1 Pita 3 - Libuka Lya Kuyela

Balume na bakazi

¹ Nahiyo kami, enu bakazi, libombeshenu ku balume benu ngayi ndi wamina ukubula kwombatala lizu lya Nyambi, bakokiwe na nyinkalo ya bakazabo. Pe kowa ukashimikila lizu.

² Ndaba bakalimonena nyinkalo yenu yayiwahe ya kuyela.

³ Kulihongozola kwenu hinga kwinga kwa ha munkanda kwa kuzinga huki na kuvwala byuma bya ngolinde, hinge kuvwala bya ndando yayinene.

⁴ Ngoboni kulihongozola kwenu kwinge kwa mu mutima wakulilimbwilisha na ku mwena, moyo wanoho ku meho a Nyambi wa ndando yayinene.

⁵ Ndaba na shiheka eshe mwaka bakazi ba kuyela bakakukulupila Nyambi balihongwezelenga na kulibombesha ku bakokwabo.

⁶ Shala wombatalile Abulahama na kumutumba ngayi hekulyendi. Nanenu kami bakazi mukwinga bana ba Shala, oho mukutenda shiwahe na kubula kutina shamina.

⁷ Enu kami bakokwabo, yikalenu nabo shiwahe na kulemeeka bakazenu, ndaba benga ba kupopa, ndaba kami mukakukona nabo hamo mu bishemo bya nceshe za wumi, tendenu ebye ngayi malombelo enu abule kukwanga.

Kuyandila kwoloka

⁸ Mazu a kumanishilila awa, nimwenu yingenu ba mutima umo na kulyambwilila umo na wamina, lihakenu ngo bawushinda, yikalenu na nceshe na kulilimbwilisha.

⁹ Hinga mubwesha wubi ku wubi, hinga matuka ku matuka, ngoboni hingishenu mfuywezi ndaba ngayi mu kulimuka ngayi Nyambi wamihanine ngayi mutambule mfuywezi.

¹⁰ Nehi kwatikitiwa ngayi, “Ndaba niye uku haka wumi, na ku shinga ku mona matena amawahe, akanishe lulimi lwendi kwambanga byabibi, na mivumbo yendi ngayi yibule kwamba mahalo.

¹¹ Afume ku byabibi na kutenda byabiwahe, a shinge ku mwena na mutima wendi nimwawo.

¹² Ndaba meho a Nyambi akupenza ha bakulunga, kami wa yuvwililanga ku malombelo abo. Ngoboni kaliha wa shinga bakakutenda wubi.”

¹³ Yani ukumiyandisha ndi enu mukutenda byabiwahe?

¹⁴ Ngoboni hinge ndi mu kuyandishiwa ndaba ya kwoloka, Nyambi ukamipana mfuywezi, hinga mutina bantu, kami hinga mulikekula ebye bakatenda kukwenu.

¹⁵ Ngoboni lemeshenu Kilishitu mu mitima yenu, kami enge Mwene yenu. Libalakanyenu shikati nimwasho kukumbula ku muntu nimwendi ukumipula ndaba ya kulumbeza oku muli nakwo.

¹⁶ Ngoboni mwikale na shikeketima shashiwahe, ngayi hinge ba kumibangila nyinkalo yenu yayiwahe muli Kilishitu, bakayeneshiwe na nyambilo yabo.

¹⁷ Shashiwahe kuyandila byuma byakwoloka, ndi shinengi shifungo sha Nyambi kupitakana kutenda wubi.

¹⁸ Ndaba Kilishitu wafwilile wubi wa bantu kamo, mukakwoloka ukufwila bakakutengama, ngayi atulete kuli Nyambi, hinga ngayi lutu lwafwile, ngoboni mu moyo wengile wamumi.

¹⁹ Kilishitu hinga ekala moyo wayile mu ku shimikila ku myoyo yekalile mu tolongo.

²⁰ Myoyo eye yengile ya bantu babulile kwombatala Nyambi, oho batatilile mu ku mwena ha matena a Nowa, oho atendelenga wato. Bantu babashe, ba mutanu na bahatu nibo bapulukile ku mema.

²¹ Mema awa akufwanikiza na kuzubilisha kukutupulwisha ndaba ya ku shanguka kwa Yeshu Kilishitu. Kuzubilisha oku kaliha kukuyowesha mazilo a lutu, ngoboni kwitabila kwa mutima wawuwahe kuli Nyambi, kupitila muli Yeshu Kilishitu,

²² ou unayi kuyilu, uli ku liboko lya shilyo lya Nyambi kuyo mangeloyi na kutwaminina na ngovu ba kubomba kukwendi.