1 Kolinte 14 - Libuka Lya Kuyela

Bishemo byamina bikufuma ku Moyo wa Kuyela

¹ Konkenu shishemo na kushinga bishemo bya moyo, ngoboni shinene ngayi mulubulule ncango za Nyambi.

² Ndaba muntu ukwamba mu lulimi lwa kubula kulimukiwa kaliha ukwamba ku bantu, ngoboni kuli Nyambi. Ndaba kowa muntu ukumuyuvwishisha, ngoboni ukwamba zincimpi na ngovu za Moyo.

³ Ngoboni ou ukulubulula ncango za Nyambi ukwamba ku bantu, kami ukubayavwa, ukubashumankanisha na kubabengezeka.

⁴ Muntu ukwamba mu lulimi lwa kubula kulimukiwa, ukuliyavwa niye mwine, ngoboni ou ukulubulula ukuyavwa litengo nimwalyo.

⁵ Nikushinga ngayi nimwenu mwambe mu zindimi za kubula kulimukiwa, ngoboni shinene nikushinga ngayi mwikale na bishemo bya kulubulula. Ndaba ngayi muntu ukulubulula ukupitakana ou ukwamba na zindimi za kubula kulimukiwa, ndele atontolole ngayi ayavwe litengo nimwalyo.

⁶ Wuluno bawushinda, ndi nikwiza kukwenu na kwamba na zindimi za kubula kulimukiwa, nikamiyavwa bishini? Kowa kuyavwa mukawanaho, ndele nimiletele ebye anaholwele Nyambi, hinge kalimukisho hinge kulubulula, hinge ku longesha.

⁷ Ngonehe byuma bya kubula wumi biya bya vumanga, nehi kanamutolilo na kambuli. Mukakumbeta abula kutapulula shiwahe mishumina, pe mukakuyuvwilila wufwako kukayuvwa lwimbo akwimbila.

⁸ Mukakushiba mpandula abula ku shiba mpandula ngayi yiyuvwanike shiwahe, yani ukalibalakanya kuya ku nzita?

⁹ Shili noho na kukwenu. Muntu ukalimuka bishini ebye mukwamba, ndi hakwamba mufwako kwamba mazu akuyuvwanika shiwahe? Mazu wenu akenga owa.

¹⁰ Mu kaye muli zindimi zazingi, kami kowa lulimi lukubula kutontolola shimina.

¹¹ Nohobene ndi nikubula kulimuka kutontolola kwa liya lizu, nikenga ngonehe muyeni kukwendi uya ukwamba na niye ukwamba ukenga ngonehe muyeni kukwami.

¹² Shili noho na kukwenu. Ndaba mu ku zundamina bishemo bya Moyo wa Kuyela, ezekenu kuliyavwishabyo shinene kukulisha litengo.

¹³ Ndaba yanebye uya ukwamba mu lulimi lwa kubula kulimukiwa, alombele ngayi atweshe kutontolola ebye akwamba.

¹⁴ Ndaba ndi nikulombela mu lulimi lwa kubula kulimukiwa, moyo wami ukulombela, ngoboni ngana zami zikubula kuwanaho shimina.

¹⁵ Haya nikatendaho bishini? Nikalombela na moyo wami, kami nikalombela na ngana zami. Nikayimbila na mutima wami, kami nikayimbila na ngana zami.

¹⁶ Ndi mu kulemesha Nyambi na moyo wenu tuhu, haya muntu uli nanenu hamo ukamba nahiti ngayi, “Ameni” ku malombelo enu akukambilila kuli Nyambi. Ndaba ukubula kulimuka ebye mukwamba.

¹⁷ Hinge ndi enu mu kukambilila shiwahe kuli Nyambi, ngoboni wamina ukubula kuyavwiwa.

¹⁸ Nikukambilila kuli Nyambi ngayi ami nambanga mu zindimi za kubula kulimukiwa kupitakana nimwenu.

¹⁹ Ngoboni mu litengo nikushinga kwamba mazu mutanu akuyuvwanika shiwahe, ngayi na lizu lyami nilongeshe bamina kami, kupitakana kwamba mazu makulukazi makumi amu lulimi lwa kubula kulimukiwa.

²⁰ Bawushinda, hinga muhanganika ngonehe batwanuke. Ku bya wubi mwinge ngonehe bambututu, ngoboni mu ngana mwinge bakulwane.

²¹ Ndaba mu mulao kwatikitiwa ngayi, “Mwene ukwamba ngayi, ‘Nikaliyavwisha mapukwenda kumilongesha na mazu a kubula kuyuvwanika. Nikamba nabo na mivumbo ya bayeni, ngoboni hinge noho, bakabula ku nyuvwa, Mwene ukwamba.’ ”

²² Nohobene kwamba mu zindimi za kubula kulimukiwa, byenga bilimukisho bya bakakubula kukulupila, kaliha bya bakakukulupila, ngoboni kulubulula kwenga kwa bakakukulupila, kaliha kwa bakakubula kukulupila.

²³ Nohobene ndi litengo nimwalyo linakunguluku mu mwanya umo, pe ndi nimwabo bakwamba mu zindimi za kubula kulimukiwa, ndi kukwiza bantu bakubula kulimuka, hinge bakakubula kukulupila, kati ukabula kwamba ngayi munapempele ndi?

²⁴ Ngoboni ndi nimwabo ba kulubulula, ndi kukwingina wamina wakubula kukulupila, hinge wakubula kulimuka, uketabila ku nimwabyo, kami ukunyanciwa ku nimwabo,

²⁵ nanebye byaholama mu mutima wendi bikaholoka, pe ukashintama na kulemesha Nyambi na kwamba ngayi, “Mwa shikuma Nyambi uli mumwenu!”

Shiheka sha kufwanina kulemeshelamo mu litengo

²⁶ Haya tutende nahiti bawushinda? Oho mu kukunguluka, muntu na muntu kukwenu uli na lwimbo, hinge ndi uli na mazu aku longesha, hinge ndi shuma shimina Nyambi anamuholwele, hinge mazu akwamba mu lulimi lwa kubula kulimukiwa, kami wamina mukakutontolola mazu, ngoboni nimwabyo ebye bitendiwe mu kuyavwa litengo.

²⁷ Ndi kuli muntu ukushinga kwamba mu lulimi lwa kubula kulimukiwa, benge babili hinge bahatu, ngoboni hinge bapitakane oho, bambe na kulipana shikati, pe hekale mukakutontolola.

²⁸ Ngoboni ndi kowa mukakutontolola, uya ukwamba amwene mu litengo, pe ambe tuhu kuli niye mwine na kuli Nyambi.

²⁹ Ha bya kulubulula, bantu babili hinge bahatu bambe, pe bamina bayate.

³⁰ Ngoboni Nyambi a holola shuma shamina ku muntu uli mukati, shashiwahe ngayi uya ukwamba amwene.

³¹ Nimwenu mu kutwesha kulubulula bya Nyambi shinene ndi mu kulipana shikati, ngayi nimwabo balilongeshe na ku shumankanishiwa.

³² Bantu bali na shishemo sha kulubulula, balimuke mwakuliyavwishilasho.

³³ Nyambi kaliha ukushinga kulitapatapa, ngoboni ku mwena. Ngonehe shikutendiwa mu matengo nimwawo a bakakuyela,

³⁴ bambuyama banafwanini ku mwena mu bikungulukilo bya mu matengo, kaliha banafwanini kwamba, ngonehe zikwamba Ndayano za Bayunda ngayi bambuyama benge bakakuyuvwilila.

³⁵ Ndi bakushinga kwipula shuma shamina, bakepule bakokwabo ku matala. Ndaba sha lisheni ngayi mbuyama ambe mu litengo.

³⁶ Kati lizu lya Nyambi lyezile nanenu ndi? Hinge ndi lyezile kukwenu tuhu ndi?

³⁷ Ndi muntu wamina ukuhanganika ngayi nengi muluwe, hinge ndi uli na bishemo bya moyo, shashiwahe etabile ngayi byuma ebye nikutikita kukwenu byenga ndayano za Mwene.

³⁸ Ngoboni ndi muntu kwitabila ebye wufwako, pe kukanukiwa wufwako.

³⁹ Nohobene, bawushinda, shingenu kulubulula, kami hinga mukanisha kwamba mu zindimi za kubula kulimukiwa.

⁴⁰ Ngoboni byuma nimwabyo bitendiwe shiwahe na shiheka sha kufwanina.