1 Kolinte 16 - Libuka Lya Kuyela

Bakakukulupila

¹ Wuluno ndaba ya zintupu za kuyavwa Bakakilishitu ba mu Yelushalema, tendenu ngonehe natongwezele matengo a Ngalatiya.

² Ha mutena wakutatika wa Shunda nimwenu mutentekeko bimo kunebye munawana, ngayi hinga mukakungulula nakeza.

³ Oho nakeza, nikapana mañwati ku bantu aba munahata, pe nikabatuma ku Yelushalema mu kutwala bishemo byenu.

⁴ Kami ndi niku fwanina ngayi niye na nami, pe bakaya hamo na nami.

Bihanganiko bya Paulu

⁵ Ngoboni nikeza kukwenu oho nikapita mu Mashendoniya, ndaba nikafwanina kupita mu Mashendoniya.

⁶ Kampe nikekala nenu shikati shashishe kukuma na ku mupepo, ngayi mukancindikize ha mukala wami ou nikaya.

⁷ Ha mukala ou kushinga nifwako ngayi nikamimone mu shikati shashishe, ngoboni nikutatilila ngayi nikekale nenu shikati shashitali ndi Mwene ukwitabila.

⁸ Ngoboni nikekala mu Efweshe kutwala na ku Pentekoshita.

⁹ Ndaba shipana shinancinkulukili sha kufwanina kutenda mulimo, kami ku bali babengi bakakulwisha.

¹⁰ Ndi Timoteo ukeza oko kukwenu, monenu ngayi ekale nenu na kubula bowa, ndaba niye ukutenda mulimo wa Mwene, ngonehe ami.

¹¹ Nohobene hinga muntu amushepesha, ngoboni mu mushindikize mu ku mwena ha mukala wendi wa kwiza kuno, ndaba nikumutatilila hamo na bawushinda.

¹² Haya bya kawushinda wetu Apoloshi namutongwezele ngayi eze kukwenu hamo na bakakukulupila bamo na kumimona, ngoboni niye kaliha washingile ngayi eze kukwenu ha shikati shino. Hinge noho, akawana shikati shashiwahe ukeza.

Mazu amamaninino

¹³ Tonenu, yimanenu mu kukulupila, mwinge balume ba kukanca, mwinge ba kushuma.

¹⁴ Tendenu byuma nimwabyo mu shishemo.

¹⁵ Bawushinda mu kulimuka ngayi Shetefwanashi na lupashi lwendi nibo bengile bakakwitabila bakutatika mu Akaya. Kami balipanine kutendela milimo bantu ba Nyambi.

¹⁶ Pe nikumilomba bawushinda mubayuvwilile bantu banoho na ku muntu nimwendi uku kwatisha hamo netu na kukalamana.

¹⁷ Niku wahilila kwiza kwa Shetefwanashi na Fwotunatashi na Akayikashi, ndaba hinge ngayi enu kaliha muli na nami, bampanine byuma ebye mwafwanina kumpana.

¹⁸ Ndaba bancumankanishile mu moyo wami ngonehe batendele kukwenu. Bantu banoho mwafwanini ku banuka.

¹⁹ Matengo aku litunga lya ku Esha akumishangwisha. Akwila na Pulishila ba kumishangwisha shikuma muli Mwene, hamo na litengo lili mu litala lyabo.

²⁰ Bakakukulupila nimwabo ba kumishangwisha. Lishangwishenu na kulizupeza kwa kuyela.

²¹ Ami Paulu na liboko lyami nikutikita ngayi, Shangwe.

²² Ndi muntu ukubula ku haka Mwene Yeshu Kilishitu ekale wakukutiwa! Yeka Mwene wetu!

²³ Nceshe za Mwene Yeshu Kilishitu zikale nenu.

²⁴ Shishemo shami shikale nenu nimwenu muli Kilishitu Yeshu.