1 Shamwele 12 - Libuka Lya Kuyela

Lizu lya Shamwele lya kulaya

¹ Niho Shamwele ambile ku bantu ba Ishalela ngayi, “Natende ebye mwanyepele ngayi nibitende. Namipaniki mwene wakumilela.

² Monenu haya, mwene owe ukamitwaminina. Neheboni ami na kulakale hinili na nzimvwi ku mutwe too, kami mu kushala na bana bami babalume. Ku balika kuwanuke wami kukuma naku lelo nenganga mukakumitwaminina.

³ Ami uno. Ndi natendele shuma sha shibi, nyeneshenu haya ku meho a Nyambi ya Ngula na kuli wakuwabishiwa ou anahata. Kati nashimbile ngombe ya yani, hinge mbongolo wa yani? Kati yani nakeyelele hinge kuyandisha? Kati natambwile lizika kanwa kuli yani? Ndi natendele Byumangani ha byuma ebye, pe nikahingishamo byashenge kunebye nashimbileko.”

⁴ Bantu bakumbwile ngayi, “Byo, kaliha watukeyelele hinge kutuyandisha. Kaliha washimbile hinge shumangani ku muntu umo.”

⁵ Shamwele wakumbwile ngayi, “Nyambi ya Ngula na wakuwabishiwa ou anahata lelo bakwinga bapaki ngayi munangwana wakubula mulandu.” Bakumbwile ngayi, “Ee, Nyambi ya Ngula unengi paki yetu.”

⁶ Pe Shamwele wambile kami ngayi, “Nyambi ya Ngula nengi paki, ou wemikile Moshesha na Aloni kami wafumishile bankakazenu mu Engepita.

⁷ Haya nyimaninenu taha, mwanga nimiyeneshe ku meho a Nyambi ya Ngula ha kunyanukisha ntendelo nimwayo ya ngovu eye atendele Nyambi ya Ngula mu kumilamwina na bankakazenu.

⁸ Oho Yakobo na ba lupashi lwendi bekalilenga ku Engepita, Baengepita babayandishilenga Baishalela, pe bankakazenu bakalokelelenga kuli Nyambi ya Ngula kushinga kuyavwiwa, niho atumine Moshesha na Aloni, aba bafumishile bankakazenu mu Engepita na kubazikisha mu litunga lino.

⁹ Ngoboni bavulamine Nyambi ya Ngula, Nyambi yabo. Pe Nyambi wetabilishile Bafwilishitina na mwene waku Mowambi na Shishela nkongo wa bakanzita bamu lukena lwa Hazola kulwisha bankakazenu na ku bakoma.

¹⁰ Niho bakalokelele kuli Nyambi ya Ngula na kushinga kuyavwiwa pe bambile ngayi, ‘Tunabipishi ndaba tunakana Nyambi ya Ngula na kulemesha tunankishi twa Mbaalu na Ashitaloti, ngoboni haya tulamwine ku bamalamo betu pe tukakulemesha.’

¹¹ Nyambi ya Ngula watumine Yelumbaalu na Mbendani na Yefwita na nami Shamwele, muntu na muntu hakatiketu wamilamwinine ku bamalamo benu, pe mwayoyele shiwahe.

¹² Ngoboni oho mwamonene uya mwene Nahashi waku Amoni ukushinga kumi katukila mutakwe, mwalimbwilile Nyambi ya Ngula kwinga mwene yenu, pe mwambile kukwami ngayi, ‘Tukushinga mwene wakutulela.’

¹³ “Haya uno niye mwene uya mwahatile, mwamunyepele, haya Nyambi ya Ngula unamipanaye.

¹⁴ Ndi mukutina Nyambi ya Ngula, Nyambi yenu na kumutendela milimo na kuyuvwilila kukwendi na kwombatala ndayano zendi, kami ndi enu na mwene yenu mu kumukonka, pe nimwabyo bikenda shiwahe kukwenu.

¹⁵ Ngoboni ndi kuyuvwilila kuli Nyambi ya Ngula mufwako, pe himukulimbulula ndayano zendi, Nyambi ya Ngula ukamilwisha hamo na mwene yenu.

¹⁶ Haya, nyimaninenu taha, pe mukamona byuma byabinene ebye akutenda Nyambi ya Ngula ku meho wenu.

¹⁷ Mulimuka ngayi yino hi mvumbi, kami mvula kuloka shikati ufwako. Ngoboni nikehana kuli Nyambi ya Ngula mwanga akakalihe ngo mishika ya mvula, pe mukalimuke ngayi munabipishi shikuma na kulwisha Nyambi ya Ngula oho mwamunyepele mwene.”

¹⁸ Nohobene Shamwele walombelele, pe wa uyo mutena bene Nyambi ya Ngula wakalihile ngo mushika wa mvula. Niho bantu nimwabo batinine Nyambi ya Ngula na Shamwele.

¹⁹ Bambile kuli Shamwele ngayi, “Hekulu, tulombelele kuli Nyambi ya Ngula, Nyambi yobe ngayi mwanga tubule kufwa. Haya tukulimuka ngayi kufungila ku wubi wetu wamina nimwawo twatenda, twabipishile kami ha kunyepa mwene.”

²⁰ Shamwele wakumbwile ngayi, “Hinga mutina, hinge ndi munatende shuma sha shibi sha nehe, hinga mushanukila kwashenge kufuma kuli Nyambi ya Ngula, ngoboni mulemeshenu na mitima yenu nimwayo.

²¹ Hinga mu kulemesha banyambi bowa baya bakubula kutwesha kumiyavwa hinge kumi lamwina, ndaba nibo kaliha benga bashemwa.

²² Nyambi ya Ngula unahaha luhaho lwa shikulupisho ngayi kukamishiya wufwako, ndaba ya lizina lyendi lyalinene ndaba shinawahilishi Nyambi ya Ngula ha kumingisha bantu bendi.

²³ Nehiboni ami, nifwako kushinga kutenda wubi kuli Nyambi ya Ngula, ndi nikaleha kumi lombelela, pe Nyambi ya Ngula akancushule. Ngoboni, nikamilongesha byabiwahe nanebye bya kupwisha ngayi mukabitendenga.

²⁴ Ombatalenu Nyambi ya Ngula, mulemeshenu mu kwoloka na mitima yenu nimwayo. Hanganikenu byuma byabinene ebye anamitendele.

²⁵ Ngoboni, ndi enu mukazamina Kubipisha, mukalobeshiwa hamo na mwene yenu.”