1 Kolinte 7 - Libuka Lya Kuyela

Mayipu ha bya maluwo

¹ Wuluno ndaba ya byuma ebye mwantikitilile, shashiwahe ku mulume ngayi hinga ayeka.

² Ngoboni ndaba ya byezeko bya wunjenge, shashiwahe ngayi mulume nimwendi ekale na mukazendi na mukazi nimwendi ekale na mukokwendi.

³ Mulume nafwanini kutenda mulimo wendi wa mu litala kuli mukazendi. Na mukazi kami nafwanini kutenda nahiyo kuli mukokwendi.

⁴ Mukazi ngovu wufwazo ku lutu lwendi niye mwine, ngoboni mukokwendi niye uli na ngovu. Na mulume kami ngovu wufwazo ku lutu lwendi niye mwine ngoboni mukazendi niye uli na ngovu.

⁵ Hinga mulikanina umo na wamina ndele munaliyuvwashana shikati shashishe ngayi mulipane ku kuzila kulya na ku malombelo, niho muliwane kami kutina Shatana amyezeka ndaba muli bakakubula kutwesha kulilama.

⁶ Nikwamba ebye na bihanganiko byami, kaliha ngayi zinengi ndayano.

⁷ Nikushinga ngayi shinga balume nimwabo bengile ngonehe ami, ngoboni Nyambi wapanine muntu na muntu shitapilo shendi, umo uli na shitapilo eshe, wamina uli na shitapilo shiyo.

⁸ Nohobene nikwamba ku bazike na bamfwile ngayi shashiwahe ndi bakekala nahiya ngonehe ami.

⁹ Ngoboni ndi kutwesha kulilama bafwako, pe bayeke, ndaba shashiwahe kuyeka, kupitakana kubanga na mundilo wa mahungu.

¹⁰ Haya kuli baya banayeke, nikwamba kukwenu, kaliha na bihanganiko byami, ngoboni na ndayano za Mwene ngayi mukazi hinga alitapulula na mukokwendi.

¹¹ Ngoboni ndi ukutenda noho, pe ekale mu wuzike, hinge alyambwilile ngayi aboke kuli mukokwendi. Mulume kami hinga alubula mukazendi.

¹² Ku bamina ami nikwamba, kaliha Mwene, ngayi ndi kawushinda wamina uli na mukazendi wakubula kukulupila, ndi niye uku wahilila kwikala nendi, hinga amulubula.

¹³ Kami ndi mukazi uli na mukokwendi wakubula kukulupila, ndi naniye uku wahilila kwikala nendi hinga alitapulula nendi.

¹⁴ Ndaba mulume wakubula kukulupila ukuyeleshiwa ndaba ya mukazendi, kami mukazi wakubula kukulupila ukuyeleshiwa ndaba ya mukokwendi. Ndi shinga kaliha noho, shinga bana babo bakwinga bakubula kuyela, ngoboni haya balinehe, banayele.

¹⁵ Ngoboni ndi mukakubula kukulupila ukushinga kutapuluka, ku mukakukulupila mulehenu aye. Mukakukulupila wa mulume hinge wa mukazi kumangiwa ku bya noho wufwako, ndaba Nyambi unatwihana ngayi twikale mu ku mwena.

¹⁶ Ndaba ukulimuka nahiti obe mukazi ndi ukapulwisha mukokwobe? Hinge obe mulume, ukulimuka nahiti ndi ukapulwisha mukazobe?

Yoyenu ngonehe amihanine Nyambi

¹⁷ Haya muntu na muntu nafwanini kuyoya kwezekesha na shitapilo eshi amupanine Mwene, ngonehe ekalile oho Nyambi amwihanine. Eze nizo ndayano niku longesha mu matengo nimwawo.

¹⁸ Ndi muntu wengile wakuya ku mukanda oho Nyambi amwihanine, pe hinga afumisha bimonekesho bya mukanda. Ndi muntu wengile wakubula kuya ku mukanda oho Nyambi amwihanine, nohobene, hinga aya ku mukanda.

¹⁹ Kuya ku mukanda hinge kubula kuya ku mukanda, kuyavwa bifwako, ngoboni shashinene kwombatala ndayano za Nyambi.

²⁰ Shashiwahe muntu nimwendi ekale ngonehe ekalile oho atambwile lukuwa lwa Nyambi.

²¹ Obe wehaniwile hinga wenga uli ndungo ndi? Hinga ulifulankana, ngoboni ndi ukutwesha ku shoboloka, tenda noho.

²² Ndaba ou wehaniwile hinga enga ndungo, nengi mukakushoboloka wa Mwene. Nahiyo kami niye ukwihaniwa hinga enga mukakushoboloka, nengi ndungo wa Kilishitu.

²³ Munalandiwi na ndando, hinga mwinga bandungo ba bantu.

²⁴ Bawushinda, muntu nimwendi alilumikile na Nyambi, ekale ngonehe ekalile oho ehaniwile.

Mayipu ha bazike na bamfwile

²⁵ Wuluno ha bya bazike, ndayano za Mwene nifwazo, ngoboni nikumipana bihanganiko byami, nkulupilenu ndaba ya nceshe za Mwene.

²⁶ Nohobene ndaba ya wukalu wa shikati shino, nikuhanganika ngayi shashiwahe ngayi muntu ekale ngonehe ali.

²⁷ Ndi uli na mukazi, pe hinga umulubula. Ndi kaliha wekala na mukazi, pe hinga uyeka.

²⁸ Ngoboni ndi ukuyeka mukazi, kaliha ukutenda wubi. Kami ndi mbuyama ukuyekiwa, kaliha ukutenda wubi. Ngoboni nikushinga nimitetelele ku wukalu wa nyoyelo yino, ou bekala nawo bakakuyeka.

²⁹ Bawushinda, nikumitongweza ebye ngayi, shikati shashepakale. Wuluno haya, baya bali na bakazi benge ngo bafwabo.

³⁰ Kami baya ba kulila, benge ngo kulila bafwako, kami baya ba ku wahilila, benge ngo ku wahilila bafwako, kami baya ba kulanda, benge ngo kaliha bali na byuma.

³¹ Kami baya ba kulikwatisha na byuma bya mu kaye benge ngo kulikwatisha bafwako. Ndaba kaye aka kaliko lelo, kukekalako mwaya myaka kafwako.

³² Nikushinga ngayi mubule kulifulankana. Uya wakubula kuyeka, ukulifulankana milimo ya Mwene, ndaba ukushinga kuwahililisha Mwene.

³³ Ngoboni uya unayeke, ukulifulankana byuma bya mu kaye, ndaba ukushinga kuwahililisha mukazendi.

³⁴ Nohobene, uli na kukokiwa ku zimbalila zibili. Mbuyama wakubula kuyekiwa, hinge kankanga, ukulifulankana milimo ya Mwene, ngayi ekale mukakuyela mu lutu lwendi na mu moyo. Ngoboni uya unayekiwi, ukulifulankana byuma bya kaye, ndaba ukushinga kuwahililisha mukokwendi.

³⁵ Nikwamba ebye ndaba nikushinga kumiyavwa, kaliha namimanyiki kanyimbwa, ngoboni nikushinga ngayi muyoye mu nzila yayiwahe, kami ngayi mutende milimo ya Mwene na kubula lumpa.

³⁶ Ndi mulume wamina unaliyuvwu na kankanga ngayi amuyeke, ndi ukuhanganika ngayi ukutenda sha kubula ku fwanina kuli uya muzike, kami ndi ukumuhanganika shikuma ngayi amuyeke, pe uku fwanina kumuyeka, kaliha ukutenda wubi.

³⁷ Ngoboni ou ukulishumisha mu mutima wendi na kubula kwikala na bihanganiko, ngoboni ha kulilama ku mahungu endi, pe mu shifungo shendibene niye mwine, ha kuleha kuyeka uya kankanga, ukutenda shiwahe.

³⁸ Nohobene uya ukuyeka, ukutenda shiwahe, ngoboni uya ukubula kuyeka ukutenda shiwahe na kupitakana.

³⁹ Mukazi unamangiwi na ndayano ndi mukokwendi ushili kuyoya, ngoboni ndi mukokwendi unafu, pe nengi wakushoboloka, ukutwesha kuyekiwa ku mulume uya akushinga, ngoboni nafwanini kwinga mulume mukakukulupila muli Mwene.

⁴⁰ Nohobene, uya mukazi ukwinga waku wahilila ndi ukubula kuyekiwa kami. Ebye nibyo bihanganiko byami, kami nikuhanganika ngayi na nami nili na Moyo wa Nyambi.