1 Kolinte 5 - Libuka Lya Kuyela

Wunjenge mu litengo

¹ Wuluno kunayuvwaniki ngayi kuli wunjenge mukati kenu ou ukubula kutwesha kuwaniwa hinge mukati ka Bakamatunga. Nayuvwu ngayi muntu unakulangana na mandiyendi wakumuwanamo!

² Ngoboni enu mu kuliyemeza! Kati kaliha mwafwanina kuyuvwa lisheni ndi? Fumishenu uya natende shiheka eshe mukati kenu.

³ Ndaba mwa shikuma ami, hinge ndi ami kaliha nili nanenu hamo, ngoboni nikonili mu moyo. Namuyata kale ou muntu unatende shuma eshe ngo nilihamo nanenu.

⁴ Oho mwakungulukanga hamo mu lizina lya Mwene Yeshu na nami nekalanga hamo nanenu mu moyo na ngovu za Mwene wetu Yeshu niko zekalanga.

⁵ Muntu wanahiyo mupanikenu kuli Shatana, ngayi lutu lwendi lulobe, mwanga moyo wendi ukapuluke ha Mutena wa Mwene.

⁶ Kufwanina shifwako ngayi enu muliyemeze. Kati mufwako kulimuka biya byambiwile ngayi, “Mumena wawushe ukutundulukisha muvuba nimwawo?”

⁷ Nohobene fumishenu mumena wa mwaka wa wubi, ngayi mwinge ba kuyela, pe mukenga ngo linkende lyalipya lya kubula mumena, ngonehe muli, ndaba ngayi Kilishitu ou mbelele wetu wa Shimbo sha Kupitilila, unakombeleliwi mwaka.

⁸ Nohobene, tutendenu shimbo shetu, kaliha na linkende lili na mumena wa mwaka uli na wubi na lwiholwiho, ngoboni na linkende lya kubula mumena, lya kuyela na kupwisha.

⁹ Mu Liñwati namitikitilile namitongwezele ngayi hinga mulifungila na bakawunjenge.

¹⁰ Kaliha ngayi mulitape na bantu nimwabo ba hano ha kaye bakawunjenge, hinge na bamutongo, hinge bezi, hinge bakakulemesha tunankishi, ndi noho, pe ndele mufume mu kaye.

¹¹ Ngoboni namitikitilile ngayi hinga mulifungila na muntu ukulitumba ngayi Mukakilishitu, hinga enga mukawujenge, hinge mukamutongo, hinge mukakulemesha tunankishi, hinge mukamishunga, hinge mukakukolwa, hinge mwizi. Muntu wanoho hinga mulya nendi.

¹² Ndaba ngayi ami kuyata aba bali ha munkanda nifwako? Kati kaliha munafwanini kuyata aba bali mu litengo ndi?

¹³ Nyambi niye ukuyata baya bali ha munkanda. Ngonehe kwatikitiwa ngayi, “Mukawubi mufumishenu mukati kenu.”