1 Byambo 9 - Libuka Lya Kuyela

¹ Baishalela nimwabo batikitiwile ngo ku mapashi wabo kami byambo byatikitiwile mu Likota lya Bamyene bamu Ishalela. Bantu bamu Yunda batwaliwile mu wuntapwa ku Mbambiloni mu kushushuliwa ndaba ya kuluwa kwabo.

Bantu aba babokele kufuma mu wuntapwa

² Bakutatika kuboka ku minzi yabo bengile Baishalela bamo na bakankombela na Balevi hamo na bakakutenda mu Litala lya Nyambi.

³ Bantu bamo ba ku mishobo ya Yunda, kami na Mbenjamani na Efulemu na Manashe babokele nakuzika mu Yelushalema.

⁴ Bazukulya mwana Yunda wa mulume Pelizi, mukakubatwaminina wengile Utayi mwana Amihundi wa mulume na muzukulya Omili. Bankakazendi bamina bengile Imuli na Mbani.

⁵ Bazukulya mwana Yunda wa mulume Shila mukakutwaminina wengile Ashayiya. Wengile kami mukulwane wa lupashi lwendi.

⁶ Bazukulya mwana Yunda Zela mukakutwaminina wengile Yewelu. Mapashi 690 bengile nimwabo bazukulya naba bahatu babokele ku Yelushalema.

⁷ Owe muhoko wamina wa mushobo wa Mbenjamani bazikilenga mu Yelushalema. Bengile Shalu mwana Meshulama wa mulume, ou wengile mwana Hondabiya, ou wengile mwana Hashenuwa,

⁸ Na Imbineya mwana Yelohama wa mulume na Ela mwana Uzi wa mulume na muzukulya Mikili na Meshulama mwana Shefwatiya wa mulume ou wengile mwana Leulu ou wengile mwana Imbiniya.

⁹ Engile mapashi 956 aku mushobo wa Mbenjamani azikile mu Yelushalema. Bantu nimwabo banatatiki kutoyiwa bengile bakulwane ba mapashi.

Bakankombela aba bazikilenga mu Yelushalema

¹⁰ Aba nibo bakankombela bazikilenga mu Yelushalema. Bengile ba Yendaya na Yehoyalimbi na Yakini.

¹¹ Na Azaliya mwana Hilikiya wa mulume ou wengile shilolo wa mukulwane mu Litala lya Nyambi. Bankakazendi bengile Meshulama na Zandoki na Melayoti na Ahitumbi.

¹² Andayiya mwana Yelohama wa mulume, bankakazendi bengile ba Pashiha na Malikiya. Maashayi mwana Andiyelu wa mulume, bankakazendi bengile Yazela na Meshulama na Meshilemiti na Imele.

¹³ Bakankombela aba bengile bakulwane mu mapashi bakumine ha 1,760. Bengile bawutungu mu milimo nimwayo yatendiwilenga mu Litala lya Nyambi.

Balevi aba bazikilenga mu Yelushalema

¹⁴ Balevi aba bazikilenga mu Yelushalema. Bengile ba Shemaya mwana Hashumbu wa mulume, bankakazendi bengile Azilikamu na Hashambiya bamu livumo lya Melali.

¹⁵ Mbakimbaka na Heleshi na Ngalale hamo na Mataniya mwana Mika wa mulume ou bankakazendi bengile Zikali na Ashafwi.

¹⁶ Ombandiya mwana Shemaya wa mulume, ou bankakazendi bengile Ngalale na Yendutani. Mbelekiya mwana Asha wa mulume muzukulya Elikana, ou wazikilenga mu litunga muya mwekalile munzi wa Netofwa.

Bakakulama Litala lya Nyambi aba bazikilenga mu Yelushalema

¹⁷ Aba nibo bakakulama Litala lya Nyambi bazikilenga mu Yelushalema, bengile ba Akumbu na Talimoni na Ahimani. Mukakubatwaminina wengile Shaluma.

¹⁸ Kukuma naku shikati shiya bamo ba ku mavumo wabo bazikilenga ku mushamuko wa menginino na kulama Lipangati lya Mwene. Bankakazabo balaminenga ku mapangati aku munkungwa wa Balevi.

¹⁹ Shaluma mwana Koli wa mulume muzukulya Embiyashafwi, hamo na baminendi bamu livumo lya Kola, bekalile na ngovu ha kulama ku menginino a ntanda yaku meho a Nyambi ya Ngula. Batendelenga ngonehe shiya batendelenga bankakazabo oho bengile bakulwane ku munkungwa wa Nyambi ya Ngula.

²⁰ Fwinihashi mwana Eliza wekalile na ku batwaminina ku mwaka. Nyambi ya Ngula wekalile nendi.

²¹ Zakaliya mwana Meshelemiya walaminenga ku menginino aku ntanda yaku meho a Nyambi ya Ngula.

²² Bantu nimwabo bahatiwile kwinga bakakulama ku menginino naku mapangati bengile 212. Batikitiwile ngonehe ha kulama minzi yabo oku bazikilenga. Wengile Mwene Ndavita na muluwe wa Nyambi Shamwele aba ayakile bankakazabo ha milimo eye.

²³ Nibo na bazukulyabo balaminenga ku mapangati aku Litala lya Nyambi, oho lyengile munkungwa.

²⁴ Kwekalile lipangati lya ku shangula ku mbalila na mbalila ya ncelele naku mabukubuku naku mushamuko naku mponci, kami ku zimbalila nimwazo kwekalile bakakulamako.

²⁵ Aba bakakulama bekalilenga na bawushinda wabo bakakubayavwa aba bekalilenga ha minzi, kami aba bekalilenga na kuliyavwa nabo ku mulimo wakulama ha matena mutanu na abili ku shikati na shikati.

²⁶ Balume banaa kubakakulama bengile Balevi, kami nibo bekalile na ngovu ha mulimo wakumaninina. Kami bekalile na ngovu ha tumpenci na bishete bya mu Litala lya Nyambi naku byuma byekalilemo.

²⁷ Bazikilenga kwakwipi na Litala lya Nyambi, ndaba wengile mulimo wabo kulilama na ku shinkulula mapangati lumenemene na lumenemene.

Balevi bamina

²⁸ Balevi bamina bekalile na mulimo waha Bya kukwatila ebye baliyavwishilenga ha kulemesha. Babitutwishilenga ha munkanda na kubilaba, kami babibweshelenga mukati ha kumanisha kubilaba ku shikati nimwasho osho babitendeshelenga.

²⁹ Bamina bengilenga bakulwane ku byuma byamina bya shizila nabya muhunga na waine na mazi a olive na incence na lukumba.

³⁰ Ngoboni mulimo waku vwela lukumba wengilenga wa bakankombela.

³¹ Kalevi watumbiwile ngayi Matitiya, mwana Shaluma wa mweli, wa mulume waku lupashi lwa Kola, wekalilenga na mulimo wakuwahisha zintupu za mankende akuyoha.

³² Bantu bamo bamu livumo lya Kohati bekalilenga na mulimo wakuwahisha mankende ashizila aku Litala lya Nyambi ha matena nimwawo aku Katala.

³³ Balupashi lwa Balevi bamo bekalilenga na mulimo wakwimbila mu Litala lya Nyambi. Bakulwane ba nawa mavumo bekalilenga mu matala amo aku Litala lya Nyambi, kami bekalilenga nahiya kwakubula kukwata ku mulimo wamina, ndaba bekalilenga ku mulimo ku mwana naku wushiku.

³⁴ Bantu aba banatatiki kutoyiwa bengile bakulwane ba mapashi a Balevi, kukonka ngonehe shiya bahemuwile ku bankakazabo. Bengile bakakutwaminina aba bazikilenga mu Yelushalema.

Likota lya Mwene Shaulu

³⁵ Yeyiwelu wengile tata Ngimbiyoni pe wazikile mu Ngimbiyoni. Mukazendi watumbiwile ngayi Maaka.

³⁶ Mwanendi wa mweli wa mulume wengile Ambindoni. Bana bendi bamina babalume bengile ba Zuli na Kishi na Mbaalu na Nela na Nandabi

³⁷ na Ngendoli na Ahiyo na Zakaliya na Mikiloti.

³⁸ Mikiloti wengile tata Shimeya. Bazukulyabo bazikilenga mu Yelushalema hahepi na mapashi amina amu mavumo wabo.

³⁹ Nela wengile tata Kishi kami Kishi wengile tata Shaulu. Shaulu wabelekele bana babalume banaa, bengile ba Yonatana na Malikishuwa na Ambinandambu na Eshimbayala.

⁴⁰ Yonatana wengile tata Melimbayala, kami Melimbi Mbaalu wengile tata Mika.

⁴¹ Mika wabelekele bana babalume banaa, bengile ba Pitoni na Meleki na Tahileya na Ahazi.

⁴² Ahazi wengile tata Yanda, kami Yanda wabelekele bana babalume bahatu, bengile ba Alemeti na Azimabeti na Zimili. Zimili wengile tata Moza.

⁴³ Moza wengile tata Mbineya, Mbineya wengile tata Lefwaya, Lefwaya wengile tata Elisa, Elisa wengile tata Azela.

⁴⁴ Bana ba Azela babalume bengile mutanu na umo, ba Azilikamu na Mbokela na Ishimaele na Sheyaliya na Ombandiya na Hananu.