1 Shamwele 10 - Libuka Lya Kuyela

¹ Niho Shamwele ashimbile mushashi wa mazi akuwaba pe wawayitilile ha mutwe wa Shaulu. Wamuzupezele, niho ambile ngayi, “Nyambi ya Ngula unakuwabishi kwinga ntwamina ha bantu bendi ba Ishalela. Ukalela bantu bendi na kubalama ku bamalamo babo. Pe eshe shikuku monesha ngayi Nyambi ya Ngula unakuhata kwinga kalela ka bantu bendi.

² Oho ukufuma kuno kukwami lelo, ukalihangana na balume babili kwakwipi na shinzimbi sha Lakele ku Zelaza mu litunga lya Mbenjamani. Bakakutongweza ngayi bambongolo baya washinganga banawaniwi, nohobene tatiyobe kuliyakata kami hahabo wufwako, ngoboni unaliyakata tuhu hahobe, pe uli na kwipozola ngayi, ‘Kati nikatenda nahiti hali mwanami?’

³ Wakafuma kuyo ukayenga hantu unakakumu ku mutondo wa Oka waku Tambola, oku ukawana balume bahatu hibaya ku Mbetele mu kukombelela nkombela kuli Nyambi. Umo wakukwabo ukwendesha twana twa bampongo twatushe tuhatu, wamina unashimbi mipumpa yihatu ya mankende, kami wawuhatu unashimbi mushashi wa waine.

⁴ Bakakushangwisha na kukupanika mipumpa yibili ya mankende, pe ukawatambule.

⁵ Niho ukaya ku lipili lya Nyambi mu Ngimbiya, omu muli munkungwa wa Bafwilishitina. Kumenginino a munzi ukalihangana na litanga lya bamiluwe ba Nyambi hiba kunkuluka kufuma ku kaala ha lipili, hibambeta tumbuli na tuncingili na zingoma na tunamitolilo twatushe, hibashinda naku wulumwina tunkelenkele.

⁶ Niho Moyo wa Nyambi ya Ngula wukeza hahobe shawangu, pe ukalifungila nabo mu kushinda kwabo na kuwulumwina, pe ukafutuka hi muntu washenge.

⁷ Oho byuma ebye byakamoneka, tenda shuma nimwasho shinafwanini hashikati osho, ndaba Nyambi ulinanobe.

⁸ Obe ukalimeneka kumbili yami ku Ngilingale, oku nika kuwana na kutupula zinkombela za kuhokesha na zinkombela za kulilumikila. Kantatilile kuyo matena mutanu na abili hantu nezi na kukutongweza sha kutenda.”

⁹ Oho Shaulu ashiyile Shamwele, Nyambi wapanikile Shaulu mutima wawupya. Byuma nimwabyo amutongwezele Shamwele byamonekele ha mutena uyo.

¹⁰ Oho Shaulu na mukamulimo wendi bakumine ku Ngimbiya, likunge lya bamiluwe ba Nyambi bamuwanine, Moyo wa Nyambi wezile hahendi, pe washindile nabo na kuwulumwina tunkelenkele.

¹¹ Bantu aba bamulimukilenga ha kutatika oho bamumonene hatenda nehe, balipwile umo na wamina ngayi, “Kati shumangani shinatendiwi hali mwana Kishi wa mulume? Kati Shaulu wengakale himuluwe wa Nyambi ndi?”

¹² Muntu umo wekalilenga kuyo wepwile ngayi, “Kati muntu ukutwesha kwinga muluwe, hinge ndi tatiyendi kumulimuka tufwako ndi?” Kati Shaulu wengakale himuluwe wa Nyambi ndi?

¹³ Oho Shaulu amanishile ku shinda na kuwulumwina tunkelenkele, wakankalalile hayilu ha kaala.

¹⁴ Kanyantu ka Shaulu wamwipwile hamo na mukamulimo wendi ngayi, “Kati mwayile kuti?” Shaulu wakumbwile ngayi, “Twayile na kushinga bambongolo, oho twabulile kubawana, twayile na ku mona Shamwele.”

¹⁵ Kanyantu ka Shaulu wambile ngayi, “Nakukunyepa ngayi untongwezeko ebye Shamwele anamba kukwobe.”

¹⁶ Shaulu wakumbwile ngayi, “Watutongwezele ngayi ‘Bambongolo banawaniwi.’” Ngoboni Shaulu kaliha watongwezele kanyantu kendi ebye ambile Shamwele ngayi ukenga mwene.

Shaulu ukuyakiwa ha wene

¹⁷ Shamwele wehanine bantu hamo ku Mizipa ku shikungulukilo kuli Nyambi ya Ngula,

¹⁸ pe wambile kukwabo ngayi, “Nyambi ya Ngula, Nyambi wa Ishalela ukwamba ngayi, ‘Namifumishile mu Engepita na kumi lamwina ku Baengepita naku bantu nimwabo bamina aba bamiyandishilenga.

¹⁹ Ami nengi Nyambi yenu, ou wamilamwininenga ku makando wenu naku wukalu, ngoboni lelo munankana na kunyepa ngayi nimipane mwene.’ Haya shashiwahe, likungulenu enu bamwine ku meho a Nyambi ya Ngula ku mishobo naku mavumo.”

²⁰ Niho Shamwele ehanine mishobo nimwayo ya Ishalela hahepi, pe ha kukuna nyela, Nyambi ya Ngula wahatileho mushobo wa Mbenjamani.

²¹ Niho Shamwele ehanine ba lupashi lwa mushobo wa Mbenjamani. Oho bezile kumbili, ba lupashi lwa Matili bahatiwile na nyela. Nohobene bantu ba lupashi lwa Matili bezile kumbili muntu na muntu, pe Shaulu mwana Kishi wa mulume wahatiwileho na nyela. Ngoboni oho bamushingilenga, babulile kumuwana.

²² Pe bepwile Nyambi ya Ngula ngayi, “Kati ou muntu ulikuti?” Nyambi ya Ngula wakumbwile ngayi, “Shaulu kwali kuyo, unaholama mukati ka biyeko.”

²³ Nohobene betukile niho baletele Shaulu ku bantu, kami oho emanine mukati ka bantu, wengile wamutali kupitakana bantu nimwabo.

²⁴ Shamwele wambile ku bantu ngayi, “Uno niye muntu anahata Nyambi ya Ngula. Kowa muntu kami hakatiketu wakumufweka.” Pe bantu nimwabo babilikizile ngayi, “Uyoye myaka yayingi, obe mwene.”

²⁵ Niho Shamwele atontwelelele bantu bya ngovu na milimo ya mwene, pe wabitikitile mu libuka elye lyayakiwile mu mwanya wakuzila. Niho abweshele bantu nimwabo ku minzi yabo.

²⁶ Shaulu naniye kami wabokele kukwabo ku Ngimbiya. Bantu bamina bangovu baya Nyambi ayakile mutima, bayile hamo nendi.

²⁷ Ngoboni bantu bamina babihulahuli bambile ngayi, “Ou muntu wanehe ukutwesha nahiti kutenda byabiwahe kukwetu?” Bahandwile Shaulu, kami kaliha bamupanikilenga zintupu. Ngoboni Shaulu kaliha watwalileko mutima.