1 Pita 2 - Libuka Lya Kuyela

Limanya lya kuyoya

¹ Nohobene shiyenu byabibi nimwabyo na kwongeza na shishweka na mwili na matuka nimwawo.

² Ngonehe bambututu banahemuwu wuluno ba kulilila mahwe, nenu kami shingenu mahwe akulisha mitima yenu, ngayi amikulishe na kumipulwisha.

³ Ndaba ngayi munayele nceshe za Nyambi.

⁴ Yekenu kuli Yeshu Kilishitu, niye limanya lya kuyoya, elye bantu bakanine, ngoboni kuli Nyambi linengi lya kuhatiwa, kami lyaliwahe kukwendi.

⁵ Enu kami munengi ngo mamanya akuyoya, awa Nyambi akatendesha litala lyendi, tendenu milimo ngonehe mukankombela wa kuyela, mu kupana zinkombela mu moyo, ziya zikutambuliwa kuli Nyambi kupitila muli Yeshu Kilishitu

⁶ Nohobene byatikitiwa bikwamba ngayi, “Mona nahata limanya lyaliwahe, nikalilangika mu Ziyoni, kwinga limanya lya mu nkomi, pe nimwendi ukakulupila mumwendi, kukayuvwa lisheni wufwako.”

⁷ Nohobene enu mu kukulupila, nilyo limanya lya ndando yayinene. Ngoboni nibo bakubula kukulupila nehe mazu a Nyambi akwamba ngayi, “Limanya liya bakanine bakakutenda matala, nilyo linafutuku kwinga limanya lya ku shuma lya mu mbango.”

⁸ Mazu a Nyambi akwamba kami ngayi, “Elye nilyo limanya likapukalisha bantu, na limanya likabawisha.” Ndaba banakana kwombatala lizu lya Nyambi, pe banafwanini kutambula byuma bya noho.

Mushobo wakuhatiwa

⁹ Ngoboni enu muli bantu ba kuhatiwa, muli bakankombela ba Mwene, muli mushobo wa kuyela, muli bantu bendi, Nyambi wamihatile ngayi mu kashimikile milimo yayiwahe ya nou unamihana ngayi mufume mu mincimpwe mukengine mu mwana wendi wakukomokesha.

¹⁰ Mwaka kaliha mwengile bantu ba Nyambi, ngoboni wuluno mukwinga bantu bendi. Mwaka kaliha mwatambwile nceshe, ngoboni wuluno munazitambulu.

Bandungo ba Nyambi

¹¹ Bakakuhakiwa, ha kuwana ngayi enu muli bayeni hano hanci, nikumilomba ngayi mulihupwize ku mahungu a wuntu, awa a kulwisha moyo.

¹² Nyendelo yenu yinge ya kwoloka mukati ka Bakamatunga, ngayi hinge ba kumibangila ngayi muli bakakutenda wubi, batoshe milimo yenu yayiwahe. Nibo bakayemeza Nyambi ha Mutena wendi wakuzingula.

¹³ Ndaba ya Mwene, ombatalenu bakulwane nimwabo bali na ngovu, libombeshenu ku ndayano nimwazo za bantu hinge ndi kuli Mwene wa mukulwane kupitakana nimwabo, ndaba uli na ngovu hayilu ya bamyene.

¹⁴ Hinge ku batulela, ndaba wabatumine ngayi bashushule bakakutenda wubi na kuyemeza aba ba kutenda shiwahe.

¹⁵ Ndaba Nyambi ukushinga ngayi na milimo yenu yayiwahe mukutenda mumweneshe zinyambilo za bantu bakuyeba.

¹⁶ Munashoboloko, ngoboni hinga mutenda ku shoboloka kwenu kwinga shitutu sha wubi, ngoboni tendenu ngo bakamilimo ba Nyambi.

¹⁷ Lemeekenu bantu nimwabo. Hakenu bawushindawenu bakakukulupila. Tinenu Nyambi. Panenu maleema Mwene.

Shihembwilizo sha makando a Kilishitu

¹⁸ Enu bakamilimo, libombeshenu ku bahekulyenu na maleema nimwawo, kaliha ku babawahe tuhu na bakakubomba, ngoboni na ku babakalu mitima.

¹⁹ Ndaba shuma eshe sha kufwanina, ndi muntu uli na shikeketima kuli Nyambi, ukuzumanana mu makalikiza a kubula kumufwanina.

²⁰ Wuwahe ngani kukwobe ndi unakamiwi ndaba ya mulandu wobe ukuzumanana na lunzewe? Ngoboni ndi oho unatende shiwahe na kuyanda ndaba yasho, ukazumanana na lunzewe, eshe sha kuku fwanina kuli Nyambi.

²¹ Nyambi wamihaninine ku nyinkalo ya noho, ndaba Kilishitu watuyandilile na kutushiyila shifwanikizo ngayi mukonke mu zintambo zendi.

²² Kilishitu kaliha watendele wubi, hinga kwongeza kaliha kwawaniwile mu kanwa kendi.

²³ Oho bantu bamutukanine, niye kaliha watukanine. Oho ayandile, kaliha wafumbilile, ngoboni walumbezele Nyambi mukakuyata wakwoloka.

²⁴ Kilishitu washimbile wubi wetu mu lutu lwendi ha shishempakano, ngayi etu twinge ngo ba kufwa ku wubi, ngoboni ba kukonka byakwoloka ngayi twinge ba kuyoya. Munanyongomana na mabenga endi.

²⁵ Mwengile ngo bambelele banayongala, ngoboni wuluno munaboko kuli Mulishani na Mukakulama myoyo yenu.