1 Kolinte 3 - Libuka Lya Kuyela

Bakamilimo ba Nyambi

¹ Nami, bawushinda, kaliha natweshele kwamba kukwenu ngonehe bantu bali na Moyo. Ngoboni nafwanina kwamba kukwenu ngonehe ku bantu ba kano kaye hinge ngonehe batwanuke mu kukulupila bya Kilishitu.

² Namilishile mahwe, kaliha na byakulya bya ku shuma, ndaba kaliha mwatweshele kubilya. Hinge wuluno mufwako kutwesha kubilya,

³ ndaba mushili kwikala ngonehe bantu ba kano kaye. Mukati kenu muli mwili na kulitapulula. Kati ebye bifwako ku monesha ngayi mushili bakakaye kano, oho mukwikala mumwabyo?

⁴ Oho muntu na muntu ukwamba ngayi, “Ami nili wa Paulu,” na wamina ukwamba ngayi, “Ami nili wa Apoloshi,” kati ndi mukutenda noho mufwako kwinga ngonehe bantu ba kano kaye ndi?

⁵ Kati Apoloshi nengi yani? Kami Paulu nengi yani? Etu tuli tuhu bakamilimo ba Nyambi baya bamitwamininine ku kukulupila. Muntu na muntu watendele milimo eye Nyambi amupanine.

⁶ Ami na kunine mbuto, Apoloshi wayitililile, ngoboni wakulishileyo Nyambi.

⁷ Nohobene ou wakunine hinge ou wayitilile bafwako kuyavwa shamina, ngoboni Nyambi niye wakulishanga.

⁸ Wuluno ou kukuna na nou ukuyitilila ba kulingana, pe muntu na muntu ukatambula ncuungu yendi kuya na mulimo anatende.

⁹ Ngoboni etu tuli tuhu bakakutenda milimo ya Nyambi, enu muli mfuba ya Nyambi. Kami enu litala lya Nyambi.

¹⁰ Ha kuliyavwisha mulimo ou Nyambi ampanikile nazikile mwimbi ngonehe mukakulimuka kuzika, kami wamina uli na kuzika ha nou mwimbi. Pe muntu na muntu nafwanini kuzikaho na kukeya.

¹¹ Ndaba kowa mwimbi wamina ou muntu akutwesha kuzika ndele ou wazikiwile mwaka, niye Yeshu Kilishitu.

¹² Bantu bamina bakuliyavwisha kuzika ha mwimbi na ngolinde, hinge shiliva, hinge mamanya a ndando yayinene, hinge bitondo, hinge mwila, hinge ntende.

¹³ Ngoboni milimo ya muntu nimwendi yikaholoka ha Mutena wa Kuyata. Ndaba mutena uyo ukaholoka na mundilo, ndaba mundilo ukezeka milimo ya muntu nimwendi.

¹⁴ Ndi ebye atungile uya muntu ha mwimbi bikapuluka ku mundilo, uya muntu ukatambula ncuungu.

¹⁵ Ngoboni ndi ebye atungile uya muntu bikuhoka, pe ukabiyawa, ngoboni niye mwine ukapuluka, ngonehe unayokoko mu mundilo.

¹⁶ Kati enu kulimuka mufwako ngayi muli Litala lya Nyambi, kami ngayi Moyo wa Nyambi uli mumwenu ndi?

¹⁷ Ndi muntu wamina uku bipisha Litala lya Nyambi, Nyambi naye ukamulobesha. Ndaba Litala lya Nyambi lyenga lya kuyela, pe Litala elye lyenga enu.

¹⁸ Hinga mulyongeza enu bamwine. Ndi muntu wamina ukuhanganika ngayi uli na ngana muno mu kaye, shashiwahe atatike kwinga wakuyeba ngayi mwanga enge wakukeya.

¹⁹ Ndaba ngana za kaye kano zenga zowa kuli Nyambi. Ndaba kwatikitiwa ngayi, “Nyambi uka kwata ba kukeya mu ku shoshoka kwabo.”

²⁰ Kami kwatikitiwa ngayi, “Nyambi walimuka bihanganiko bya bakangana ngayi byenga byowa.”

²¹ Nohobene muntu umo hinga aliyemeza mu bantu. Ndaba byuma nimwabyo byenga byenu.

²² Hinge Paulu, hinge Apoloshi, hinge Kefwashi, hinge kano kaye, hinge wumi, hinge lufu, hinge byuma biliko, hinge byuma bikeza, nimwabyo byenga byenu,

²³ nenu muli Bakakilishitu, kami Kilishitu wenga wa Nyambi.