1 Shamwele 19 - Libuka Lya Kuyela

Ndavita ukuyandishiwa kuli Shaulu

¹ Shaulu watongwezele mwanendi Yonatana na babilolo bendi nimwabo ngayi unafungu kuziha Ndavita. Ngoboni Yonatana washingile shikuma Ndavita.

² Niho Yonatana atongwezele Ndavita ngayi, “Batate banakushinga kukuziha. Keya mbayi, nzona lumenemene ukaholame ku mbalila kwa ninkayobe.

³ Ami nikaya na kwimana kuli batate mu mfuba muya ukaholama, pe nikamba nabo hahobe. Ndi nikayuvwaho shuma shamina, nikakutongweza ngayi ulimuke.”

⁴ Yonatana wayemezele Ndavita kuli mwene Shaulu pe wambile ngayi, “Hekulu, hinga utenda shibi kuli mukamulimo wobe Ndavita, ndaba shilolo atende sha shibi kukwobe, ku nimwabyo ebye anatende kukwobe binengi bya kuyavwa shikuma,

⁵ watupwile wumi wendi oho azihile Ngoliyati, pe Nyambi ya Ngula wakomene Ishalela shikuma. Oho ashimonene, wawahililile. Shumangani ukushingila kutenda shibi Ndavita muntu wakubula mulandu, ha kuziha kwakubula mulandu?”

⁶ Shaulu wayuvwishishile kunebye ambilenga Yonatana pe walibezele lubeza mu lizina lya Nyambi ya Ngula ngayi kukaziha Ndavita nifwako.

⁷ Nohobene Yonatana wehanine Ndavita pe wamutongwezele byuma nimwabyo, niho amutwalile kuli Shaulu, pe Ndavita watendelele milimo mwene ngonehe atendelenga ha kutatika.

⁸ Nzita ya Bafwilishitina yahongolokele kami. Ndavita wabalwishile, pe wabakomene niho batinine.

⁹ Niho mutena umo mayimbwe afumine kuli Nyambi ya Ngula atukukishile Shaulu. Wekalile mu litala lyendi na mulinga mu liboko, kami Ndavita wekalilemo ha mbeta kambuli kendi kakashe.

¹⁰ Pe Shaulu washingile kuyahila Ndavita na mulinga ha limota, ngoboni Ndavita waleyele, pe mulinga wayahile ha limota. Ndavita wetukile niho apanzile wowo wushiku.

¹¹ Wowo wushiku Shaulu watumine bantu ku litala lya Ndavita mu kumubelamina ngayi lumenemene mwanga bamuzihe. Mikale mukaza Ndavita wamutongwezele ngayi, “Ndi kutina uno wushiku wufwako, nzona ukazihiwa.”

¹² Nohobene, Mikale wamupitishilile mu limpananga, niho Ndavita etukile pe wapanzile.

¹³ Niho Mikale ashimbile kanankishi ka mu litala, wakalalikile ha wulili, wayakile muhamino wa wushako wa bampongo ku mutwe wako, niho akafwikile muyemba.

¹⁴ Oho bantu ba Shaulu bayile mu kuleta Ndavita, Mikale wabatongwezele ngayi, “Wakukola.”

¹⁵ Ngoboni Shaulu wababweshele mu ku mona Ndavita. Wabatongwezele ngayi, “Kamuletenu kuno kukwami hinga alangana ha wulili wendi, pe nimuzihe.”

¹⁶ Oho benginine mukati, bawanine kanankishi ka mu litala ha wulili na muhamino wa wushako wa bampongo ku mutwe wako.

¹⁷ Shaulu wepwile Mikale ngayi, “Shumangani unanyongezele nehe pe unalehe kamalamo wami ngayi apanze?” Mikale wakumbwile ngayi, “Unamba kukwami ngayi ukunziha, ndi kumuyavwa nifwako ngayi apanze.”

¹⁸ Ndavita watininine kuli Shamwele ku Lama pe wamutongwezele byuma nimwabyo biya atendele Shaulu kukwendi. Niho Shamwele na Ndavita bayile ku Nayote na kwikalako.

¹⁹ Shaulu bamutongwezele ngayi, “Ndavita uli ku Nayote mu Lama.”

²⁰ Niho Shaulu atumine bantumwana bamo mu kukwata Ndavita. Bamonene litanga lya miluwe ba Nyambi hibalubulula, Shamwele hinga emana mukati kabo kwinga mukulwane wabo. Niho Moyo wa Nyambi wezile ha baya bantu ba Shaulu, pe nabo kami batatikile kulubulula.

²¹ Oho Shaulu ayuvwile eshe, watumine bantumwana bamina, pe nibo kami batatikile kulubulula. Watumine bantumwana shikati sha wuhatu nabo kami batatikile kulubulula.

²² Niho Mwene Shaulu niyemwine ayile ku Lama. Oho akumine ku lishima lyalinene mu Sheku, wepwile ngayi, “Kati Shamwele na Ndavita balikuti?” Bamutongwezele ngayi, “Bali ku Nayote.”

²³ Oho ayilenga kuyo, Moyo wa Nyambi wezile hahendi kami, pe walubulwile mu nzila nimwamo kukuma ku Nayote mu Lama.

²⁴ Wavulile bivwalo byendi pe walubulwile ku meho a Shamwele, niho alalile muhelengwa ha mutena uyo nimwawo na wushiku uyo nimwawo. (Eshe shatatikile kwambiwa ngayi. “Kati hinge Shaulu kami wengakale himuluwe wa Nyambi ndi?”)