1 Pita 1 - Libuka Lya Kuyela

¹ Ami Pita, ntumwana wa Yeshu Kilishitu. Nikutikitila liñwati elye kukwenu ba kuhatiwa kuli Nyambi banapanzana kwinga bayeni mu litunga lya Pontashi na Ngalatiya na Kapandoshiya na Esha na Mbitiniya.

² Nyambi Tate wamihatile ngonehe ahanganikile ngayi Moyo wa Kuyela umiyeleshe, ngayi mwombatale Yeshu Kilishitu na kuyoweshiwa na mukeza wendi. Nceshe na ku mwena kuhanye kukwenu.

³ Tuyemezenu Nyambi na Tata Mwene wetu Yeshu Kilishitu! Ou mu nceshe zendi za kuhanya, ha ku shangula Yeshu Kilishitu unatupana wumi wawupya na kulumbeza mumwetu,

⁴ Nyambi unamiholekele muyilu likona lya kubula ku bola, hinge kubipa, hinge kubundala.

⁵ Enu mu kulamiwa na ngovu za Nyambi ndaba ya kukulupila, hantu kupuluka kuya kunawahishiwi mwaka kunaholoko ha shikati sha kukotoka.

⁶ Wahililenu mu byuma ebye, hinge ngayi ha shikati shashishe mukapita mu byezeko byabingibingi.

⁷ Ebye binezi ngayi kukulupila kwenu kuya kunapitakana ngolinde iya yalobanga hinge ndi yinayeleshiwi mu mundilo, nohobene kukulupila kwenu kwinge kwa kupwisha, mwanga enu mukatambule kuyemeziwa na maleema oho Yeshu Kilishitu akaholoka.

⁸ Yeshu ou mu ku haka hinge ndi munabulu kumumona shikati shino, munamukulupili, kami mu ku wahilila na kutangala shikuma.

⁹ Pe mu kutambula ncuungu ya kukulupila kwenu, niko kupuluka kwa myoyo yenu.

¹⁰ Bamiluwe balubulwile bya nceshe eze zinamizili, bashingishishile na kuyipwiziza bya kupuluka oku.

¹¹ Moyo wa Kilishitu ou wekalile mumwabo watoyele bya makando a Kilishitu na wuwahe uya ukamukonka. Bamiluwe bashingile kulimuka ngayi byuma ebye bikatendiwa shikati ngani kami bikekala nahiti.

¹² Nyambi wabalubwilile ngayi milimo yabo, kaliha ya nibo bamwine, ngoboni ya kutendela enu, nibo bambile bya kupwisha ebye munayuvwu wuluno. Bengile baka ku shimikila ncango zaziwahe na ngovu za Moyo wa Kuyela watumiwile kufuma kuyilu, hinge mangeloyi nanibo bakushinga kulimuka ebye byuma.

Yikalenu ba kuyela mitima

¹³ Nohobene mitima yenu yilibalakanye. Mushangame na kulumbezela shikuma nceshe za Nyambi oho Yeshu Kilishitu akaholoka.

¹⁴ Yikalenu nehe bana bakwombatala, hinga kami mubokela ku byuma bya mwaka mwatendelenga mu wulube.

¹⁵ Ngoboni ngonehe Nyambi ou wamihanine wenga wa kuyela nahiyo kami nanenu yingenu bakakuyela mu biheka nimwabyo.

¹⁶ Ndaba kwatikitiwa ngayi, “Yingenu ba kuyela, ndaba Ami nili wa kuyela.”

¹⁷ Nyambi shihota ufwasho, niye ukuyata muntu kwezekesha na ntendelo yendi ndi mu kumwihana ngayi Tate oho mu kulombela, pe mutendelenu milimo na bowa oho mushili muno mu kaye.

¹⁸ Mukulimuka shiwahe shuma eshe bamikulizile nasho ku nyinkalo yenu yowa mwatambwile ku bankakazenu, kaliha wamikuliza na byuma bya ku bola bya kufweka nehe shiliva na ngolinde.

¹⁹ Ngoboni na mukeza wa ndando yayinene wa Kilishitu, ou wengile ngo mwana mbelele wakubula muhendo na libala.

²⁰ Mwa shikuma Nyambi wamwimikile mwaka oho kaye shilolo kalengiwe, ngoboni waholokele ha bikati bya kukotoka ndaba yanenu.

²¹ Kupitila mumwendi mu kukulupila muli Nyambi, ou wamushangwile ku bafu, kami wamupanine wuwahe, nohobene kukulupila na kulumbeza kwenu bili muli Nyambi.

²² Ndaba munayeleshe mitima yenu hakwombatala kupwisha, haya lihakenu na shishemo sha kubula shishweka ku bawushinda bakakukulupila, monenu ngayi munalihaka umo na wamina na mutima wa kuyela.

²³ Ndaba munahemuwu kabili, kaliha ku mbuto yakubola ngoboni ku mbuto ya kubula ku bola. Mbuto eye yinengi lizu lya Nyambi likuyoya na kwikala mwaka nimwawo.

²⁴ Nehi kwatikitiwa ngayi, “Bantu nimwabo bafweka ngonehe mwila, kami wuwahe wabo, wafweka ngonehe maluba amu lishaka. Mwila walebukanga, na maluba apulumukanga.

²⁵ Ngoboni lizu lya Mwene lyekala mwaya myaka.” Elye lizu nizo ncango zaziwahe zashimikiwile kukwenu.