1 Kolinte 8 - Libuka Lya Kuyela

Liyipu ha byakulya binatupuliwi ku tunankishi

¹ Wuluno nikushinga kwamba ha byakulya binatupuliwi ku tunankishi. Tukulimuka ngayi nimwetu tuli na kalimukisho. Ngoboni kalimukisho kengishanga muntu ngayi alilundumike. Shishemo nisho shikuzikisha.

² Muntu ndi ukuhanganika ngayi ukulimuka shuma shamina, pe shilolo alimuke ngonehe anafwanini kulimuka.

³ Ngoboni muntu uku haka Nyambi, niye ukulimukiwa na Nyambi.

⁴ Nohobene nikwamba ha byakulya binatupuliwi ku tunankishi. Tukulimuka ngayi kanankishi kenga shuma showa, kami ngayi kowa nyambi wamina mu kaye, ngoboni kuli tuhu Nyambi umo.

⁵ Hinge ngayi kuli baya ba kutumbiwa ngayi “banyambi” muyilu, hinge hano hanci, hinge ndi kuli “banyambi” babengi na “bamyene” babengi,

⁶ ngoboni kukwetu, kuli tuhu Nyambi umo, niye Tate, niye Shakalenga ou walengele byuma nimwabyo, kami wumi wetu uli mumwendi. Kami tuli na Mwene umo Yeshu Kilishitu. Nyambi walengele byuma nimwabyo kupitila mumwendi, kami tukuyoyela mumwendi.

⁷ Ngoboni kaliha nimwabo ba kulimuka kupwisha oku. Bantu bamo banayinzilili kulemesha tunankishi, kukuma na ku matena ano oho ba kulya bya kutupuliwa ku tunankishi, ndaba ngayi bali na shikeketima sha kupopa, pe ba kuliyuvwa ngayi balya biya byakulya bikubabipisha.

⁸ Ngoboni byakulya bifwako kutwesha kutuleta hahepi na Nyambi. Hinge ndi kulya tufwako, kuyongesha shuma shamina tufwako, hinge ndi tukalya, kukawana shuma shamina tufwako.

⁹ Ngoboni keyenu ngayi ku shoboloka kwenu hinga kupukalisha baya banapopo mu kukulupila.

¹⁰ Ndaba ndi muntu uli na shikeketima sha kupopa uku mona obe uli na kalimukisho hiwulya bya mu litala lya kulemeshela tunankishi kati shuma eshe shifwako kukamushumankanisha mutima ngayi naniye alye byakulya bya kutupuliwa kutunankishi ndi?

¹¹ Nohobene muntu wakupopa mu kukulupila, ukalobeshiwa ndaba ya kalimukisho kobe. Ou kawushinda wobe ou Kilishitu afwililile.

¹² Oho mukutenda wubi nahiyo ku bawushindawenu muli Kilishitu na kukolesha bihanganiko byabo bya kupopa, mukutenda wubi kuli Kilishitu.

¹³ Nohobene ndi ebye nikulya bikupukalisha kawushinda wami muli Kilishitu, pe kukalya biya byakulya nifwako kutina nipukalisha kawushinda wami.