1 Kolinte 11 - Libuka Lya Kuyela

¹ Hembwilizenu ami, ngonehe ami kami nikuhembwiliza Kilishitu.

² Nikumiyemeza bawushinda, ndaba mwanyanukanga mu byuma nimwabyo, kami munalama biheka ngonehe namilongeshelebyo.

Kulifwika ku mutwe ha kulemesha

³ Ngoboni nikushinga mulimuke ngayi Kilishitu niye mutwe wa muntu nimwendi. Mulume niye mutwe wa mukazi, kami Nyambi niye mutwe wa Kilishitu.

⁴ Mulume nimwendi ukulombela hinge ku shimikila hinga afwika ku mutwe, ukuhandula mutwe wendi.

⁵ Kami mukazi nimwendi ukulombela hinge ku shimikila hinga abula bya kufwika ku mutwe ukuhandula mutwe wendi, ndaba ukwinga ngonehe uya nashehe ku mutwe.

⁶ Ndaba ndi mukazi ukubula bya kufwika ku mutwe, shashiwahe ngayi ashehe ku mutwe. Ngoboni ndi sha lisheni ngayi mukazi ashehe ku mutwe hinge kuketwila huki, pe nafwanini kufwika mutwe wendi.

⁷ Ndaba mwa shikuma mulume ku fwanina kufwika mutwe wendi wufwako, ndaba niye shifwekesha na wuwahe wa Nyambi, ngoboni mukazi wenga wuwahe wa mulume.

⁸ Ndaba mulume ha kumulenga, kaliha wafumine ku mukazi, ngoboni mukazi niye wafumine ku mulume.

⁹ Mulume kaliha walengiwile ndaba ya mukazi, ngoboni mukazi walengiwile ndaba ya mulume.

¹⁰ Nohobene mukazi uku fwanina kwikala na shimonekesho sha ku mutwe wendi ndaba ya mangeloyi.

¹¹ Hinge noho, muli Mwene, mulume kaliha nengi wakushoboloka ku mukazi, kami mukazi kaliha nengi wakushoboloka ku mulume.

¹² Ndaba ngonehe mukazi afumine ku mulume nahiyo kami mulume wahemuwanga ku mukazi. Pe byuma nimwabyo bikufuma kuli Nyambi.

¹³ Liyatenu mukati kenu, kati shashiwahe ngayi mukazi alombele kuli Nyambi hinga abula kufwika mutwe wendi ndi?

¹⁴ Kati shihemwa shilolo shimilongeshe nisho shine ngayi sha lisheni ndi mulume ukwikala na huki zazitali.

¹⁵ Ngoboni ndi mukazi uli na huki zazitali, niwo wuwahe wendi. Ndaba huki zendi zapanikiwile kukwendi ngayi mwanga zimufwike.

¹⁶ Ngoboni ndi kuli umo ukushinga kukanangana ebye, etu tufwasho shiheka shamina hinge mu matengo a Nyambi.

Mulalilo wa Mwene

¹⁷ Haya munebye nikumishimikila, kumiyemeza nifwako, ndaba oho mwakungulukanga hamo, kaliha mwatendanga shiwahe, ngoboni mwatendanga shibi.

¹⁸ Ndaba ha kutatika ninayuvwu ngayi oho mwakungulukanga mu Litala lya Nyambi, muli kulitapatapa mukati kenu. Nohobene nikukulupila ngayi kampe bya kupwisha.

¹⁹ Nakubula kulimbashana, kunafwanini kwikala kulitapatapa mukati kenu, ngayi baya bali mu nzila yayiwahe bamoneke.

²⁰ Oho mwakungulukanga hamo, kaliha Mulalilo wa Mwene ou mwalyanga.

²¹ Ndaba oho mwalyanga muntu na muntu walimenekangaho kulya byakulya byendi, nohobene, bamo bekalanga na nzala, ngoboni bamina bakolwanga.

²² Kati matala mufwawo omu mwafwanini kulila na kunwinamo ndi? Kati mu kukenda Litengo lya Nyambi na kuyenesha baya banabibulu ndi? Nikamba nahiti kukwenu? Kati nikutwesha kumiyemeza hanebye ndi? Kumiyemeza nifwako.

²³ Ndaba natambwile kuli Mwene ebye kami ami namilongeshele ngayi, Mwene Yeshu wushiku uyo oho abebiwile, watambwile linkende,

²⁴ oho amanishile kukambilila kuli Nyambi, walipabwile, niho ambile ngayi, “Olwe nilwo lutu lwami lunamipabukili. Tendenu nehe mwanga munyanukenga.”

²⁵ Na shiheka shimo kami, oho bamanishile kulalila, watambwile nkomoki wambile ngayi, “Eye nkomoki inengi ya kulimama kwakupya mu mukeza wami, tendenu nehe shikati nimwasho mu kuyinwa mwanga munyanukenga.”

²⁶ Ndaba shikati nimwasho oho mu kulya elye linkende na kunwa eye nkomoki, mu ku shimikila lufu lwa Mwene kutwala noho akeza.

²⁷ Nohobene nimwendi ukalya elye linkende na kunwa eye nkomoki ya Mwene na shiheka sha shibi, uli na mulandu wa lutu na mukeza wa Mwene.

²⁸ Ngoboni shashiwahe ngayi muntu alihengole taha niye mwine, niho alye linkende elye na ku nwa eye nkomoki.

²⁹ Ndaba niye ukulya na kunwa na kubula kulimukisha lutu lwa Mwene, ukuliyatisha niye mwine, oho akulya na kunwa.

³⁰ Ndaba ya shuma eshe, mukati kenu babengi banapopo kami ba kukola, bamina babengi banafu.

³¹ Ndaba ndi tukulinyanca etu bamwine, pe kukayatiwa tufwako.

³² Ngoboni tukuyatiwa na ku shushuliwa kuli Mwene, ngayi tukabule kuyatiwa hamo na kaye.

³³ Nohobene, bawushinda wami, oho mu kukunguluka hamo na kulya, litatilenu umo na wamina.

³⁴ Kami ndi muntu uli na nzala, alye ku litala lyendi, ngayi mubule kuyatiwa oho mu kukunguluka hamo. Ngoboni byambo byamina nakeza nikamitongwezabyo.