1 Kolinte 13 - Libuka Lya Kuyela

Shishemo

¹ Hinge ndi nikwamba na zindimi za bantu hinge na za mangeloyi, ngoboni nikubula shishemo nafutuku ngonehe ngenjo ya kuvuma, hinga shiwalawala sha kulila.

² Hinge ndi nili na shishemo sha ku shimikila hinge ndi nikulimuka zincimpi nimwazo na ku yuvwishisha byuma nimwabyo, hinge ndi nili na ku kulupila kwa kutwesha kuhenyesha mapili ngoboni nikubula shishemo, pe nili showa.

³ Hinge ndi nikupana wuheti wami nimwawo ku bakakushepwa, hinge nikupana lutu lwami ngayi bantu baluhokeshe ngoboni nikubula shishemo, bikubula ku nyavwa shuma shimina.

⁴ Shishemo shikutatilila shikuma, shishemo shikubula mwili, shishemo shikubula kuliyemeza nisho shine, kami kulilundumika shifwako,

⁵ shishemo kutenda shifwako bya kubula ku fwanina, shishemo shikubula kulishinga nisho shine, shishemo shikubula kupilama, shishemo kaliha shakonganga wubi,

⁶ shishemo shikubula ku wahilila mu bya wubi, ngoboni shiku wahilila mu kupwisha.

⁷ Shishemo shikuyatila byuma nimwabyo, shishemo shikukulupila byuma nimwabyo, shikulumbeza byuma nimwabyo, kami shikuzumanana mu byuma nimwabyo.

⁸ Shishemo kumana shifwako. Ngoboni hinge ndi kuli kulubulula, kukamana, hinge ndi kuli zindimi, zikamwena, hinge ndi kuli kalimukisho, kakabundala.

⁹ Ndaba bishemo byetu bya kalimukisho na bya kulubulula byenga tuhu bya shitika.

¹⁰ Ngoboni oho bya kulembuluka bikeza, pe ebye bya shitika bikamana.

¹¹ Oho nekalile kanuke nambilenga ngonehe kanuke nahanganikilenga ngonehe kanuke nayuvwishishilenga ngonehe kanuke, ngoboni oho na kulakale nashiyi byuma nimwabyo bya wanuke.

¹² Ndaba wuluno tuku mona ngo mu shimboni, biku moneka kancimpwencimpwe, ngoboni ha shikati shiyo tuku monabyo shintwantwa. Wuluno nikulimuka shitika, ngoboni ha shikati shiyo nikalimuka byuma nimwabyo, ngonehe Nyambi akundimuka.

¹³ Wuluno kuli byuma bihatu, kukulupila, kulumbeza na shishemo, ngoboni kunebye bihatu sha kupitakana kukwabyo shinengi shishemo.