1 Shamwele 18 - Libuka Lya Kuyela

¹ Oho Shaulu na Ndavita bamanishile ngambolo zabo, Yonatana mwana Shaulu walishingile shikuma na Ndavita pe wamuhakile shikuma ngonehe alihakile niyemwine.

² Shaulu walamine Ndavita kubalika ha mutena uyo kutwala naku matena a kumbili, pe kaliha wamwitabilishile ngayi aboke kukwabo.

³ Yonatana walimamine wuhoni wakulibeza na Ndavita ndaba ya kulihaka nendi shikuma.

⁴ Wavulile mwayi wendi owe avwalilenga pe wawupanikile Ndavita, hamo na bivwalo byendi bya nzita bya byondo na mukwale wendi na shipando sha mukunzi na mukunzi wendi.

⁵ Ndavita wengile muntu wakutwesha kwenda mu zinyendo nimwazo eze amutuminenga Shaulu, pe Shaulu wamwingile shilolo wa bakanzita yendi. Eshe shawahilishile bantu ba Shaulu na babilolo bendi nimwabo.

Shaulu ukwingila lihungu Ndavita

⁶ Oho bakanzita babokelenga ku munzi, oho Ndavita wazihakale Ngoliyati, bambuyama bafumine ku minzi nimwayo mu Ishalela bayile mu kushimbawila Mwene Shaulu. Bembililenga nyimbo za ku wahilila, hibashinda na kumbeta tuncingili na tumbuli twatushe.

⁷ Ha ku shinda kwabo, bambuyama bembililenga ngayi, “Shaulu unazihi makulukazi, ngoboni Ndavita unazihi makulukazi makumi.”

⁸ Shaulu kaliha wawahililile eye nyambilo, wapilamine shikuma, pe wambile ngayi, “Ndaba Ndavita banamulabili makumi a makulukazi, ngoboni ami makulukazi tuhu. Kumbili bakamwinga mwene.”

⁹ Shaulu wekalile na lihungu shikuma na kuyaka Ndavita ku mutima kubalika ha mutena uyo na kutwalililaho.

¹⁰ Oho kwashile, mayimbwe afumine kuli Nyambi na kutukukisha Shaulu, pe watamokele na kwawula mu litala lyendi ngonehe muntu wakupempela. Ndavita wambetelenga kambuli kakashe ngonehe atendelenga ha mutena ha mutena, niho Shaulu akwatile mulinga.

¹¹ Pe walyambishile niyemwine ngayi, “Nikumutubwila kumo na limota.” Pe wapuhile mulinga kabili kukwendi, ngoboni Ndavita wawuleyele kabili.

¹² Shaulu watinine Ndavita ndaba Nyambi ya Ngula wekalile nendi, ngoboni wafutaminine Shaulu.

¹³ Nohobene Shaulu watumine Ndavita kwashenge, pe wamuyakile ha wunkongo wa bantu ba likulukazi limo, niho Ndavita atwamininine bantu bendi mu nzita.

¹⁴ Ndavita kami watweshelenga mu byuma nimwabyo atendelenga, ndaba Nyambi ya Ngula wekalile nendi.

¹⁵ Shaulu oho atoshele ngayi Ndavita nengi wakutangama pe wamutinine shikuma.

¹⁶ Ngoboni bantu nimwabo bamu Ishalela namu Yunda bahakile Ndavita ndaba wengile mukakutwaminina wakutangama shikuma.

Ndavita ukuyeka mwana Shaulu

¹⁷ Niho Shaulu ambile kuli Ndavita ngayi, “Nikakupanika mwanami Melambu, ngayi mwanga umuyeke, pe ukantendelenga ngonehe mukanzita wakukanca na kulwa nzita ya Nyambi ya Ngula.” Ndaba Shaulu walyambishile niyemwine ngayi, “Ami hinga nimulwisha na kumuziha, ngoboni bamuzihe Bafwilishitina.”

¹⁸ Ndavita wakumbwile ngayi, “Ami nengi nili yani, kami nengi wa livumo lya bayani mu Ishalela ngayi ninge mukowendi mwene?”

¹⁹ Ngoboni oho shikati sha Melambu mwana Shaulu wa mbuyama sha kupanikiwa kuli Ndavita sha kumine, wapanikiwile ku mulume ou watumbiwile ngayi Andiliyele waku Mehola.

²⁰ Mwana Shaulu wambuyama Mikale, wahakile Ndavita shikuma, pe oho Shaulu ayuvwile eshe wawahililile shikuma.

²¹ Walyambishile niyemwine ngayi, “Nikayekiwisha mwanami Mikala kuli Ndavita, ukenga ngo nkabo ya kumumanyikisha, pe ukazihiwa ku Bafwilishitina.” Nohobene ha shikati sha wubili Shaulu wambile kuli Ndavita ngayi, “Obe ukenga mukowami.”

²² Watongwezele babilolo bendi ngayi bambe na Ndavita kwa ninkayabo na kumutongweza ngayi, “Mwene unakuwahilili, hamo na babilolo nimwabo bana ku haka. Haya shinengi shikati shashiwahe kukwobe kuyeka mwanendi.”

²³ Nohobene bakamilimo ba Shaulu batongwezele Ndavita, pe wakumbwile ngayi, “Shinengi lileema lyalinene shikuma shakwinga mukowa mwene, shashinene shikuma ku muntu wakushepwa kami wakubula mpupo ngonehe ami.”

²⁴ Babilolo batongwezele Shaulu ebye ambile Ndavita.

²⁵ Shaulu wabalayile na kutongweza Ndavita ngayi, “Ebye akushinga tuhu mwene kukwobe mivwi yaha maluwo, yinengi bikonde bya hambili bya balume ba kufwa mwanda wa Bafwilishitina, kwinga ngo kubweshela bamalamo bendi.” (Eye niyo nzila ahanginikile Shaulu ngayi mwanga Ndavita azihiwe ku Bafwilishitina.)

²⁶ Babilolo batongwezele Ndavita ebye ambile Shaulu, pe Ndavita bya mu wahilishile shikuma ku mutima ha kwinga mukowa mwene. Oho mutena wa shifupawenga shilolo wuyakiwe,

²⁷ Ndavita na bantu bendi bayile nakuziha myanda yibili ya Bafwilishitina. Watwalile bikonde byabo bya hambili kuli mwene pe wabilabilile nimwabyo kukwendi, ngayi mwanga enge mukowendi. Nohobene Shaulu wayekiwishile mwanendi Mikale kuli Ndavita.

²⁸ Shaulu walimukile shiwahewahe ngayi Nyambi ya Ngula wekalile hamo na Ndavita, kami ngayi mwanendi Mikale wamuhakile.

²⁹ Nohobene Shaulu watinine shikuma Ndavita, pe wengile kamalamo wa Ndavita mu kuyoya kwendi nimwako.

³⁰ Bakanzita ba Bafwilishitina bezilenga na kulwa, ngoboni mu nzita nimwayo Ndavita wabatweshele shikuma kupitakana babilolo bamina ba Shaulu. Pe Ndavita wayile mpupo shikuma.