1 Kolinte 6 - Libuka Lya Kuyela

Kuliyatisha mukati ka Bakayeshu

¹ Ndi wamina mukati kenu uli na mulandu na minendi Mukayeshu, mu kuya nahiti ku bakakubula kwitabila ngayi bamiyate, kupitakana kuya ku baminenu Ba kuyela mitima?

² Kati kulimuka mufwako ngayi Ba kuyela mitima bakayata kano kaye ndi? Enu mukayata kano kaye, kati kutwesha mufwako kuyata byambo byabishe ndi?

³ Kati kulimuka mufwako ngayi tukayata mangeloyi ndi? Pe tukukwanga nahiti byuma ebye bya wumi uno?

⁴ Nohobene ndi muli na mulandu ku byambo bya noho, bishini mu kubitwalila ku nkuta ku bantu bakubula kulimuka bya mu litengo?

⁵ Nikwamba ebye ngayi muyuvwe lisheni mukati kenu kowa hinge umo mukangana, ukutwesha kuyata milandu mukati ka baminendi Bakayeshu ndi?

⁶ Ngoboni shikwiza nahiti ngayi Mukayeshu ukutwala minendi ku nkuta ngayi bakabayate bakakubula kukulupila?

⁷ Nohobene, ha kulipana milandu mukati kenu, ndaba mu kuya ku nkuta shinamoneke ngayi mwakwangakale. Nahiti mu kubula kwitabila kumi bipishila? Nahiti mu kubula kwitabila kumiyibila?

⁸ Ngoboni enu mu kubipishila baminenu na ku yibila bawushindawenu Bakayeshu!

⁹ Kati kulimuka ngayi bakawubi bafwako kukakona Wene wa Nyambi ndi? Hinga mulyongeza, bantu bakalwiholwiho, hinge bakakulemesha tunankishi, hinge baka wumambe, hinge bakalinyawe, hinge bakakulilangana na baminabo balume,

¹⁰ hinge bezi, hinge bakamutongo, hinge bakakukolwa, hinge bakamishunga, hinge bakakupukula, bafwako kukakona Wene wa Nyambi.

¹¹ Bamina mukati kenu bekalile nahiyo. Ngoboni munayoweshiwi, munayeleshiwi, munaolokeshiwi mu lizina lya Mwene Yeshu Kilishitu na Moyo wa Nyambi yetu.

Liyavwishenu zinyutu zenu mu kuleta wuwahe kuli Nyambi

¹² Byuma nimwabyo binetabilishiwi kukwami, ngoboni kaliha ngayi byuma nimwabyo bikuyavwa. Nimwabyo binetabilishiwi kukwami, ngoboni kwitabila ngayi shuma shimo shinyake mu wulungo nifwako.

¹³ Byakulya byenga bya livumo kami livumo lyenga lya byakulya ngoboni Nyambi ukabilobesha wubili wabyo. Lutu kaliha balutendelele lwiholwiho, ngoboni lwenga lwa Mwene, kami Mwene wenga wa lutu.

¹⁴ Nyambi washangwile Mwene nanetu kami ukatushangula na ngovu zendi.

¹⁵ Kati mufwako kulimuka ngayi zinyutu zenu zenga bimamo bya Kilishitu ndi? Kati nikashimba bimamo bya Kilishitu na kubitenda bimamo bya lwiholwiho ndi? Shifwako kutwesheka!

¹⁶ Kati mufwako kulimuka ngayi mulume ukuliwanika na mukalwiholwiho unengi lutu lumo nendi ndi? Ndaba kwatikitiwa ngayi, “Babili bafutuke kwinga lutu lumo.”

¹⁷ Ngoboni niye ukulifungila kuli Mwene ukwinga moyo umo nendi.

¹⁸ Tinenu lwiholwiho. Wubi nimwawo akutenda muntu wenga wa ha munkanda wa lutu, ngoboni niye ukutenda wunjenge uku bipisha lutu lwendi.

¹⁹ Kati kulimuka mufwako ngayi lutu lwenu nilyo litala lya Moyo wa Kuyela uli mumwenu ou munatambulu kuli Nyambi ndi? Ndaba Moyo muli nawo kaliha wenu.

²⁰ Ndaba munalandiwi na ndando. Nohobene liyavwishenu zinyutu zenu ku byuma bikuleta wuwahe kuli Nyambi.