1 Shamwele 17 - Libuka Lya Kuyela

Ndavita ukuziha Ngoliyati

¹ Bafwilishitina bakungulukilile mu Shoko, munzi wamu Yunda kwiza mu kulwa nzita, batulilile ku mwanya ukutumbiwa ngayi Efweshi Ndamima, mukati ka Shoko na Azeka.

² Shaulu na Baishalela bakungulukile niho batulilile mu mukulo wa Ela, muya baliwahishilile bya kulwisha Bafwilishitina.

³ Bafwilishitina bakwalamine ha lipili limo, Baishalela bakwalamine ha lipili lyamina, mukulo wapitile mukati kabo.

⁴ Pe nkongo watumbiwile ngayi Ngoliyati wamu munzi wa Ngati, watutikile mu munkungwa wa Bafwilishitina. Wengile wamutali shikuma kwakwipi na mamita ahatu.

⁵ Kami wavwalile shivwalo sha nzita sha lubemba shiya shafwanikiziwile wulemu washo ukushinga kulingana makilongilamu 57 na hoshi ya lubemba.

⁶ Mawulu wendi kami aholamine mu nkwabilo za lubemba, washimbile mpula yendi ya lubemba ha shifuzi.

⁷ Mushako wendi wengile wa wuliti ngonehe mukoko wa mulume, pe wulemu wa mulinga wendi wengile makilongilamu mutanu na abili. Mukanzita wendelenga kumbili yendi hinga ashimba likebo lyendi.

⁸ Ngoliyati wemanine na kubilikiza ku Baishalela ngayi, “Kati bishini mukutenda okwo? Munezi mu kukwalamina kulwa nzita ndi? Ami nengi Kafwilishitina, enu munengi bandungo za Shaulu. Hatenuho umo ha bantu benu eze mu kundwisha.

⁹ Ndi ukutwesha kunziha, pe tukenga bandungo zenu, ngoboni ndi ami nikumutwesha kumuziha, pe enu mukenga bandungo zetu.”

¹⁰ Niho Kafwilishitina ambile ngayi, “Kuno haya nikukoma bakanzita ba Baishalela. Mpanikenu mulume ngayi mwanga nilwe nendi.”

¹¹ Oho Shaulu na bantu bendi bayuvwile eshe, batinine.

Ndavita mu munkungwa wa Shaulu

¹² Ndavita wengile mwana Njeshe, wengile Kaefulata waku Mbetelehema mu Yunda. Njeshe wekalile na bana babalume mutanu na bahatu, ha shikati sha kulela kwa Shaulu, Njeshe wengile kakulukazi shikuma.

¹³ Bana ba Njeshe babalume bahatu babakulwane bayile na Shaulu ku nzita. Wamukulwane shikuma wengile Eliyambi, wakulundaminako wengile Ambinandambu, wawuhatu wengile Shama.

¹⁴ Ndavita niye wengile mukaala, pe bayayizendi babakulwane bahatu bayilenga na Shaulu,

¹⁵ Ndavita wafuminenga kuli Shaulu pe ha kuya kami ku Mbetelehema, mu kulisha bambelele batatiyendi ha shikati na shikati.

¹⁶ Ngoliyati wezilenga na kulimonekesha ku Baishalela ku lumenemene na lumenemene naku mazolo na mazolo ha matena makumi anaa.

¹⁷ Mutena umina Njeshe wambile kuli mwanendi Ndavita ngayi, “Shimba ntumba ya shitika ya mpeka za kuyoha na mipumpa likumi ya mankende, unyankupishilebyo ku munkungwa kuli bayayizobe.

¹⁸ Kami twala awa mahaha likumi a mafwi kuli shilolo wamukulwane wa bakanzita. Ukamone eshe ba kupinduka bayayizobe, wizeko na shilimukisho shiku monesha ngayi unakabamono ndi balishiwahe.

¹⁹ Mwene Shaulu na bayayizobe na Baishalela bamina nimwabo bali mu kashinzi ka Ela ba kulwa na Bafwilishitina.”

²⁰ Ndavita wapindukile lumenemene, washiyile muntu umo wakulama bambelele, washimbile byakulya pe wayile ngonehe amutongwezele Njeshe. Wakumine ku munkungwa shikati shiya bayilenga Baishalela mu kukwalama ku muhoko wabo wa nzita, babilikizile lukuwa lwa nzita.

²¹ Bakanzita ba Bafwilishitina na bakanzita ba Baishalela bakwalamine mu myanya yabo ya nzita hinga balitilamina.

²² Ndavita washiyile byakulya kuli shilolo mukakulama biyeko, niho etukilile ku muhoko wa nzita, wayile kuli bayayizendi, pe wepwile mpindukilo yabo.

²³ Oho ambilenga nabo, Ngoliyati Kafwilishitina waku Ngati wezile kumbili ya Baishalela, pe wambile mazu akulifweka na waya ambilenga ha kutatika. Kami Ndavita wamuyuvwile.

²⁴ Oho Baishalela bamonene Ngoliyati, betukile na kutina.

²⁵ Balyambishile mukati kabo ngayi, “Munamumono ou mulume uneziko? Unezi ngayi akome Ishalela. Mwene Shaulu unakulupishi kupanika ncuungu yayinene ku muntu ou ukatwesha kuziha Ngoliyati. Pe mwene ukamupana mwanendi wa mbuyama ngayi amuyeke, kami kuketabilisha balupashi lwa tatiyendi ngayi batele mutelo wufwako.”

²⁶ Ndavita wepwile bantu aba bekalile kwakwipi nendi ngayi, “Kati muntu ukaziha ou Kafwilishitina na kufumisha lihandu elye ku Ishalela ukatambula bishini? Kati yani ou Kafwilishitina wakubula kuya ku mukanda, unakuhandula nzita ya Nyambi wakuyoya?”

²⁷ Bamutongwezele ebye bikatendiwa ku muntu wakuziha Ngoliyati.

²⁸ Eliyambi, yayiyendi Ndavita wamweli wayuvwileko oho Ndavita ambilenga ku bantu. Wakalihilile shikuma Ndavita na kwamba kukwendi ngayi, “Kati unezi mukutenda bishini kuno? Yani haya ukulama bambelele bobe mu libelelengwa? Obe uli wakuliyemeza na kuluwa kwa mutima wobe wa wanuke. Unezi tuhu mu kushembuka nzita.”

²⁹ Ndavita wepwile ngayi, “Kati natende bishini? Kati kutwesha hinge kwipula liyipu nifwako ndi?”

³⁰ Watengulukilile ku muntu wamina na kwipula liyipu lyolyo limo ha shikati nimwasho epwilenga, pe bamukumbwilenga tuhu mu nzila yimo.

³¹ Bantu bamo bayuvwilenga ebye ambilenga Ndavita, pe batongwezele Shaulu, niho Shaulu ehanine Ndavita.

³² Ndavita wambile kuli Shaulu ngayi, “Bantu hinga balikekula kutina ou Kafwilishitina, nikaya na kumulwisha.”

³³ Shaulu wakumbwile Ndavita ngayi, “Byo, kutwesha kumulwisha wufwako, Obe ushili kanuke, mona, niye wabalikile mwaka kwinga mukanzita mu kuyoya kwendi nimwako.”

³⁴ Ndavita wambile kuli Shaulu ngayi, “Hekulu, ami nalaminenga bambelele ba batate. Shikati nimwasho oho shimbwi hinge ndi Mbeya akwatilengaho kana ka mbelele,

³⁵ namukonkelenga na kumulwisha na kumuyangula mwana mbelele. Kami ndi shimbwi hinge Mbeya ha kumfutulukila ngayi andwishe namukwatile ku mincukwe na kumukama pe ha kufwa.

³⁶ Mukamulimo wobe wazihile babimbwi na bambeya. Pe nisho nikatenda kami kuli ou Kafwilishitina wakubula kuya ku mukanda, ou na handulu nzita ya Nyambi wakuyoya.”

³⁷ Niho Ndavita ambile ngayi, “Nyambi ya Ngula ou wandamwinine ku manyala a babimbwi na ku manyala a mbeya, ukandamwina ku liboko lya nou Kafwilishitina.” Shaulu wakumbwile ngayi, “Shashiwahe, yanga, Nyambi ya Ngula mwanga akekale nobe hamo.”

³⁸ Wapanikile bivwalo byendi bya byondo kuli Ndavita ngayi avwale na hoshi ya lubemba, eye ayakile ku mutwe wa Ndavita na shikobelo sha shondo sha nzita.

³⁹ Ndavita wapakatile mukwale wendi hayilu ya bivwalo, pe wezekele kwenda, ngoboni kaliha watweshele, ndaba wabulile kwinzilila kubivwala. Wambile kuli Shaulu ngayi, “Kutwesha kulwa nanebye nifwako.” Nohobene Ndavita wabivulile nimwabyo.

⁴⁰ Washimbile muwana wendi wa wulishani, niho atolele mamanya mutanu akulembuka amu mushiinzi pe wawayakile mu mpamba yendi na shilangwa mu liboko lyendi, watutikile ha munkanda na kuliwana na Ngoliyati.

Ndavita ukukoma Ngoliyati

⁴¹ Ngoliyati watatikile kulishimbawila na Ndavita na mukakushimba likebo lyendi wendele kumbili yendi. Wamuhenyenene hahepi,

⁴² pe oho amonesheshele ngayi Ndavita wengile kanuke, wamulimbwilishile. Wengile kanuke wa kuyela ku lupala na wuwahe wakululama.

⁴³ Ngoliyati wambile kuli Ndavita ngayi, “Kati ninengi nili kawa oho ukwiza na shitondo kukwami ndi?” Ngoliyati niho akutwile Ndavita na makutwila a banyambi bendi.

⁴⁴ Wambile kuli Ndavita ngayi, “Yeka kuno kukwami, pe nikapanika lutu lwobe ku batuyoni naku tunzama ngayi bakalye.”

⁴⁵ Ndavita wakumbwile ngayi, “Unakwiza kukwami mu kundwisha na mukwale na mulinga na mpula, ngoboni ami nezi mu kukulwisha mu lizina lya Nyambi wa Makunge Nyambi wa nzita ya Ishalela, ou uli na kuhandula obe.

⁴⁶ Mutena wa lelo bene Nyambi ya Ngula ukukuyaka mu ngovu zami, nikukuhuba hanci na kuketula mutwe wobe. Pe nikapana mituntu ya bafu ba bakanzita ba Bafwilishitina ku batuyoni naku batuyamana bakayilye. Niho ba hano hanci nimwabo bakalimuka ngayi Baishalela bali na Nyambi yabo,

⁴⁷ pe bantu nimwabo bakalimuka ngayi Nyambi ya Ngula kaliha walamwinanga bantu bendi na mikwale hinge milinga, ndaba nzita yenga ya Nyambi ya Ngula. Nimwenu ukamiyaka mu ngovu zetu.”

⁴⁸ Ngoliyati watatikile kulishimbawila na Ndavita kami, pe Ndavita wetukilile wanguwangu na kushimbawila Kafwilishitina ku muhoko wa nzita mu kumulwisha.

⁴⁹ Ndavita wengizize liboko mu mpamba yendi, watolelemo limanya, niho apuhile Ngoliyati, pe lyamukamine mu lupala lwendi. Wawile na kukinka lupala hanci.

⁵⁰ Nohobene, Ndavita wakomene pe wazihile Ngoliyati na mpafwa na limanya, kwakubula mukwale.

⁵¹ Niho Ndavita etukilile kukwendi pe wemanine ha mutuntu wendi, wafumishile mukwale wa Ngoliyati mu shipushu shawo, pe wamuketwile mutwe na kumuziha. Oho Bafwilishitina bamonene ngayi nkongo yabo wafwakale, bayile lubilo.

⁵² Balume ba Ishalela na Yunda babatandile hiba kuwa mu nzila nimwayo kukakuma naku Ngati naku mapangati a Ekiloni. Bafwilishitina balemekiwile hibaya na kuwa mu nzila nimwayo ya kulumba ku Shalayima, kukakuma naku Ngati naku Ekiloni.

⁵³ Oho Baishalela babokele mu kutanda Bafwilishitina, bapukwile munkungwa wabo.

⁵⁴ Pe Ndavita watwalile mutwe wa Ngoliyati ku Yelushalema, ngoboni wakowezele bilwisho bya Ngoliyati mu ntanda yendi.

Ndavita ukuletiwa kuli Shaulu

⁵⁵ Oho Shaulu amonene Ndavita haya mu kulwisha Ngoliyati, wepwile Ambina mukulwane wa nzita yendi ngayi, “Ambina, kati ou unengi mwana yani?” Ambina wakumbwile ngayi, “Obe hekulu, ami kumulimuka nifwako.”

⁵⁶ Niho mwene Shaulu amutongwezele ngayi, “Yanga ukepwizize kati uya kanuke mwana yani.”

⁵⁷ Nohobene oho Ndavita abokele ku munkungwa ha kufuma mu kuziha Ngoliyati, Ambina wamutwalile kuli Shaulu, Ndavita hinga ashimba mutwe wa Ngoliyati mu maboko.

⁵⁸ Shaulu wamwipwile ngayi, “Kati uli mwana yani obe kanuke?” Ndavita wakumbwile ngayi, “Nili mwana mukamulimo wobe Njeshe waku Mbetelehema.”