1 Kolinte 1 - Libuka Lya Kuyela

¹ Ami Paulu wehaniwile na shifungo sha Nyambi kwinga ntumwana wa Yeshu Kilishitu nili hamo na kawushinda wetu Shoshiteneshi.

² Ku litengo lya Nyambi lili mu Kolinte, ku baya nimwabo banayeleshiwi muli Kilishitu Yeshu, baya banehaniwi ngayi benge ba kuyela hamo na baya nimwabo bali mu zimbalila nimwazo, baya bakwihana ha lizina lya Yeshu Kilishitu Mwene wetu. Niye Mwene wetu na Mwene wabo.

³ Mwanga Nyambi Tatiyetu na Mwene Yeshu Kilishitu bamipane nceshe na ku mwena.

Mfuywezi zili muli Yeshu

⁴ Nakambililanga kuli Nyambi shikati nimwasho ndaba yanenu, ndaba ya nceshe za Nyambi zapanikiwile kukwenu kupitila muli Yeshu Kilishitu.

⁵ Ndaba muli Kilishitu, mwengakale ba kuheta mu byuma nimwabyo, mu nyambilo yenu nimwayo na mu kalimukisho kenu nimwako.

⁶ Ndaba mazu akupaka Kilishitu ashumishiwakale mumwenu,

⁷ hinga mukwanga kubula kwikala na bishemo bya moyo, oho mu kutatilila kwiza kwa Mwene wetu Yeshu Kilishitu.

⁸ Niye ukamishumisha kutwala ku kukotoka ngayi mukabule shihepwa ha Mutena wa Mwene wetu Yeshu Kilishitu.

⁹ Nyambi wenga wa kupwisha, pe niye namihana ngayi mwinge bakakulilumikila na Mwanendi Yeshu Kilishitu Mwene wetu.

Kulitapulula mu litengo

¹⁰ Wuluno nikuminyepa bawushinda wami, mu lizina lya Mwene wetu Yeshu Kilishitu ngayi liyuvwenu umo na wamina, ngayi mubule kulitapulula mukati kenu. Ngoboni liyuvwenu shiwahewahe mwikale na shihanganiko shimo na mutima umo.

¹¹ Ndaba banantongweze bawushinda wami bamo ba mu litala lya Kiloyi, ngayi muli na nkani mukati kenu.

¹² Haya nikwamba ebye, muntu na muntu mukati kenu ukwamba byendi ngayi, “Ami nili wa Paulu,” wamina ngayi, “Ami nili wa Apoloshi,” wamina ngayi, “Ami nili wa Kefwashi,” wamina ngayi, “Ami nili wa Kilishitu.”

¹³ Kati Kilishitu unalitapululu ndi? Kati ou wamifwililile ha shishempakano Paulu ndi? Kati mwazubilishiwile mu lizina lya Paulu ndi?

¹⁴ Nikukambilila kuli Nyambi ngayi kaliha nazubilishile muntu kukwenu ndele tuhu Kilishipashi na Ngayushi.

¹⁵ Nohobene, kowa umo ukutwesha kwamba ngayi wazubilishiwile mu lizina lyami.

¹⁶ (Nazubilishile kami Shetefwanashi na baka litala lyendi, kufumishako aba ninatoyo, kulimuka nifwako ndi nazubilishile kami wamina.)

¹⁷ Ndaba Kilishitu kaliha wantumine ngayi niye na kuzubilisha. Ngoboni wantumine ngayi niye na ku shimikila ncango zaziwahe, kami kaliha kuzishimikila na ngana za mazu a wuntu, ngayi kufumisha ngovu za shishempakano sha Kilishitu hinga zifuma.

Kilishitu niye ngovu na ngana za Nyambi

¹⁸ Ndaba ncango za shishempakano zenga zowa ku baya bali na kuloba, ngoboni kukwetu tunapuluku, zenga ngovu za Nyambi.

¹⁹ Ndaba kwatikitiwa ngayi, “Nikalobesha ngana za baya ba kulitoya ngayi bali na ngana. Nikavulanganya kalimukisho ka baya bali na kalimukisho.”

²⁰ Mukangana uli kuti? Mukaku longesha ulikuti? Baya balimuka shiwahe ha bya muno mu kaye balikuti? Kati Nyambi shilolo amoneshe ngayi ngana za muno mu kaye zenga za kuyeba ndi?

²¹ Ndaba Nyambi mu ngana zendi kaliha wetabilile ngayi bantu ba mu kaye bamulimuke na ngana zabo, ngoboni kupitila muneze ncango tu ku shimikila eze bakwamba ngayi za kuyeba, Nyambi unawahilili ngayi apulwishe baya bakukulupila.

²² Ndaba Bayunda bakushinga ku mona bimonekesho, pe Bangiliki bakushinga ngana.

²³ Ngoboni etu tu ku shimikila Kilishitu wakolekiwile, ncango ziya zinengi za kupukalisha ku Bayunda kami ku Bakamatunga zinengi ncango zowa.

²⁴ Ngoboni ku Bayunda na Bakamatunga baya anehana Nyambi, eze ncango niye Kilishitu ou nengi ngovu za Nyambi na ngana za Nyambi.

²⁵ Ndaba kuyeba kwa Nyambi kwakukeya kupitakana ngana za bantu, kami wuboto wa Nyambi ukupitakana nyala za bantu.

²⁶ Haya bawushinda, lihanganikenu eshe mwekalile oho Nyambi amihanine. Kwezekesha na nyoyelo ya wuntu, kaliha babengi mukati kenu bekalile na ngana, hinge na ngovu, kami babengi mukati kenu kaliha bahemuwile mu maziko a maleema.

²⁷ Ndaba Nyambi wahatile byuma byowa bya muno mu kaye ngayi ayeneshe bakangana. Nyambi kami wahatile byuma bya kupopa bya muno mu kaye ngayi ayeneshe bakangovu.

²⁸ Kami wahatile byuma bya wunkutala bya muno mu kaye na byuma bya kukendiwa, biya bahanganikile ngayi byowa, ngayi mwanga alobeshe biya bahanganikile bakakaye ngayi byabinene,

²⁹ ngayi mwanga kubule muntu wakuliyemeza ku meho a Nyambi.

³⁰ Ngoboni Nyambi unamilete ngayi muliwanike hamo na Kilishitu Yeshu, kami Nyambi unatende Kilishitu ngayi enge ngana zetu na kwoloka kwetu na kukuliza kwetu.

³¹ Ngonehe kwatikitiwa ngayi, “Nimwendi ukushinga kuliyemeza aliyemezele muli Mwene.”