1 Shamwele 1 - Libuka Lya Kuyela

Elikana na ba lupashi lwendi ku Shilo

¹ Kwekalile mulume umo lizina lyendi Elikana waku mushobo wa Efulemu, ou wazikilenga mu munzi wa Lama mu litunga lya binkanda ku Efulemu. Wengile mwana Yelohama wa mulume muzukulya Elihu, waku ba lupashi lwa Tohu, wa ku livumo lya Zufu.

² Elikana wekalile na bakazendi babili, Hana na Penina. Penina wekalile na bana ngoboni Hana wengile mumba.

³ Ha mwaka ha mwaka Elikana wafuminenga ku Lama kuya ku Shilo mu kulemesha na kukombelela nkombela kuli Nyambi wa Makunge. Oku kwekalile bana ba Eli babalume babili ba Hofwini na Fwinihashi, bengile bakankombela ba Nyambi ya Ngula.

⁴ Ha shikati na shikati Elikana wakombelelenga nkombela yendi, wapaninenga shitapilo shimo sha nyama kuli Penina, bitapilo byamina wapaninenga ku umo na umo wa bana bendi.

⁵ Hinge ndi wahakile Hana shikuma, wamupanikilenga tuhu shitapilo shashinene, ndaba Nyambi ya Ngula wamwingishile mumba.

⁶ Mukalihungu lyendi Penina wamuyandishilenga shikuma na kumupilamisha, ndaba Nyambi ya Ngula wamukanishile kubeleka.

⁷ Nohobene eshe shatendiwilenga ha mwaka ha mwaka shikati nimwasho oho bayilenga ku Litala lya Nyambi ya Ngula, Penina wapilamishilenga Hana shikuma, hamina walililenga na kukana kulya byakulya.

⁸ Mukokwendi Elikana wamwipwilenga ngayi, “Obe Hana kati shumangani eshe ukulililanga? Shumangani ukukaninanga kulya? Kami shumangani uku moneka kuhomba shikati nimwasho? Kati ami kupitakana bana babalume likumi nifwako oho nili hamo nanobe ndi?”

Hana na Eli

⁹ Ha shikati shimo, munyima oho bamanishakale kulya na kunwa mu Litala lya Nyambi ya Ngula ku Shilo, Mukankombela Eli wekalilenga mu mwanya wendi ku shipana sha Litala lya Nyambi ya Ngula. Hana wakatukile,

¹⁰ pe wekalile na kulishoshota shikuma, kami walilile shikuma oho alombelelenga kuli Nyambi ya Ngula.

¹¹ Hana walibezele lubeza lwa shikulupisho ngayi, “Obe Nyambi wa Makunge shinga ukupenza ha makando wami ami mukamulimo wobe wa mbuyama, kami nyanuke na kubula kumvulama. Ndi ukumpanika mwana wa mulume, nikulibeza ngayi nikamufungwila kukwobe mu kuyoya kwendi nimwako, hinga mwaka akatanga ku shehiwa huki zendi.”

¹² Hana wazaminine kulombela kuli Nyambi ya Ngula shikati shashitali, Eli watoshele mivumbo yendi.

¹³ Hana walombelelelenga mu mutima, mivumbo yendi tuhu niyo yanyenkaninenga, ngoboni lizu kaliha lyayuvwanikile. Nohobene Eli wahanganikile ngayi ou mbuyama nakolwo.

¹⁴ Wambile kuli mbuyama ngayi, “Leha kulimonekeshanga obemwine ngayi unakolwo. Leha ku nwanga waine, mwanga ukololoke.”

¹⁵ Hana wakumbwile ngayi, “Byo, ami kukolwa nifwako hekulu, kaliha nanwanga. Ami nengi mbuyama wa makando nalombelenga na kuyaka makando wami kuli Nyambi ya Ngula.

¹⁶ Hinga uhanganika ngayi ninengi mbuyama wa shihulahuli. Nalombelanga nehe ndaba ninengi mukakuyanda shikuma.”

¹⁷ Eli wakumbwile ngayi, “Yanga mu ku mwena, Nyambi wa Ishalela mwanga akupane ebye unamunyepe.”

¹⁸ Mbuyama wakumbwile ngayi, “Mwanga mukamulimo wobe ayamiziziwe kukwobe.” Niho Hana akatukile wayile kukwabo, niho akalile byakulya, kami kaliha wekalile na wuhonde.

Kuhemuwa kwa Shamwele na kukundikiwa

¹⁹ Oho kwashile lumenemene Elikana na ba lupashi lwendi balimenekele kupinduka, niho balemeshele Nyambi ya Ngula, pe babokele kukwabo ku Lama. Elikana walanganine na mukazendi Hana, niho Nyambi ya Ngula akumbwile malombelo a Hana.

²⁰ Pe Hana wemitile na kubeleka mwana wa mulume. Nohobene wamutumbile lizina ngayi Shamwele, shikutontolola ngayi, “Ndaba namunyepe kuli Nyambi ya Ngula.”

²¹ Shikati sha kumine kami oho Elikana na ba lupashi lwendi bayile ku Shilo mu kutupula nkombela yaha mwaka ha mwaka hamo na nkombela yayinene eye a kulupishile kuli Nyambi ya Ngula.

²² Ngoboni Hana kaliha wayileko. Watongwezele mukokwendi ngayi, “Kanuke akahumuka tuhu, nikamutwala mu Litala lya Nyambi ya Ngula, muya akekalilila mu kuyoya kwendi nimwako.”

²³ Elikana wakumbwile ngayi, “Tenda eshe ukuhanganika nimwasho ngayi shashiwahe. Yikala ku litala kutwala ha kumuhumuna. Nyambi ya Ngula mwanga ashumishe shikulupisho shobe mu kupwisha.” Nohobene Hana wekalile ku litala na kulela mwanendi.

²⁴ Oho amuhumwine wamutwalile ku Shilo. Washimbile kami nkunzi wa myaka yihatu na kakote ka muhunga wa loto ka makilongilamu likumi na mbokoshi ya kwinzala ya waine. Watwalile Shamwele oho ushili kanuke ku Litala lya Nyambi ya Ngula ku Shilo.

²⁵ Oho bamanishile kuziha nkunzi, batwalile kanuke kuli Eli.

²⁶ Hana wambile kukwendi ngayi, “Obe hekulyami, mwa shikuma amibene uya mbuyama wamonenenga hinga emana kuno, halombela kuli Nyambi ya Ngula.

²⁷ Namunyepele ngayi ampane mwana, mwa shikuma wampana ngonehe nanyepele.

²⁸ Nohobene nikumufungwila kuli Nyambi ya Ngula, mu kuyoya kwendi nimwako ukenga wa Nyambi ya Ngula.” Niho balemeshele Nyambi ya Ngula kuyo.