1 Pita 5 - Libuka Lya Kuyela

Kulama bambelele za Nyambi

¹ Haya nikukowanina bakulwane bali mukati kenu, ami kami nili mukulwane nehe nibo nami nili paki ya makando a Kilishitu na mukakutatilila kutambula hamo nabo shitapilo sha wuwahe ukaholoka.

² Shuma nikulomba kukwenu eshe, lishenu litanga lya bambelele ba Nyambi ampanikile, muzilishe, kaliha na kukandamika, ngoboni na kushinga kwenu, nehi eshe Nyambi akushinga. Hinga mutenda ou mulimo na kutatilila kuhola, ngoboni tendenu na mutima wakushoboloka.

³ Hinga mwinga bamyene ku bantu munapanikiwi kulama, ngoboni mwinge shihembwilizo ku bambelele.

⁴ Oho Kilishitu Mukulwane wa Balishani Nimwabo akeza, mukatambula munana wawuwahe wakubula kubundala.

⁵ Nanenu kami, bandumbana, libombeshenu ku bakulwane. Nimwenu libombeshenu mukutenda milimo ku umo na wamina, nehi kwatikitiwa ngayi, “Nyambi ukukana bakakuliyemeza, ngoboni ukupana nceshe ku bakakulilimbwilisha.”

⁶ Nohobene lilimbwilishenu kumbili ya Nyambi wa ngovu, ngayi amikatule ha shikati shendi sha kufwanina.

⁷ Yakenu kukwendi kulifulankana kwenu nimwako, ndaba niye ukumilama.

⁸ Keyenu, kami mulilame! Ndaba mukankole wenu Shatana, unakwendangana na kubuluma ngo shimbwi, kushinga aba akutwesha kulya.

⁹ Mumukane na ku shumankana mu kukulupila na kulimuka ngayi makalikiza amo ali na kutendiwa kami mu bawushindawenu bakakukulupila bali mu kaye.

¹⁰ Ngoboni munyima ya kuyanda kashikati, Nyambi wa nceshe nimwazo, ou unatwihanini ku wuwahe wendi wa mwaya myaka mu kulifungila na Kilishitu, niho amilembukishe na kumishumankanisha na kumipana ngovu na kumizikisha ha mwimbi wakushuma.

¹¹ Ngovu zenga zendi mwaya myaka! Ameni.

Kushangwisha kwa mamaninino

¹² Namitikitili elye liñwati muwipi hamo na kuyavwiwa kwa Shilashi, ou nikuhanganika ngayi kawushinda wakukulupila wa kupwisha na kumi kowamina na kupaka nceshe za Nyambi eshe zekalilamo, ngayi mupitakanishe kukulupila mumwazo.

¹³ Bawushindawenu ba kulitengo lili ku Mbambiloni, ba kumishangwisha na Mako mwanami naye kami ngayi shangwe.

¹⁴ Lishangwishenu umo na wamina na kulizupeza kwa shishemo. Ku mwena kwikale nenu nimwenu, enu bantu ba Kilishitu. Ameni.