1 Shamwele 14 - Libuka Lya Kuyela

Kukanca kwa Yonatana

¹ Mutena umo Yonatana mwana Shaulu wambile kuli ndumbana ou washimbilenga bilwisho byendi ngayi, “Toko tuzabukile mu nciza ku munkungwa wa Bafwilishitina.” Ngoboni Yonatana kaliha watongwezele tatiyendi Shaulu.

² Shaulu wekalilenga mu nceto ya mutondo wa manzenze mu Mingiloni hahepi na Ngimbiya. Wekalile na bantu ba kulingana 600.

³ Hamo na mukankombela wamukulwane Ahiya mwana Ahitumbi yayiyendi Ikabondi, ou wengile mwana Fwinihashi wa mulume, muzukulya Eli, mukankombela wa Nyambi ya Ngula mu Shilo, ou wavwalilenga kakobelo kakepi kashizila. Kami bantu kaliha balimukile ngayi Yonatana nayi.

⁴ Mu nzila ya Mikemashi, eye apitile Yonatana ngayi akakume ku munkungwa wa Bafwilishitina, mwekalile mamanya abili amanene akushongoloka, limo ku mbalila yimo, lyamina ku mbalila yamina ya nzila, limo lyatumbiwile ngayi Mbozeza, lyamina lyatumbiwile ngayi Shene.

⁵ Limo lyekalile ku mbalila ya ncelele kuya nzila, kuliyahikiza na Mikemashi, pe lyamina lyekalile ku mbalila ya mabukubuku kuliyahikiza na Ngemba.

⁶ Yonatana wambile kuli ndumbana uya washimbile bilwisho byendi ngayi, “Tuyenga tuzabukile ku munkungwa wa baya Bafwilishitina bakubula kuya ku mukanda. Kampe Nyambi ya Ngula ukatuyavwa. Ndi ukatuyavwa, howa shuma sha kumukanisha kutupana kukoma, howa mulandu hinge twingi babashe.”

⁷ Ndumbana wakumbwile ngayi, “Tenda eshe shili mu mutima wobe nami nili hamo na nobe, ebye bili mu mutima wobe nibyo bili mumwami.”

⁸ Yonatana wambile ngayi, “Shashiwahe. Tukaya nahiya nakuzabukila mu nciza bakatumone Bafwilishitina.

⁹ Ndi ba kututongweza ngayi, ‘Tutatilenu hantu tunezi kukwenu,’ pe tukekala kuno tuli, kukaya kukwabo tufwako.

¹⁰ Ngoboni ndi ba kututongweza ngayi, ‘Yekenu kuno kukwetu,’ pe tukaya kukwabo, ndaba shiyo shikenga shilimukisho shiya anatupaniki Nyambi ya Ngula sha kubakoma.”

¹¹ Nohobene Yonatana na ndumbana bekalile ha kuyela ngayi batweshe kubamona, pe Bafwilishitina bambile ngayi, “Penzenu, Bahebelu bamo banatutiki mu mawina omu baholaminenga.”

¹² Niho behanine Yonatana na ndumbana ngayi, “Yekenu kuno, tuli na shuma sha kumitongweza.” Yonatana wambile kuli ndumbana ngayi, “Nkonke, ndaba Nyambi ya Ngula unabapaniki mu maboko a Baishalela ngayi babakome.”

¹³ Yonatana wakankalalile hayilu hakalaba, niho ndumbana washimbile bilwisho wamukonkelenga. Bafwilishitina bawililenga hanci ku mawulu a Yonatana, pe ndumbana wabazihile.

¹⁴ Mu mponde eye ya kutatika Yonatana na ndumbana bazihile bantu makumi abili mu mwanya wawushe.

¹⁵ Bafwilishitina nimwabo bekalile mu mfuba na mu munkungwa batinine, bakakulwa na bakanzita bakankile na kwikala na bowa. Hanci hakankile, pe kwekalile kampwe kakanene shikuma oku Nyambi atumine.

Kukomiwa kwa Bafwilishitina

¹⁶ Bakakulama ba Shaulu, ku Ngimbiya mu litunga lya Mbenjamani, bamonene Bafwilishitina hibetuka na kukabakana.

¹⁷ Niho Shaulu ambile ku bantu bendi ngayi, “Labenu bakanzita pe muwane ngayi yani unabulukuho.” Batendele noho pe bawanine ngayi Yonatana na ndumbana ou washimbilenga bilwisho byendi banabulukuho.

¹⁸ Shaulu wambile kuli mukankombela Ahiya ngayi, “Leta Likwati lya Kulimama lya Nyambi kuno.” (Ha mutena uyo Ahiya washimbilengalyo kumbili ya Baishalela.)

¹⁹ Oho Shaulu ambilenga kuli mukankombela, lumpa lwamu munkungwa wa Bafwilishitina lwabipile shikuma, nohobene Shaulu wambile kukwendi ngayi, “Kowa shikati sha kuya mukwipwiziza kuli Nyambi ya Ngula.”

²⁰ Niho Shaulu na bantu bendi bayile ku nzita mu kulwisha Bafwilishitina aba balilwishilenga umo na wamina na lumpa lwalunene.

²¹ Bahebelu baya bekalilenga na Bafwilishitina, baya bezile hamo nabo na kwikala nabo ku munkungwa, balibelulwile na kufutuka, pe balifungilile na Shaulu na Yonatana.

²² Oho Baishalela nimwabo, aba baholaminenga mu mapili a Efulemu, bayuvwile ngayi Bafwilishitina banakuya lubilo, nohobene nibo kami balifungilile hamo na kulwisha Bafwilishitina.

²³ Balwile nzila nimwayo kukapitakana naku Mbeti Abeni. Nyambi ya Ngula ha mutena uyo walamwinine Ishalela.

Byamonekele kunyima ya nzita

²⁴ Baishalela bapopele na nzala mutena uyo, ndaba Shaulu wahahile luhaho lwa kwamba ngayi, “Muntu nimwendi ukulya shinge sha kulya ngani ha mutena walelo oho shilolo nibweshele wubi ku wubi, ukakaula ku mbeza.” Nohobene kaliha kwekalile umo walile sha kulya.

²⁵ Nimwabo bezile mu lishaka lya kuzika, pe bawanine wushi nimwamo.

²⁶ Lishaka lyenzalile na wushi, ngoboni kaliha kwekalile muntu walileko hinge kani ndaba nimwabo batinine mbeza za Shaulu.

²⁷ Ngoboni Yonatana kaliha wayuvwile eshe ambilenga tatiyendi na mbeza ku bantu. Nohobene washonkele lunkwanca olwe ashimbile ha shimbumba sha wushi. Pe wayakile wushi mu liboko lyendi na kulya. Wanguwangu waliyuvwile shiwahe.

²⁸ Ngoboni muntu umo wamutongwezele ngayi, “Nimwetu tunapopo na nzala, ngoboni tatiyobe watwambililenga na mbeza, pe wambile ngayi, ‘Muntu nimwendi ou ukulya sha kulya nimwasho lelo ukukaula ku mbeza.’”

²⁹ Niho Yonatana akumbwile ngayi, “Tate unatende shuma shashikalu ku bantu betu! Monenu haya, hano naliyuvwakale shiwahe ndaba ninali wushi.

³⁰ Wunengi wuwahe wanahiti ukwikalako lelo shinga bantu betu banali byakulya ebye bashimbile oho nibo bakomene bamalamo. Hanganikenu ngayi shinga Bafwilishitina banazihiwi banga!”

³¹ Ha mutena uyo Baishalela bakomene Bafwilishitina, babalwishile mu nzila nimwayo ku balika ku Mikemashi kukuma naku Ayaloni. Ku shikati shiyo Baishalela bapopele shikuma na nzala,

³² kami nibo betukilile kunebye bapukwile ku bamalamo, bashimbile bambelele na zingombe, babizihile hoho. Pe balile nyama na mukeza wayo.

³³ Niho batongwezele Shaulu ngayi, “Mona taha, bantu bana Kubipisha kuli Nyambi ya Ngula ha kulya nyama na mukeza wayo.” Shaulu wabilikizile ngayi, “Munabipishi! Munakiluku Kulimama kwa Nyambi ya Ngula. Andumwinenu limanya lyalinene kuno kukwami.”

³⁴ Niho abatongwezele kami ngayi, “Yenunga mukati ka bantu pe muka batongweze nimwabo ngayi, muntu nimwendi alete kuno ngombe yendi na mbelele wendi. Niho mukeza na ku baziha na kubilila kuno, ngayi kubule wakubipishila Nyambi ya Ngula ha kulya nyama na mukeza wayo.” Nohobene wushiku uyo nimwabo baletele zingombe zabo nakuzizihila kuyo.

³⁵ Shaulu wazikile kaala kuli Nyambi ya Ngula, aka niko kengile kakutatika azikile.

³⁶ Shaulu wambile ku bantu bendi ngayi, “Tuyenunga na kulwisha Bafwilishitina uno wushiku na kubapukula kutwala ku lumenemene, pe tukabazihe nimwabo.” Bakumbwile ngayi, “Tenda nimwasho eshe ukuhanganika ngayi shinawaha shikuma.” Ngoboni mukankombela wambile ngayi, “Twipwizizenu taha kuli Nyambi ya Ngula.”

³⁷ Pe Shaulu wepwizizile Nyambi ya Ngula ngayi, “Kati niye mu kulwisha Bafwilishitina ndi? Kati ukatupanikabo ngayi tubakome ndi?” Ngoboni Nyambi ya Ngula kaliha wakumbwile ha mutena uyo.

³⁸ Niho Shaulu ambile ngayi, “Henyenu kuno enu bakakutwaminina bantu, ngayi tushingishishe na kuwana ebye twabipishakale ku mutena walelo.

³⁹ Nikulibeza na Nyambi Wakuyoya, ou wapulwishanga Baishalela, ngayi mukamulandu azihiwe, hingebene ndi nengi mwanami Yonatana.” Ngoboni kowa muntu wambileho shuma shamina.

⁴⁰ Niho Shaulu ambile ku Baishalela nimwabo ngayi, “Nimwenu kemaninenu kuyo, pe Yonatana na nami tukemane kuno.” Bakumbwile ngayi, “Tenda nimwasho eshe ukuhanganika ngayi shinawaha.”

⁴¹ Shaulu wambile kuli Nyambi ya Ngula, Nyambi wa Ishalela ngayi, “Obe Nyambi ya Ngula, kati shumangani eshe unabulili kunkumbula ku mutena walelo? Obe Nyambi ya Ngula, obe Nyambi wa Ishalela, ndi mulandu unengi wa Yonatana hinge ndi wami, kumbula na Ulimu, ngoboni ndi unengi waku bantu bobe Baishalela, kumbula na Tumimi.” Kukumbula kwenikile Yonatana na Shaulu, pe bantu bashambile.

⁴² Niho Shaulu ambile ngayi, “Yata mukati kanami na mwanami Yonatana.” Pe Yonatana wemikiwile.

⁴³ Niho Shaulu epwile Yonatana ngayi, “Kati unatende bishini?” Yonatana wakumbwile ngayi, “Nalile ku wushi kani kunkumo ya lumfwanca na kwatile mu liboko lyami. Ami uno nalitupulu kufwa.”

⁴⁴ Shaulu wambile kukwendi ngayi, “Mwanga Nyambi yami ankame nifwe, ndi obe Yonatana kuzihiwa wufwako.”

⁴⁵ Ngoboni bantu bambile kuli Shaulu ngayi, “Kati ou Yonatana, unalete kupuluka kwakunene mu Ishalela uku fwanina kuzihiwa ndi? Byo! Tukulikulupisha na Nyambi Wakuyoya ngayi kukayawa luhuki lumo ku mutwe wendi wufwako. Ebye anatende lelo byatendiwi na kuyavwa kwa Nyambi ya Ngula.” Nohobene bantu balamwinine Yonatana ngayi hinga azihiwa.

⁴⁶ Niho Shaulu alehelesho kutanda Bafwilishitina, pe Bafwilishitina babokele ku litunga lyabo.

Kulela kwa Shaulu na ba lupashi lwendi

⁴⁷ Oho Shaulu wengakale mwene wa Ishalela, walwishile bamalamo bendi nimwabo ku zimbalila nimwazo, walwishile bantu ba ku Mowambi na ba ku Amoni na ba ku Endoma na kulwisha bamyene ba ku Zomba hamo na Bafwilishitina. Nimwako oku alwililile, kwekalile kukoma.

⁴⁸ Walwile na kukanca pe wakomene kami na bantu ba ku Amaleki. Walamwinine Baishalela ku baya babalwishilenga nimwabo.

⁴⁹ Bana ba Shaulu babalume bengile Yonatana na Ishivi na Malikishuwa. Mwanendi wamukulwane wamukazi watumbiwile ngayi Melambu na lizina lya wakanuke Mikale.

⁵⁰ Mukaza Shaulu wengile Ahinoma, mwana Ahimayazi. Nkongo wa bakanzita yendi wengile mufwala wendi Ambina, mwana kanyantu kendi Nela.

⁵¹ Kishi wengile tata Shaulu na Nela wengile tata Ambina, Kishi na Ambina bengile bana ba Ambiyale.

⁵² Matena nimwawo akuyoya kwa Shaulu walwishilenga Bafwilishitina shikuma na ngovu. Pe oho Shaulu awaninenga muntu wa ngovu hinge wakukanca wamuyakilenga ku kazunga ka nzita yendi.