1 Pita 4 - Libuka Lya Kuyela

Kufutuka nyinkalo

¹ Nohobene ndaba Kilishitu unatuyandili mu lutu, lishumishenu na shihanganiko shimo, ndaba muntu unayanda mu wuntu unahuputuku ku wubi.

² Haya kufuma shikati shino, mushilikuyoya hano hanci, munafwanini kukonka shamutima wa Nyambi, kaliha kukonka mahungu a zinyutu zenu.

³ Ndaba shikati sha kunyima mwabipishile shikati shenu shashitali na kutenda byuma batendelenga bakalitunga, bya wunjenge, mahungu, kukolwa malovu, kuya ku myanya ya mayambwayambwa na kulemesha tunankishi twatubi.

⁴ Haya bakalitunga banakomoko ngayi enu mufwako kulifungila nabo hamo kutenda byuma bya kumengenyesha, ndaba ya neshe nibyo ba kumitukanina.

⁵ Ngoboni nibo bakalikumbwila kuli Nyambi ou unalibalakanya kuyata babomi na bafu.

⁶ Ndaba ya neshe ncango zaziwahe za shimikiwile kukwabo bafwile, hinge ngayi babayatile ngo bantu ku lutu, ngoboni bekale ngonehe Nyambi mu moyo.

Bakayeshu baliyavwishe bishemo bya Nyambi

⁷ Kukotoka kwa byuma nimwabyo kuli hahepi. Nohobene lilamenu na ku shangama, ngayi mutweshe kulombela.

⁸ Shinene, mulihake umo na wamina na shishemo sha kutukumina mukati kenu, ndaba shishemo shikafwika wubi wawingi.

⁹ Mulikobelele umo na wamina na kubula ntongawushi.

¹⁰ Muntu nimwendi bishemo anatambulu kuli Nyambi aliyavwishebyo ku baminendi, nehi shamanga wamuwahe ukuliyavwisha shiwahe bishemo bya kulishiyashiya bya Nyambi.

¹¹ Muntu nimwendi mukakushimikila, ashimikile ncango za Nyambi, muntu nimwendi ukutenda milimo, atende na ngovu eze Nyambi amupana, ngayi mu byuma nimwabyo Nyambi ayemeziwe muli Yeshu Kilishitu. Kukwendi kwikale wuwahe na ngovu mwaya myaka. Ameni.

Kuyandila kukulupila

¹² Bakakuhakiwa, hinga mukomoka na shezeko eshe sha makando anamizilili, ngo shinamizilili shuma shamina sha wuyeni.

¹³ Ngoboni wahililenu, ndaba mukwinga bakakutambula shitapilo sha makando a Kilishitu, ngayi oho wuwahe wendi ukaholoka, enu mukawahilile na ku wahilila kwakupitakana.

¹⁴ Bantu ndi ba kumitukana ndaba ya lizina lya Kilishitu, muli na mfuywezi, ndaba ngayi Moyo wawuwahe, Moyo wa Nyambi ukwikala hahenu.

¹⁵ Ngoboni hinga kwikala muntu umo kukwenu ukayandishiwa ndaba ya kupununa, hinga wizi, hinga mukakutenda wubi, hinga ngo bakakulikundika mu byambo bya bantu bamina.

¹⁶ Ngoboni ndi mu kuyandishiwa ndaba ngayi enu muli Bakakilishitu, hinga muyena, ngoboni yemezenu Nyambi ndaba ya lizina elye.

¹⁷ Shikati shinakumu sha Nyambi sha kufwanina kutatika kuyata bantu bendi. Haya ndi kuyata oku kukubalikila kukwetu, pe kukotoka kwabo bakubula kwombatala ncango za Nyambi kukekala nahiti?

¹⁸ Nehi kwatikitiwa ngayi, “Ndi shashikalu ku bakulunga kupuluka, haya kukekala nahiti ku bakubula wunyambi na baka wubi?”

¹⁹ Nohobene nibo ba kuyanda ndaba ya sha mutima wa Nyambi, batupule myoyo yabo kuli Shakalenga na kutenda shiwahe.