1 Kolinte 2 - Libuka Lya Kuyela

Kushimikila kwa Paulu

¹ Bawushinda wami, oho nezile kukwenu mu ku shimikila ncimpi eye Nyambi atuholwelele, kaliha nezile na wuwahe wa nyambilo, hinge wangana.

² Oho nekalile nanenu nashingile ngayi nivulame byuma nimwabyo, ndele tuhu Yeshu Kilishitu shinene bya lufu lwendi ha shishempakano.

³ Pe oho na kumine kukwenu nengile wakupopa, kami nakankilenga shikuma na kutina.

⁴ Pe ku longesha kwami na ku shimikila kwami kaliha byekalile na mazu amawahe a ngana za wuntu, ngoboni engile mazu aku monesha ngovu za Moyo wa Nyambi.

⁵ Natendele ebye ngayi kukulupila kwenu kubule kwimana mu ngana za wuntu, ngoboni kwimane ha ngovu za Nyambi.

Ngana za Nyambi

⁶ Ngoboni ku bantu banakulu mu moyo, tu ku shimikila bya ngana. Ngoboni kaliha ngana za muno mu kaye, hinge za batulela ba muno mu kaye, aba bali na ngovu zabo zili na kumana.

⁷ Ngana tu ku shimikila zinengi zincimpi za Nyambi za kuholekiwa ku bantu. Nyambi oho shilolo alenge kaye, wawahishile ebye ngayi atupane wuwahe.

⁸ Kowa batulela ba kaye kano balimukile ngana eze. Shinga balimukile, shinga kaliha bakolekele Mwene wawuwahe.

⁹ Ngoboni nehi kwatikitiwile ngayi, “Biya liho lyabulile ku mona hinge biya litu lyabulile kuyuvwa, hinge biya byabulile kuhanganikiwa na muntu, nibyo byuma Nyambi ana balakanyini aba ba kumuhaka.”

¹⁰ Nyambi unabihololo kukwetu kupitila mu Moyo wendi. Ndaba Moyo washingishishanga byuma nimwabyo, hinge byuma bya kunonka bya Nyambi.

¹¹ Yani ukutwesha kulimuka bihanganiko bya muntu? Ndele moyo uli mumwendi. Nahiyo kami kowa muntu ukutwesha kulimuka byuma bya Nyambi ndele Moyo wa Nyambi.

¹² Etu kaliha tunatambulu moyo wa kaye kano ngoboni tunatambulu Moyo unafumu kuli Nyambi, ngayi tutweshe kulimuka byuma byapanikiwile kukwetu bya shishemo sha Nyambi.

¹³ Tukwamba ebye byuma kaliha na mazu a ngana za kulongeshiwa ku muntu, ngoboni na mazu awa Moyo ukutulongesha. Tukutontolola bya kupwisha bya moyo na ku bantu bali na Moyo.

¹⁴ Nimwendi muntu wakubula Moyo, kutwesha kutambula byuma bya Moyo wa Nyambi wufwako ndaba binengi byowa kukwendi, kami kutwesha kubiyuvwishisha wufwako, ndaba bikulimukiwa na Moyo.

¹⁵ Nimwendi muntu uli na Moyo ukutwesha kuyata byuma nimwabyo, ngoboni niye kowa muntu ukumuyatisha.

¹⁶ Nehi kwatikitiwa ngayi, “Yani unalimuku bihanganiko bya Mwene? Yani ukutwesha kumubela?” Ngoboni etu tuli na bihanganiko bya Kilishitu.