngayi, ‘Nyambi ya Ngula unengi mukakwimanina hakati kobe na nami na mukati ka bazukulyobe na bazukulu bami mwaya myaka.’” Niho Ndavita ayile, pe Yonatana wabokele ku munzi.