1 Shamwele 16 - Libuka Lya Kuyela

Ndavita ukuwabishiwa kwinga mwene

¹ Nyambi ya Ngula wambile kuli Shamwele ngayi, “Kati ukulinyengela bishini shikati shashitali hali Shaulu, hiwumona ngayi namukanakale kwinga mwene wa Ishalela? Ngoboni haya leta mushashi wa mazi akuwaba pe uye ku Mbetelehema kuli muntu ukutumbiwa ngayi Njeshe, ndaba na hataho umo ha bana bendi babalume kwinga mwene.”

² Shamwele wepwile ngayi, “Nikutwesha kutenda nahiti noho? Ndi Shaulu ukuyuvwako, pe ukanziha.” Nyambi ya Ngula wakumbwile ngayi, “Shimba namani pe uye nendi, ukamba ngayi, ‘Ninezi kuno mu kukombelela nkombela kuli Nyambi ya Ngula.’

³ Yihana Njeshe ku nkombela, pe nikakutongweza eshe ukatenda. Ukawabisha mazi muntu ou nikutongweza kwinga mwene.”

⁴ Shamwele watendele eshe amutongwezele Nyambi ya Ngula, pe wayile ku Mbetelehema, bakakutwaminina munzi bezile na kumushimbawila hibalikankila, pe bepwile ngayi, “Kati oku kunengi kuzingula kwa ku mwena ndi?”

⁵ Niye wakumbwile ngayi, “Ee, mu ku mwena, nezi mu kukombelela nkombela kuli Nyambi ya Ngula. Liyeleshenu enu bamwine pe tuye hamo na nami mu kukombelela.” Kami watongwezele Njeshe na bana bendi babalume kuliyelesha nibo bamwine, pe wabehanine ku nkombela.

⁶ Oho bakumine, Shamwele wamonene mwana Njeshe wa mulume Eliyambi, walyambishile niyemwine ngayi, “Ou muntu unemana kuno ku meho a Nyambi ya Ngula mwa shikuma niye bene muntu anahata.”

⁷ Ngoboni Nyambi ya Ngula wambile kuli Shamwele ngayi, “Hinga utilamina ku wutali naku wuwahe alinawo. Namukana, ndaba kuyata ngonehe ayatanga muntu nifwako. Muntu watilaminanga ha munkanda washifwekesha, ngoboni ami natilaminanga mu mutima.”

⁸ Niho Njeshe ehanine mwanendi wa mulume Ambinandambu pe wamuletele kuli Shamwele. Ngoboni Shamwele wambile ngayi, “Byo, ou kaliha niye anahata Nyambi ya Ngula.”

⁹ Niho Njeshe aletele Shama. Shamwele wambile ngayi, “Byo, ou kami kaliha niye anahata Nyambi ya Ngula.”

¹⁰ Mu nzila eye Njeshe waletele bana bendi babalume mutanu na babili kuli Shamwele. Ngoboni Shamwele wambile kukwendi ngayi, “Byo, Nyambi ya Ngula ku bahata wufwako.”

¹¹ Niho amwipwile ngayi, “Kati bababene nibo bana bobe babalume ndi?” Njeshe wakumbwile ngayi, “Kunashala tuhu umo wa kanuke, ngoboni unayi na kulama bambelele.” Shamwele wambile ngayi, “Tuma muntu akamwihane, ndaba kukombelela nkombela tufwako hantu unezi.”

¹² Nohobene Njeshe wamutuminine muntu, niho amuletele. Wengile ndumbana wamuwahe, wakukanca, kami meho wendi engile amawahe shikuma. Nyambi ya Ngula wambile kuli Shamwele ngayi, “Niye bene owe, katuka umuwabishe mazi.”

¹³ Shamwele washimbile mushashi wa mazi akuwaba pe wawabishile Ndavita mukati ka bayayizendi. Wanguwangu Moyo wa Nyambi ya Ngula wezile hali Ndavita na ngovu zazinene, pe wekalile nendi ku balika ha mutena uyo na kutwalililaho. Niho Shamwele abokele ku Lama.

Ndavita mu shinzanza sha Shaulu

¹⁴ Moyo wa Nyambi ya Ngula wafumine muli Shaulu, kami mayimbwe atumine Nyambi ya Ngula amuyandishile.

¹⁵ Bakamilimo bendi bambile kukwendi ngayi, “Tukulimuka ngayi mayimbwe anatumu Nyambi ya Ngula niwo akukuyandisha.

¹⁶ Nohobene obe hekulu, twitabilishe tuye na ku kushingila muntu ou walimuka sha kumbeta halipu. Oho mayimbwe akakutukukisha, pe muntu ukatwesha kumbeta halipu yendi, pe ukekalako kami shiwahe.”

¹⁷ Shaulu wabatongwezele ngayi, “Kamundetelenu owo muntu walimuka sha kumbeta halipu shiwahe.”

¹⁸ Muntu umo wa bakamilimo bendi wambile ngayi, “Njeshe waku munzi wa Mbetelehema uli na mwanendi wa mulume ou walimuka sha kumbeta halipu. Kami nengi wakukanca, kami muntu wamuwahe, mukakulwa wakushuma, kami wenga muntu wakutwesha kwamba. Kami Nyambi ya Ngula uli hamo nendi.”

¹⁹ Nohobene Shaulu watumine bantumwana kuli Njeshe ngayi, “Ntumine mwanobe wa mulume Ndavita, ou walamanga bambelele.”

²⁰ Njeshe watumine Ndavita kuya kuli Shaulu na kana ka mpongo na mbongolo atwikile mankende na mbokoshi ya shitembe sha kunyuka ya kwinzala na waine.

²¹ Ndavita wezile kuli Shaulu, niho enginine mulimo. Pe Shaulu wamuhakile shikuma, niho amuhatile kwinga muntu mukakushimba bilwisho byendi.

²² Niho Shaulu atumine lizu kuli Njeshe ngayi, “Nawahilili na Ndavita, mulehe ekale mu mulimo wami kuno.”

²³ Ku balika hano na kuya kumbili, oho mayimbwe atumine Nyambi ya Ngula atukukishilenga Shaulu, Ndavita washimbilenga halipu kendi na kukambeta. Pe mayimbwe hi akufuma kukwendi, niho haya Shaulu atweshe kuliyuvwa shiwahe na kwikala shiwahe kami.